Амударё туманида кенг кўламли ободонлаштириш ишлари бошланди
Маълумки, Қорақалпоғистон Республикаси Жўқорғи Кенгесининг Раиси Аманбай Оринбаев бошчилигида Амударё туманида мажлис ўтказилиб, ҳудудни ҳар томонлама ривожлантириш ва кенг кўламли ободонлаштириш ишларини олиб бориш, камбағалликни қисқартириш, фуқаролар ҳаётида учраётган муаммоларни ҳал этиш, шу билан бирга маҳаллалар инфратузилмасини яхшилаш ва бошқа қатор вазифалар белгилаб олинган эди.
28 январь куни туманда Жўқорғи Кенгес Раиси бошчилигида тупроқ йўлларни қум-шағал аралашмали йўлларга айлантириш, кенг кўламли ободонлаштириш ишларини олиб бориш бўйича амалий ишлар бошлаб юборилди.
Тумандаги Тошқалъа маҳалласида ташкил этилган соҳа раҳбарлари ва мутасаддилар билан учрашувда Жўқорғи Кенгес Раиси Аманбай Оринбаев Амударё туманида бошланган ушбу ободонлаштириш ишлари доирасида маҳаллалар ва қишлоқларнинг ички хўжалик йўлларига қум-шағал қоришмаси тўшалиб, бу борадаги ишлар кенг кўламда, туманнинг бошқа ҳудудларида ҳам давом эттирилишини таъкидлади.
Қайд этиш жоизки, шу пайтгача туманнинг турли овул ва маҳаллаларидаги умумий узунлиги 107 км бўлган тупроқ йўллар ёзда қум-чанг, ёмғирли кунларда эса лой билан қопланиб, аҳолини қийнаб келаётган эди. Эндиликда ушбу йўлларга қум-шағал аралашмасини ётқизиш орқали ушбу муаммоларни бартараф қилиб, аҳолининг узоғини яқин, мушкулни осон қилиш кўзда тутилмоқда.
Республика миқёсидаги раҳбарлар иштирокида дастлаб Тошқалъа маҳалласида бошланган ободонлаштириш ишларида махсус техникалар иштирок этиб, тумандаги идора-ташкилотлар ва Фавқулодда вазиятлар бошқармаси ходимлари сафарбар қилинган. Яқин кунларда Тошқалъа маҳалласидаги умумий узунлиги 6 километр 380 метр бўлган тупроқ йўллари қайта таъмирланиши режалаштирилган.
Шунингдек, ушбу кенг кўламли ободонлаштириш ишлари доирасида аҳолига электр энергияси етказиб беришдаги муаммолар ҳам бартараф қилинмоқда. Хусусан, Тошқалъа маҳалласидаги барча кўчалардаги эскирган, яроқсиз ҳолга келиб қолган 100дан ортиқ электр устунларини янги темир-бетон устунларга алмаштириш режалаштирилган бўлиб, махсус техникалар жалб қилинган ҳолда бу ишлар ҳам бошлаб юборилди.
Қайд этиш жоизки, туманда 2025 йил мобайнида давлат дастурлари асосида барча манбалар ҳисобидан жами 30 млрд 833 млн. cўм маблағ эвазига 8та объектда қурилиш-таъмирлаш ишларини амалга ошириш белгиланган.
Қолаверса, Ўзбекистон Республикаси Вазирлар Маҳкамасининг 2024 йил 11 октябрь кунги “Шаҳарлар ва бошқа аҳоли пунктлари кўчалари ҳамда ички хўжалик йўллари инфратузилмасини янада такомиллаштириш тўғрисида”ги 665-сонли қарорига асосан, жорий йилда 4 млрд. сўм маблағлар эвазига туман ҳудудидаги 13 км ички йўлларни шағаллаштириш кўзда тутилган бўлиб, ҳозирги вақтда лойиҳа ҳужжатлари ишлаб чиқилмоқда.
Маълумот ўрнида айтиш жоизки, туманда жами 1 минг 117 км узунликдаги ички йўллар мавжуд бўлиб, шундан салкам ярми, яъни 527 километри тупроқ йўллар, 518 километри тош йўллар, 60 километри асфальт йўллар ҳамда 8,9 километри цемент-бетон йўллардир.
Ўтган 2024 йил мобайнида ҳам туманда ички йўлларни таъмирлаш бўйича қатор амалий ишлар қилинган. Хусусан, Ўзбекистон Республикаси Президентининг 2023 йил 10 октябрь кунги қарорга асосан 153 км, ҳамда Вазирлар Маҳкамасининг 500-сонли қарорига асосан 34 км узунликдаги тупроқ йўлларга тош ётқизиш белгиланган бўлиб, бугунги кунда туман ободонлаштириш бошқармасига 4,8 млрд. сўм маблағ ажратилган ва ушбу маблағлар эвазига 34 км узунликдаги ички йўлларга тош шағал аралашмаси ётқизилган. Тошқалъадан бошланган ва туманнинг барча ҳудудлари қамраб олиниши кўзда тутилган кенг кўламли ободонлаштириш ва таъмирлаш ишлари ҳам ушбу ислоҳотларнинг узвий давомидир.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
