Amudaryo tumanida keng koʻlamli obodonlashtirish ishlari boshlandi

Maʼlumki, Qoraqalpogʻiston Respublikasi Joʻqorgʻi Kengesining Raisi Amanbay Orinbayev boshchiligida Amudaryo tumanida majlis oʻtkazilib, hududni har tomonlama rivojlantirish va keng koʻlamli obodonlashtirish ishlarini olib borish, kambagʻallikni qisqartirish, fuqarolar hayotida uchrayotgan muammolarni hal etish, shu bilan birga mahallalar infratuzilmasini yaxshilash va boshqa qator vazifalar belgilab olingan edi.

28-yanvar kuni tumanda Joʻqorgʻi Kenges Raisi boshchiligida tuproq yoʻllarni qum-shagʻal aralashmali yoʻllarga aylantirish, keng koʻlamli obodonlashtirish ishlarini olib borish boʻyicha amaliy ishlar boshlab yuborildi.

Tumandagi Toshqalʼa mahallasida tashkil etilgan soha rahbarlari va mutasaddilar bilan uchrashuvda Joʻqorgʻi Kenges Raisi Amanbay Orinbayev Amudaryo tumanida boshlangan ushbu obodonlashtirish ishlari doirasida mahallalar va qishloqlarning ichki xoʻjalik yoʻllariga qum-shagʻal qorishmasi toʻshalib, bu boradagi ishlar keng koʻlamda, tumanning boshqa hududlarida ham davom ettirilishini taʼkidladi.

Qayd etish joizki, shu paytgacha tumanning turli ovul va mahallalaridagi umumiy uzunligi 107 km boʻlgan tuproq yoʻllar yozda qum-chang, yomgʻirli kunlarda esa loy bilan qoplanib, aholini qiynab kelayotgan edi. Endilikda ushbu yoʻllarga qum-shagʻal aralashmasini yotqizish orqali ushbu muammolarni bartaraf qilib, aholining uzogʻini yaqin, mushkulni oson qilish koʻzda tutilmoqda.

Respublika miqyosidagi rahbarlar ishtirokida dastlab Toshqalʼa mahallasida boshlangan obodonlashtirish ishlarida maxsus texnikalar ishtirok etib, tumandagi idora-tashkilotlar va Favqulodda vaziyatlar boshqarmasi xodimlari safarbar qilingan. Yaqin kunlarda Toshqalʼa mahallasidagi umumiy uzunligi 6 kilometr 380 metr boʻlgan tuproq yoʻllari qayta taʼmirlanishi rejalashtirilgan.

Shuningdek, ushbu keng koʻlamli obodonlashtirish ishlari doirasida aholiga elektr energiyasi yetkazib berishdagi muammolar ham bartaraf qilinmoqda. Xususan, Toshqalʼa mahallasidagi barcha koʻchalardagi eskirgan, yaroqsiz holga kelib qolgan 100dan ortiq elektr ustunlarini yangi temir-beton ustunlarga almashtirish rejalashtirilgan boʻlib, maxsus texnikalar jalb qilingan holda bu ishlar ham boshlab yuborildi.

Qayd etish joizki, tumanda 2025-yil mobaynida davlat dasturlari asosida barcha manbalar hisobidan jami 30 mlrd 833 mln. coʻm mablagʻ evaziga 8ta obʼektda qurilish-taʼmirlash ishlarini amalga oshirish belgilangan.

Qolaversa, Oʻzbekiston Respublikasi Vazirlar Mahkamasining 2024-yil 11-oktyabr kungi “Shaharlar va boshqa aholi punktlari koʻchalari hamda ichki xoʻjalik yoʻllari infratuzilmasini yanada takomillashtirish toʻgʻrisida”gi 665-sonli qaroriga asosan, joriy yilda 4 mlrd. soʻm mablagʻlar evaziga tuman hududidagi 13 km ichki yoʻllarni shagʻallashtirish koʻzda tutilgan boʻlib, hozirgi vaqtda loyiha hujjatlari ishlab chiqilmoqda.

Maʼlumot oʻrnida aytish joizki, tumanda jami 1 ming 117 km uzunlikdagi ichki yoʻllar mavjud boʻlib, shundan salkam yarmi, yaʼni 527 kilometri tuproq yoʻllar, 518 kilometri tosh yoʻllar, 60 kilometri asfalt yoʻllar hamda 8,9 kilometri tsement-beton yoʻllardir.

Oʻtgan 2024-yil mobaynida ham tumanda ichki yoʻllarni taʼmirlash boʻyicha qator amaliy ishlar qilingan. Xususan, Oʻzbekiston Respublikasi Prezidentining 2023-yil 10-oktyabr kungi qarorga asosan 153 km, hamda Vazirlar Mahkamasining 500-sonli qaroriga asosan 34 km uzunlikdagi tuproq yoʻllarga tosh yotqizish belgilangan boʻlib, bugungi kunda tuman obodonlashtirish boshqarmasiga 4,8 mlrd. soʻm mablagʻ ajratilgan va ushbu mablagʻlar evaziga 34 km uzunlikdagi ichki yoʻllarga tosh shagʻal aralashmasi yotqizilgan. Toshqalʼadan boshlangan va tumanning barcha hududlari qamrab olinishi koʻzda tutilgan keng koʻlamli obodonlashtirish va taʼmirlash ishlari ham ushbu islohotlarning uzviy davomidir.

Charos Arslonova, tuman hokimligining Axborot xizmati rahbari.