Халқ депутатлари Амударё туман Кенгашининг 5 сессияси тўғрисида ахборот

Жорий йилнинг 29 январь куни Амударё тумани ҳокимлигининг мажлислар залида Халқ депутатлари Амударё туман Кенгашининг 5-сессияси бўлиб ўтди. Сессия мажлисида депутатлар, туман ҳокими ўринбосарлари, маҳалла фуқаролар йиғинлари раислари ва ОАВ вакиллари иштирок этди.

Сессияни Халқ депутатлари туман Кенгаши Раиси, туман ҳокими Собир Хўжаметов очди ҳамда олиб борди.

Сессия котиблигига 5-Ойбек сайлов округидан депутат Дилфуза Ўразбоева сайланди.

Сессия кун тартибидаги дастлабки масала Амударё туманини комплекс ижтимоий-иқтисодий ривожлантириш бўйича секторлар ҳудудларида амалга оширилган ишлар ва 2025 йилда амалга ошириладиган ишлар “Йўл хариталари”ни тасдиқлаш тўғрисида бўлиб, ушбу масала юзасидан секторлар раҳбарлари ҳисобот бердилар.

1-сектор котиби Отабек Оллаёровнинг ҳисоботида 2019 йил 8 январдаги “Ҳудудларни комплекс ижтимоий-иқтисодий ривожлантириш бўйича секторлар фаолиятини янада такомиллаштиришга доир қўшимча чора-тадбирлар тўғрисида”ги Президент қарорига асосан 1-сектор ҳудудида 2025 йилда амалга оширилиши режалаштирилган ишлар бўйича маълумот берилди.

Ушбу масала юзасидан туман прокурори – 2-сектор раҳбари
Баҳром Машариповнинг ҳисоботида сектор раҳбарияти томонидан аҳолининг турли қатламлари билан тўғридан-тўғри мулоқотни кенгайтириш, мавжуд долзарб муаммоларни аниқлаш, уларни бевосита жойида бартараф этиш юзасидан аниқ чоралар кўриш мақсадида қатор ишлар амалга оширилаётгани таъкидланди. Бунда асосий эътибор сектор ҳудудини ижтимоий-иқтисодий ривожлантириш, аҳоли муаммоларини аниқлаш ва бартараф этиш, “Темир дафтар”, “Ёшлар дафтари” ва “Аёллар дафтар”га киритилган ижтимоий муҳофазага муҳтож оилалар, ёшлар ва хотин-қизларнинг муаммоларини ҳал этиш, ижтимоий соҳа объектлари ва муҳандислик-коммуникация тармоқларини яхшилаш, аҳоли бандлигини таъминлаш, тадбиркорликни ривожлантириш, инвестиция лойиҳаларини амалга ошириш, жиноятчиликнинг олдини олиш ва ҳуқуқбузарликлар профилактикаси масалаларига қаратилганлиги қайд этилди.

3-сектор раҳбари – Амударё тумани Ички ишлар бўлими бошлиғи Мухамметали Хожамуратовнинг ҳисоботида Президент қарори асосида секторлар фаолияти учун масъул бўлган тузилмаларда секторлар бўйича фаолиятни такомиллаштиришга қаратилган бир қатор чора-тадбирлар белгилаб берилганлиги, жумладан, секторлар фаолиятига “туман (шаҳар) – вилоят – республика” тамойили жорий этилганлиги, унга кўра, ҳокимликлар, прокуратура, ички ишлар ва солиқ идораларида секторлар бўйича вертикал бошқарув тизими йўлга қўйилганлиги қайд этилди.

Кун тартибидаги масала юзасидан 4-сектор раҳбари – Амударё тумани солиқ инспекцияси бошлиғи Жаҳонгир Раҳимовнинг ҳисоботида аҳолининг шикоят ва мурожаатлари, таклифларини ўрганиш, аҳолини қийнаётган муаммоларни жойида ҳал этиш мақсадида корхона-ташкилотлар билан ҳамкорликда 2024 йил давомида 75та сайёр қабул ўтказилгани, ушбу сайёр қабулларда жами 341та мурожаатлар келиб тушгани, ушбу мурожаатларнинг 292таси, ёки 85,6 фоизи ижобий ҳал қилингани, 49 нафар мурожаатчиларга эса тушунтиришлар берилгани қайд қилинди.

Сессия мажлисида Амударё тумани Адлия бўлими бошлиғи Мансур Садиков Президентимиз томонидан 2022 йил 17 мартда қабул қилинган “Фуқароларнинг ҳуқуқ ва эркинликларини таъминлаш ҳамда ҳуқуқий хизмат кўрсатишда адлия органлари ва муассасалари фаолияти самарадорлигини янада ошириш чора-тадбирлари тўғрисида”ги Фармони ҳамда 2022 йил 18 мартдаги “Юридик хизмат кўрсатиш марказлари фаолиятини янада кенгайтириш бўйича қўшимча чора-тадбирлар тўғрисида”ги 173-сонли қарори ижросини таъминлаш борасида туманда амалга оширилаётган ишлар ҳамда келгусидаги режалар хусусида сўз юритди.

Сессияда Ёшлар ишлари агентлиги Амударё тумани бўлими бошлиғи Бекзод Ўринбоев ёшларни ҳар томонлама қўллаб-қувватлаш борасида амалга оширилган ишлар ҳамда келгусидаги режалар юзасидан ҳисобот берди. Ҳисоботда “Ёшлар баланси” асосида 2024 йил январь-февраль ойларида маҳаллаларда 14-30 ёш оралиғида 53 минг 940 нафар ёшлар хатловдан ўтказилиб, ижтимоий аҳволи, қобилияти ҳамда қизиқишларига қараб 7 тоифага ажратилгани, 23 минг 216 нафар ёшларнинг рўйхати шакллантирилиб, 6 нафари ҳуқуқ-тартибот органларига бириктирилгани ва шу асосда тегишли ишлар ташкил этилгани таъкидланди.

Сессия кун тартибига киритилган барча масалалар атрофлича муҳокама қилинди, ҳисоботлар ва фикр-мулоҳазалар, таклифлар тингланиб, тегишли қарорлар қабул қилинди.

Шунинг билан халқ депутатлари Амударё туман Кенгашининг бешинчи сессияси ўз ишини якунлади.

Чарос Арслонова, туман ҳокимлигининг Ахборот хизмати раҳбари.