Амударё туманида “Камбағалликдан фаровонлик сари” дастури ижроси ўрганилди
Хабарингиз бор, мамлакатимизда ижтимоий ҳимояга муҳтож аҳоли қатламини қўллаб-қувватлаш ҳамда камбағалликни қисқартириш мақсадида кенг кўламли ишлар олиб борилмоқда. Президент Шавкат Мирзиёев томонидан қабул қилинган тегишли Фармон ва Қарорлар айнан шу мақсадга қаратилган бўлиб, мамлакат бўйлаб “Камбағалликдан фаровонлик сари” дастури доирасида муҳим вазифалар амалга оширилмоқда.
Жўқорғи Кенгесдаги Ўзбекистон Халқ демократик партияси фракциясининг иш режасида белгиланган “Ўзбекистон Республикаси Президентининг 2024 йил 23 сентябрдаги Фармони ва “Камбағалликдан фаровонлик сари” дастурини амалга ошириш бўйича биринчи навбатдаги чора-тадбирлар тўғрисида”ги қарорининг Амударё туманидаги ижросини ўрганиш мақсадида ташкил этилган тадбир ҳам шулар жумласидандир.
Дастурнинг амалий ижроси ва натижаларини муҳокама қилиш мақсадида Жўқорғи Кенгесдаги Ўзбекистон Халқ демократик партияси фракцияси ҳамда Халқ депутатлари Амударё туман Кенгашидаги партия гуруҳининг қўшма йиғилиши ўтказилди.
Йиғилишни партиянинг Қорақалпоғистон Республикаси Кенгаши раиси, Жўқорғи Кенгесдаги партия фракцияси раҳбари Халилла Ешимбетов очди ҳамда олиб борди.
Тадбирда дастурнинг ижроси таҳлил қилиниб, эришилган натижалар ҳамда келгуси вазифалар муҳокама қилинди.
Кун тартибидаги масала юзасидан Ўзбекистон Халқ демократик партияси Амударё туман кенгаши раиси, Халқ депутатлари Амударё туман Кенгашидаги партия депутатлик гуруҳи раҳбари Махсуд Саъдуллаев сўзга чиқиб, дастурнинг тумандаги ижроси бўйича амалга оширилган депутатлик назорати натижалари ҳақида ахборот берди.
Йиғилишда тумандаги инфратузилмаси оғир аҳволдаги маҳаллалар рўйхати шакллантирилгани, Бобур, Амир Темур, Қангли, Бўз ёп, Куюк-кўпир, Оқ олтин ва Уйшин номли овул ва маҳаллаларда дастур доирасида қатор амалий ишлар қилинаётгани қайд этиб ўтилди.
Жумладан, томорқа ерларини суғориш тизимини яхшилаш, электр таъминоти барқарорлигини таъминлаш, интернет сифатини ошириш, ички йўлларни таъмирлаш ва инфратузилмани ривожлантиришга қаратилган чора-тадбирлар таҳлил этилди. Шунингдек, жорий йилда амалга оширилиши режалаштирилган ишлар белгилаб олинди.
Бундан ташқари, шу куни дастур ижросини таҳлил қилиш мақсадида Жўқорғи Кенгесдаги Ўзбекистон Халқ демократик партияси фракцияси ва Халқ депутатлари Амударё туман Кенгашидаги партия гуруҳи аъзоларидан иборат Ишчи гуруҳ аъзолари Арна бўйи маҳалла фуқаролар йиғинидаги “еттилик” аъзолари ва аҳоли вакиллари билан учрашди. Мулоқот давомида камбағалликни қисқартиришга қаратилган таклифлар, мавжуд муаммолар ва уларни ҳал этиш йўллари ўрганилди.
Шунингдек, Ишчи гуруҳ аъзолари дастур доирасида амалга оширилаётган ишлар билан яқиндан танишиш мақсадида хонадонларда бўлишди.
Хусусан, Арна бўйи маҳалласида яшовчи фуқаро Бекзод Досимовнинг оиласига озиқ-овқат маҳсулотлари, кўмир ва имтиёзли кредит асосида мотороллер транспорт воситаси берилди. Келгусида оила аъзоларининг тадбиркорлик фаолиятини йўлга қўйишлари учун зарур шарт-шароитлар яратилиши режалаштирилган.
Шундан сўнг ишчи гуруҳ аъзолари томонидан маҳалладаги яна бир хонадон ҳолидан хабар олинди. Фуқаро Қалбика Ўразбаева билан суҳбат давомида оилага дастур доирасида озиқ-овқат маҳсулотлари бериб келинаётгани, ногиронлиги бор бўлган фарзандининг нафақа олиш муддати узайтирилгани ва Нукус шаҳрида бир ой давомида бепул даволаниши учун ёрдам кўрсатилгани, оила бекаси эса тадбиркорлик олий мактабида ўқитилиб, сертификат билан таъминлангани инобатга олиниб, унга келгусида тадбиркорлик фаолиятини йўлга қўйиш бўйича тавсиялар берилди.
“Камбағалликдан фаровонлик сари” дастурининг изчил амалга оширилиши аҳолининг ижтимоий-иқтисодий ҳолатини янада яхшилашга, камбағаллик даражасини камайтириб, оилалар фаровонлигини таъминлашга хизмат қилади.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
