Amudaryo tumanida “Kambagʻallikdan farovonlik sari” dasturi ijrosi oʻrganildi

Xabaringiz bor, mamlakatimizda ijtimoiy himoyaga muhtoj aholi qatlamini qoʻllab-quvvatlash hamda kambagʻallikni qisqartirish maqsadida keng koʻlamli ishlar olib borilmoqda. Prezident Shavkat Mirziyoyev tomonidan qabul qilingan tegishli Farmon va Qarorlar aynan shu maqsadga qaratilgan boʻlib, mamlakat boʻylab “Kambagʻallikdan farovonlik sari” dasturi doirasida muhim vazifalar amalga oshirilmoqda.

Joʻqorgʻi Kengesdagi Oʻzbekiston Xalq demokratik partiyasi fraktsiyasining ish rejasida belgilangan “Oʻzbekiston Respublikasi Prezidentining 2024-yil 23-sentyabrdagi Farmoni va “Kambagʻallikdan farovonlik sari” dasturini amalga oshirish boʻyicha birinchi navbatdagi chora-tadbirlar toʻgʻrisida”gi qarorining Amudaryo tumanidagi ijrosini oʻrganish maqsadida tashkil etilgan tadbir ham shular jumlasidandir.

Dasturning amaliy ijrosi va natijalarini muhokama qilish maqsadida Joʻqorgʻi Kengesdagi Oʻzbekiston Xalq demokratik partiyasi fraktsiyasi hamda Xalq deputatlari Amudaryo tuman Kengashidagi partiya guruhining qoʻshma yigʻilishi oʻtkazildi.

Yigʻilishni partiyaning Qoraqalpogʻiston Respublikasi Kengashi raisi, Joʻqorgʻi Kengesdagi partiya fraktsiyasi rahbari Xalilla Yeshimbetov ochdi hamda olib bordi.

Tadbirda dasturning ijrosi tahlil qilinib, erishilgan natijalar hamda kelgusi vazifalar muhokama qilindi.

Kun tartibidagi masala yuzasidan Oʻzbekiston Xalq demokratik partiyasi Amudaryo tuman kengashi raisi, Xalq deputatlari Amudaryo tuman Kengashidagi partiya deputatlik guruhi rahbari Maxsud Saʼdullayev soʻzga chiqib, dasturning tumandagi ijrosi boʻyicha amalga oshirilgan deputatlik nazorati natijalari haqida axborot berdi.

Yigʻilishda tumandagi infratuzilmasi ogʻir ahvoldagi mahallalar roʻyxati shakllantirilgani, Bobur, Amir Temur, Qangli, Boʻz yop, Kuyuk-koʻpir, Oq oltin va Uyshin nomli ovul va mahallalarda dastur doirasida qator amaliy ishlar qilinayotgani qayd etib oʻtildi.

Jumladan, tomorqa yerlarini sugʻorish tizimini yaxshilash, elektr taʼminoti barqarorligini taʼminlash, internet sifatini oshirish, ichki yoʻllarni taʼmirlash va infratuzilmani rivojlantirishga qaratilgan chora-tadbirlar tahlil etildi. Shuningdek, joriy yilda amalga oshirilishi rejalashtirilgan ishlar belgilab olindi.

Bundan tashqari, shu kuni dastur ijrosini tahlil qilish maqsadida Joʻqorgʻi Kengesdagi Oʻzbekiston Xalq demokratik partiyasi fraktsiyasi va Xalq deputatlari Amudaryo tuman Kengashidagi partiya guruhi aʼzolaridan iborat Ishchi guruh aʼzolari Arna boʻyi mahalla fuqarolar yigʻinidagi “yettilik” aʼzolari va aholi vakillari bilan uchrashdi. Muloqot davomida kambagʻallikni qisqartirishga qaratilgan takliflar, mavjud muammolar va ularni hal etish yoʻllari oʻrganildi.

Shuningdek, Ishchi guruh aʼzolari dastur doirasida amalga oshirilayotgan ishlar bilan yaqindan tanishish maqsadida xonadonlarda boʻlishdi.

Xususan, Arna boʻyi mahallasida yashovchi fuqaro Bekzod Dosimovning oilasiga oziq-ovqat mahsulotlari, koʻmir va imtiyozli kredit asosida motoroller transport vositasi berildi. Kelgusida oila aʼzolarining tadbirkorlik faoliyatini yoʻlga qoʻyishlari uchun zarur shart-sharoitlar yaratilishi rejalashtirilgan.

Shundan soʻng ishchi guruh aʼzolari tomonidan mahalladagi yana bir xonadon holidan xabar olindi. Fuqaro Qalbika Oʻrazbayeva bilan suhbat davomida oilaga dastur doirasida oziq-ovqat mahsulotlari berib kelinayotgani, nogironligi bor boʻlgan farzandining nafaqa olish muddati uzaytirilgani va Nukus shahrida bir oy davomida bepul davolanishi uchun yordam koʻrsatilgani, oila bekasi esa tadbirkorlik oliy maktabida oʻqitilib, sertifikat bilan taʼminlangani inobatga olinib, unga kelgusida tadbirkorlik faoliyatini yoʻlga qoʻyish boʻyicha tavsiyalar berildi.

“Kambagʻallikdan farovonlik sari” dasturining izchil amalga oshirilishi aholining ijtimoiy-iqtisodiy holatini yanada yaxshilashga, kambagʻallik darajasini kamaytirib, oilalar farovonligini taʼminlashga xizmat qiladi.

Shohzod Qurbonboyev