49-сонли мактабгача таълим ташкилоти биноси янгидан қурилиб, фойдаланишга топширилди
Мактабгача таълим болаларнинг интеллектуал ва жисмоний ривожланишида муҳим босқич саналади. Шу боис, давлат томонидан соҳага алоҳида эътибор қаратилиб, мактабгача таълим қамрови ва сифати йил сайин яхшиланмоқда. 2017 йилда мамлакатимизда болаларни мактабгача таълим билан қамраб олиш даражаси 27 фоизни ташкил этган бўлса, бугунги кунга келиб бу кўрсаткич 75 фоиздан ошди. Бу натижага эришишда кенг кўламли ислоҳотлар, янги боғчалар қурилиши ва мавжуд муассасаларни реконструкция қилиш каби ташаббуслар муҳим роль ўйнади.
Амударё туманининг Қангли овули ҳудудидаги 49-сонли мактабгача таълим ташкилотининг биноси янгидан қурилиб, 12 февраль куни фойдаланишга топширилгани шу йўналишдаги ишларнинг яна бир ёрқин намунаси бўлди. Ушбу муассасанинг аввалги биноси 1975 йилда 60 ўринга мўлжаллаб қурилган бўлиб, йиллар давомида таъмирталаб аҳволга келиб қолган эди. Натижада, болажонлар етарлича шароитга эга бўлмаган жойда таълим-тарбия олишга мажбур бўлиб келишаётганди. Давлатимизнинг мактабгача таълим соҳасидаги изчил ислоҳотлари самараси ўлароқ бу муаммо ўз ечимини топди.
Муассаса биносининг тантанали очилиш маросимида туман ҳокими ўринбосари, Оила ва хотин-қизлар бўлими бошлиғи Гўзал Сабурова, туман мактабгача ва мактаб таълими бўлими бошлиғи Ялғаш Шомуротов, соҳа мутахассислари, нуронийлар ҳамда маҳалла фаоллари иштирок этишди.
Тадбирда сўз олган ҳоким ўринбосари Гўзал Сабурова кейинги йилларда мактабгача таълим тизимига қаратилаётган эътибор, янги таълим муассасаларини барпо этиш, соҳага хусусий тадбиркорларни жалб қилиш орқали қамров кўрсаткичини янада ошириш ҳамда болалар учун қулай шароитлар яратиш борасида олиб борилаётган ислоҳотларга алоҳида тўхталиб ўтди. Ушбу ўзгаришлар нафақат таълим сифатини ошириши, балки ота-оналар учун ҳам катта қулайликлар яратиши қайд қилинди.
Муассаса биносини фойдаланишга топшириш маросими болажонларнинг ижодий чиқишлари билан давом этди. Кичкинотойлар Ватан, бахтли болалик ҳақида куй-қўшиқлар ижро этиб, меҳмонларни илиқ қарши олишди. Кичкинтойларнинг қувончга тўла чеҳраси, қувноқ рақс ўйинлари байрамга ўзгача шукуҳ бағишлади.
Маълумот ўрнида, 49-сонли мактабгача таълим ташкилотининг янги биноси Инвестиция дастури доирасида 3,5 миллиард сўм маблағ эвазига бунёд этилди. Қурилиш ишлари “Jumurtov tex taʼmir servis” МЧЖ томонидан амалга оширилиб, қисқа муддат ичида 90 ўринли замонавий 2 қаватли бино қад ростлади.
Ушбу таълим муассасаси маҳалла аҳолиси учун катта аҳамиятга эга. Аввало, бу ерда болалар учун замонавий, хавфсиз ва қулай шароитлар яратилди. Улар эндиликда замонавий шароитларда таълим-тарбия олиш имкониятига эга бўлдилар. Бундан ташқари, аввал 60 болани қамраб олган ушбу муассасанинг имкониятлари кенгайтирилиб, 90 ўринли замонавий бинога айлантирилди. Бу эса мактабгача таълим қамровини янада оширишга хизмат қилади.
Ўтган йилнинг ўзида туманимизда 6 та таълим соҳаси объекти, жумладан, 3 та мактаб учун қўшимча бино ва 3 та МТТ биноси фойдаланишга топширилди. Бу эса давлат томонидан таълим тизимига қаратилаётган эътиборнинг амалий исботидир.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
