Халқ депутатлари Амударё тумани Кенгашининг 6-сессияси тўғрисида ахборот

Жорий йилнинг 21 февраль куни Амударё туман ҳокимлигининг мажлислар залида Халқ депутатлари Амударё туман Кенгашининг 6-сессияси бўлиб ўтди. Сессия мажлисида депутатлар, туман ҳокими ўринбосарлари, ҳокимлик масъул ходимлари, бўлимлар, корхона-ташкилотлар раҳбарлари ва ОАВ вакиллари иштирок этдилар.

Сессияни Халқ депутатлари туман Кенгаши Раиси ўринбосари – 3-Дўстлик сайлов округидан депутат Мадамин Казаков олиб борди. Сессия котиблигига 6-Бўстон сайлов округидан депутат Мақсуд Саъдуллаев сайланди.

Сессия кун тартибидаги дастлабки масала туманда аҳоли бандлигини таъминлаш, кам таъминланган оилаларни камбағалликдан чиқариш бўйича 2024 йил давомида амалга оширилган ишлар ҳамда 2025 йил якунига қадар туманда амалга ошириладиган ишлар тўғрисида туман ҳокимининг биринчи ўринбосари Фахриддин Юсупов ҳисобот берди.

Фахриддин Юсупов ўз ҳисоботида туманда аҳоли даромадини ошириш, фуқароларнинг бандлигини таъминлаш мақсадида бириктирилган иқтисодий комплекс, банклар ҳамда “Маҳалла еттилликлари” билан биргаликда қатор ишлар амалга оширилганини қайд қилиб, туманни ижтимоий-иқтисодий ривожлантиришнинг белгиланган прогноз кўрсаткичларига эришиш бўйича кўрилаётган чоралар хусусида сўз юритди.

Ҳисоботда келтирилишича, ўтган йил мобайнида иқтисодий кўрсаткичларда юқори ўсиш суръати кузатилган бўлиб, саноат маҳсулотлари ҳажми 112,1 фоизга, хизматлар ҳажми 117,4 фоизга, қурилиш-пудрат ишлари ҳажми 105,4 фоизга, қишлоқ хўжалиги маҳсулотлари ҳажми 104,2 фоизга ўсган. 2024 йилда туманда 15 минг 836 та янги иш ўринлари яратиш белгиланган бўлиб, йил якуни билан амалда 20 минг 855 та иш ўринлари яратилган ва режа 132 фоизга бажарилган.

Сессия кун тартибидаги туман маҳаллий бюджетининг 2024 йилнинг тўққиз ойи давомида ва йил якуни бўйича ижроси тўғрисидаги масала юзасидан туман Иқтисодиёт ва молия бўлими бошлиғи Жавлонбек Жумамуродов ҳисобот берди.

Ҳисоботда 2024 йил 9 ой давомида Амударё тумани маҳаллий бюджетнинг даромадлар режаси жами 46 млрд 803,1 млн сўм қилиб белгиланган бўлиб, ушбу режа жами 47 млрд 673,6 млн сўмга, яъни 870,5 млн сўмга ортиғи билан бажарилгани, ушбу даврда маҳаллий бюджетнинг харажатлари жами 198 млрд 138,9 млн сўм қилиб белгиланган бўлиб, амалда 185 млрд 856,8 млн сўмлик маблағлар сарфланган.

Сессияда “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги Қонуни ижросини таъминлаш борасида Амударё туманида амалга оширилаётган ишлар юзасидан Давлат кадастрлари палатаси туман филиали бошлиғи Шерзод Султанов ҳисобот берди.

Депутатлар шунингдек туман Мактабгача ва мактаб таълими бўлими томонидан 2025 йил давомида амалга оширилган ишлар ҳақида мазкур бўлим бошлиғи ўринбосари Ибрагим Ражаповнинг ҳисоботини тингладилар.

Ҳисоботда қайд қилинганидек, 2024 йил мобайнида 404-сонли Президент қарори асосида Беруний маҳалласи ҳудудида жойлашган 31-сонли мактабга 330 ўринли, Хизр эли маҳалласи ҳудудида жойлашган 46-сонли мактабга 300 ўринли, Жумур овул маҳалласи ҳудудида жойлашган 48-сонли мактабга 240 ўринли қўшимча бинолар ҳамда мазкур мактабга 12га 24 метр ўлчамли спорт зали, бундан ташқари Қорамон маҳалласи ҳудудига давлат инвестиция дастури асосида 150 ўринли мактабгача таълим ташкилоти биноси, Қангли овулида жойлашган 49-сонли мактабгача таълим ташкилотига эса 90 ўринга мўлжалланган янги бино қурилиши ишлари сифатли тарзда якунига етказилган.

Кун тартибидаги навбатдаги масала – “Саховат ва кўмак” жамғармаси ҳисобидан маблағларни қайта тақсимлаш масаласи юзасидан “Инсон” ижтимоий хизматлар маркази туман бўлими директори Ғуломжон Дуйсенбаев сўзга чиқиб, маҳаллаларнинг ижтимоий-иқтисодий ҳолатидан келиб чиқиб, жамғарма маблағларини маҳаллалар ўртасида қайта тақсимлаш тўғрисидаги таклиф киритди ва таклиф депутатлар томонидан маъқулланди.

Сессия кун тартибидаги барча масалалар атрофлича муҳокама қилинди, ҳисоботлар ва олдинда турган вазифалар бўйича режалар таҳлил қилинди. Кун тартибидаги масалалар юзасидан депутатларнинг фикр-мулоҳазалари, таклифлари тингланди ҳамда тегишли қарорлар қабул қилинди. Шунинг билан халқ депутатлари Амударё туман Кенгашининг навбатдаги олтинчи сессияси ўз ишини якунлади.

Чарос Арслонова, туман ҳокимлигининг Ахборот хизмати раҳбари.