Юрт ободлиги ва фаровонлиги йўлидаги асосий вазифалар белгилаб олинди
Баҳор кириб келиши билан бутун табиат уйғонди. Қишнинг изғиринли кунлари якунланиб, она заминимизда янгиланиш, яшариш бошланди. Табиатнинг бизга берган неъматларидан унумли фойдаланиш, юртимиз ободлигига ҳисса қўшиш ҳар биримизнинг инсоний бурчимиздир!
10 март куни Амударё туманидаги марказий ўйингоҳда юрт ободлиги ва халқ фаровонлигини таъминлаш борасидаги асосий вазифаларга бағишланган йиғилиш ўтказилди. Йиғилишда туман ҳокими Собир Хўжаметов, республика ва тумандан бириктирилган вакиллар ва масъул раҳбарлар, ҳоким ўринбосарлари, фермерлар, корхона-ташкилотлар раҳбарлари, “Маҳалла еттиликлари” масъуллари иштирок қилдилар.
Йиғилишда Ўзбекистон Республикаси Президенти Администрациясининг 2025 йил 3 мартдаги топшириғига мувофиқ туманда Наврўз умумхалқ байрамига тайёргарлик кўриш, туман маркази ва қишлоқ аҳоли пунктларини ободонлаштириш ҳамда кўкаламзорлаштириш, фермер хўжаликлари экин майдонларини мавсумга тайёрлаш, канал ва ариқларни бетонлаштириш, шунингдек, янги тизим асосида аҳолининг томорқа ерларидан самарали фойдаланиши борасида жойларда амалга оширилаётган ишларни ўрганиш ва аҳолига амалий ёрдам кўрсатиш бўйича ҳудудларида бажарилиши лозим ишлар юзасидан асосий вазифалар белгилаб олинди ва тегишли топшириқлар берилди.
Йиғилишда туман ҳокими Собир Хўжаметов сўзга чиқиб, давлатимиз раҳбари ташаббуси билан бутун юртимизда, шу жумладан Амударё туманида амалга оширилаётган бунёдкорлик, ободонлаштириш ишларида аҳолининг дахлдорлик ҳиссини шакллантириш, ушбу хайрли амалларга жавоб тариқасида аҳоли турар жойларини ободонлаштириш ва кўкаламзорлаштириш, хонадонларда тозалик ишларини ташкил этиш, томорқалардан унумли фойдаланиб, ҳар қарич ерга экин экиш лозимлиги хусусида сўз юритди.
Шунингдек, туман ҳокими ўз сўзида Наврўз умумхалқ байрамига муносиб тайёргарлик кўриш ҳамда байрам тантаналарини аввалги йилдагиларга ўхшамаган, ўзгача тарзда ташкил этиш, халқимиз орасида миллий қадриятларимизга хос бўлган ўзаро меҳр-оқибат ва ҳамжиҳатликни янада кучайтириш, байрам арафасида беғараз ёрдам, меҳр-мурувват каби эзгу фазилатларни юксалтириш юзасидан тегишли тавсия ва кўрсатмалар берди.
Йиғилиш мобайнида туманни комплекс ривожлантириш бўйича республикадан бириктирилган вакил – Қорақалпоғистон Республикаси Жўқорғи Кенгесининг Саноат, қурилиш, транспорт ва алоқа масалалари қўмитаси раиси Ислам Сдиков сўзга чиқиб, бугунги кунда туманни ҳар томонлама ижтимоий-иқтисодий ривожлантириш бўйича кенг қамровли ишлар амалга оширилаётгани, буларнинг барчаси муҳтарам Президентимизнинг халқ фаровонлиги йўлидаги ислоҳотларининг самарали натижаси эканлигини алоҳида таъкидлади ва ҳамжиҳатликда ислоҳотлар ижроси борасидаги ишларни янада жадаллаштириш лозимлигини такидлаб, бу борада тегишли тавсия ва кўрсатмалар берди.
Масъул вакил ўз сўзида туманни ҳар томонлама комплекс ривожлантириш борасидаги ишларда ҳар бир раҳбар зиммасига юклатилган ишларни ўз вақтида, самарали амалга ошириши лозимлигини таъкидлаб, натижадорликка эришишда ҳар доим амалий ёрдамга тайёр эканлигини билдирди.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
