Халқ депутатлари Амударё тумани Кенгашининг 7-сессияси тўғрисида ахборот

20 март куни Амударё тумани ҳокимлигининг мажлислар залида Халқ депутатлари туман кенгашининг навбатдаги 7-сессияси бўлиб ўтди.

Сессия мажлисида депутатлар, туман ҳокими ўринбосарлари, ташкилотлар раҳбарлари, маҳалла фуқаролар йиғинлари раислари ва ОАВ вакиллари иштирок этдилар.

Сессияни Халқ депутатлари туман Кенгаши Раиси, туман ҳокими Собир Хўжаметов очди ҳамда олиб борди. Сессия котиблигига 7-Арна бўйи сайлов округидан депутат Улуғбек Абдурахманов сайланди.

Сессия кун тартибидаги дастлабки масала юзасидан туман ҳокимининг биринчи ўринбосари Фахриддин Юсупов ҳисобот берди. Ҳисоботда Ўзбекистон Республикасининг “Маҳаллий давлат ҳокимияти тўғрисида”ги Қонунига асосан халқ депутатлари Кенгашлари бюджет маълумотларининг очиқлиги ва ошкорлигини янада ошириш, бюджет маблағларининг шаклланиши ва сарфланиши устидан халқ депутатлари Кенгаши ҳамда жамоатчилик назоратини кучайтириш назарда тутилганлиги таъкидланди. Депутатлар Қорақалпоғистон Республикаси бюджетининг 2025 йил 1 январь ҳолатига аниқланган эркин қолдиқ маблағлари ҳисобидан туман Ободонлаштириш бошқармасига маблағлар ажратиш тўғрисидаги масалани бир овоздан маъқулладилар.

Сессия кун тартибидаги навбатдаги масала юзасидан туман Қишлоқ хўжалиги бўлими бошлиғи Қудрат Абдухаликов ҳисобот берди. Ҳисоботда 2025 йил биринчи чорагида туманда қишлоқ хўжалиги соҳасида амалга оширилган ишлар хусусида сўз юритилди. Туман ҳудудида суғориладиган экин ерлари 32 минг 497 гектар, бўз ерлар 38 гектар, боғлар 450 гектар, узумзорлар 39 гектар, тутзорлар 887 гектар, жами суғориладиган қишлоқ хўжалик ерлари 32 917 гектарни ташкил қилади. Туман ҳудудида ҳозирги кунда 45 минг 740 гектар майдонда жами 613 фермер ва қишлоқ хўжалик корхоналари фаолият кўрсатмоқда. Шунингдек, 2025 йил пахта ҳосили учун 352 нафар фермер хўжаликларда 13 минг гектар чигит экилиши режалаштирилган. 4 минг 800 гектар экин майдонларига эса ғалла экилган. Ҳисоботда экин ерларидан самарали фойдаланиш бўйича кўрилаётган чоралар ҳақида маълумотлар берилди.

Сессия кун тартибидаги навбатдаги – туманда Экология ва атроф-муҳитни муҳофаза қилиш соҳасида 2024 йил давомида амалга оширилган ишлар юзасидан туман Экология, атроф-муҳитни муҳофаза қилиш ва иқлим ўзгариши бўлимининг давлат инспектори Ғайрат Искандаров ҳисобот берди.

Қайд этилишича, туман Экология бўлимида 2024 йил мобайнида жами 140 та ҳуқуқбузарликлар ҳолатлари аниқланиб, 280 млндан ортиқ миқдорда жарима ҳамда 157 млн сўм миқдорда зарар ҳисобланиб, тўлиқ равишда айбдорлардан давлат ҳисобига ундирилган.

Сессияда Ўзбекистон Халқ демократик партиясининг халқ депутатлари Амударё туман кенгашидаги депутатлик гуруҳи аъзоси, депутат Отабек Йўлдошов Ўзбекистон Республикаси Президентининг 2024 йил 23 сентябрдаги 143-сонли Фармони ва 2024 йил 23 сентябрь кунги “Камбағалликдан фаровонлик сари” дастурини амалга ошириш бўйича биринчи навбатдаги чора-тадбирлар тўғрисида”ги 330-сонли қарорининг Амударё туманидаги ижросини депутатлик назорати сифатида ўрганишлар якуни бўйича ахборот берди.

Ахборотда таъкидланишича, дастур ижросини таъминлаш бўйича 2025 йилда бажариладиган устувор вазифалар белгилаб олинган бўлиб, 5 бўлим ва 8 банддан иборат чора-тадбирлар режаси ишлаб чиқилган. Ижро муддати ва масъуллар белгиланган ҳолда тегишли ишлар амалга оширилган.

Сессия мажлисида Экопартия аъзоси, депутат Гулбаҳор Раимова давлатимиз раҳбари ташаббуси билан бутун мамлакатимиз бўйлаб амалга оширилаётган “Яшил макон” умуммиллий лойиҳасига муносиб ҳисса қўшиш мақсадида “Депутатлар боғи” яратиш бўйича таклиф берди ва ушбу таклиф Кенгаш томонидан қўллаб-қувватланди.

Кун тартибидаги сўнгги масала – 2025 йилда аҳолига сифатли тиббий хизмат кўрсатилишини таъминлаш ва такомиллаштириш бўйича амалга оширилган ишлар юзасидан туман Тиббиёт бирлашмаси бошлиғининг ўринбосари Ҳакимжон Собиров ҳисобот берди.

Ҳисоботда қайд қилинганидек, туманда Давлат тиббий суғурта механизмларини жорий қилишга тайёргарлик ишлари мониторинги ўтказилиб, аҳолига кўрсатилаётган бирламчи тиббий-санитария ёрдами сифат ва самарадорлигини ошириш, аҳолининг эҳтиёжманд қатламига маҳаллабай, манзилли ва мақсадли тарзда юқори малакали тиббий хизмат кўрсатиш мақсадида тумандаги тиббий муассасаларни тиббий асбоб-ускуна ва жиҳозлар, компьютер техникаси ва бошқа техник воситалар ҳамда локал тармоқ билан таъминлаш ишлари якунланмоқда.

Сессия кун тартибига киритилган барча масалалар атрофлича кўриб чиқилиб, фикр-мулоҳазалар тингланди ва фаол муҳокамалардан кейин тегишли қарорлар қабул қилинди.

Шу билан сессия ўз ишини якунлади.

Чарос Арслонова, туман ҳокимлигининг Ахборот хизмати раҳбари.