ФВВнинг Махсус муҳандислик-қурилиш бошқармаси муддатли ҳарбий хизматчиларига тавсияномалар топширилди

Маълумки, ҳар йили Ўзбекистон Республикаси Мудофаа вазирлиги, Ички ишлар вазирлиги, Фавқулодда вазиятлар вазирлиги, Давлат хавфсизлик хизмати ва Миллий гвардиясининг қўшма қарори билан тасдиқланган “Муддатли ҳарбий хизматни ўтаётган ҳарбий хизматчиларга Ўзбекистон Республикаси олий таълим муассасаларига ўқишга кириш учун тавсияномалар бериш тартиби тўғрисида”ги Низом асосида ҳарбий хизматчиларга тегишли тартибда тавсияномалар топширилади. Фавқулодда вазиятлар вазирлигининг Махсус муҳандислик-қурилиш бошқармасида муддатли ҳарбий хизматни ўтаб, юқори натижаларга эришган аскарларга ҳам қўмондонликнинг шу каби тавсияномалари Амударё туманида тантанали равишда топширилди.

Маросимда Муҳандислик муҳофаза ва қурилиш-тиклаш ишлари бош бошқармаси бошлиғи полковник Нурмухаммад Саидов, Амударё туман хокими Собир Хўжаметов, туман ҳокими ўринбосари Нодирбек Камолов, туман Ички ишлар бўлими бошлиғи подполковник Мухаметали Хожамуратов, Миллий Гвардиянинг туман бўлими бошлиғи подполковник Бахтиёр Атажанов, туман Мудофаа бўлими бошлиғи Шуҳрат Маматов, Афғон уруши фахрийлари ҳамда аскарлар ва уларнинг ота-оналари иштирок этдилар.

Тадбир аввалида Ўзбекистон ҳамда Қорақалпоғистон Республикалари давлат мадҳиялари янгради.

Муҳандислик муҳофаза ва қурилиш-тиклаш ишлари бош бошқармаси бошлиғи полковник Нурмухаммад Саидов тақдирлаш маросимини кириш сўзи билан очиб берди.

Тадбирда туман ҳокими Собир Хўжаметов сўзга чиқиб, олий таълим муассасаларига ўқишга кириш учун тавсияномалар олаётган барча аскарларни табриклади. Тадбирда сўзга чиққанлар бундай имкониятлар ёшлар келажаги учун пойдевор бўлиши, уларнинг ҳаётда ўз ўрнини топишларига кўмак бериши хусусида сўз юритдилар.

Таъкидланганидек, тавсияномалар Ўзбекистон Республикаси Қуролли Кучлари сафида муддатли ҳарбий хизматни ўтаб бўлган, жанговар ва маънавий-маърифий тайёргарлик бўйича юксак натижаларга эришган, зарурий билим савиясига эга, намунали ҳарбий интизомини намоён этган энг муносиб ҳарбий хизматчиларга ҳарбий қисм командири томонидан берилади. Ўзбекистон Республикаси Қуролли Кучлари сафида муддатли ҳарбий хизматни ўтаб бўлган фуқароларга ҳарбий қисмлар қўмондонлиги томонидан олий таълим муассасаларига кириш учун берилган тавсияномалар, улар берилган санадан бошлаб уч йил мобайнида амал қилади.

Маросим давомида Махсус муҳандислик-қурилиш бошқармаси бошлиғининг 2025 йил 7 мартдаги буйруғига асосан олий таълим муассасаларига ўқишга киришлари учун имтиёзли тавсияномаларга лойиқ деб топилган аскарлар тақдирланди. Хизмат мобайнида ўзининг тартиб-интизоми, хулқ-атвори, масъулиятини намойиш этган, намуна кўрсатган аскарларга тавсияномалар тантанали равишда топширилди.

Қайд этиш жоизки, Қорақалпоғистон Республикасининг маҳаллаларида “Обод хонадон”, “Обод кўча”, “Обод маҳалла”, “Яшил белбоғ” ҳамда ички йўлларни таъмирлаш мезонларини бажариш, маҳаллалар инфратузилмасини яхшилаш, аҳоли учун муносиб турмуш шароитларини яратиш борасида амалга ошириладиган ишларни самарали ташкил этиш мақсадида Фавқулодда вазиятлар вазирлиги Махсус муҳандислик-қурилиш бошқармаси 1-муҳандислик қурилиш батальонининг 220 нафар шахсий таркиби Амударё туманига жалб этилган эди. Улар туманда ободонлаштириш ва кўкаламзорлаштириш ишларига муносиб ҳисса қўшдилар. Тадбир мобайнида аскарлар ва уларнинг ота-оналари сўзга чиқиб, берилаётган имкониятлар учун миннатдорчилик билдирди.

Шунингдек, тақдирлаш маросими туман Маданият бўлими ижодкорлари томонидан тайёрланган концерт дастури намойиш этилди. Хонандалар Ватан, тинчлик ва дўстлик ҳақида куй-қўшиқлар ижро қилишди. Тадбир раққосаларнинг бетакрор рақслари билан байрамона кайфиятда ўтди.

Чарос Арслонова, туман ҳокимлигининг Ахборот хизмати раҳбари.