FVVning Maxsus muhandislik-qurilish boshqarmasi muddatli harbiy xizmatchilariga tavsiyanomalar topshirildi

Maʼlumki, har yili Oʻzbekiston Respublikasi Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati va Milliy gvardiyasining qoʻshma qarori bilan tasdiqlangan “Muddatli harbiy xizmatni oʻtayotgan harbiy xizmatchilarga Oʻzbekiston Respublikasi oliy taʼlim muassasalariga oʻqishga kirish uchun tavsiyanomalar berish tartibi toʻgʻrisida”gi Nizom asosida harbiy xizmatchilarga tegishli tartibda tavsiyanomalar topshiriladi. Favqulodda vaziyatlar vazirligining Maxsus muhandislik-qurilish boshqarmasida muddatli harbiy xizmatni oʻtab, yuqori natijalarga erishgan askarlarga ham qoʻmondonlikning shu kabi tavsiyanomalari Amudaryo tumanida tantanali ravishda topshirildi.

Marosimda Muhandislik muhofaza va qurilish-tiklash ishlari bosh boshqarmasi boshligʻi polkovnik Nurmuxammad Saidov, Amudaryo tuman xokimi Sobir Xoʻjametov, tuman hokimi oʻrinbosari Nodirbek Kamolov, tuman Ichki ishlar boʻlimi boshligʻi podpolkovnik Muxametali Xojamuratov, Milliy Gvardiyaning tuman boʻlimi boshligʻi podpolkovnik Baxtiyor Atajanov, tuman Mudofaa boʻlimi boshligʻi Shuhrat Mamatov, Afgʻon urushi faxriylari hamda askarlar va ularning ota-onalari ishtirok etdilar.

Tadbir avvalida Oʻzbekiston hamda Qoraqalpogʻiston Respublikalari davlat madhiyalari yangradi.

Muhandislik muhofaza va qurilish-tiklash ishlari bosh boshqarmasi boshligʻi polkovnik Nurmuxammad Saidov taqdirlash marosimini kirish soʻzi bilan ochib berdi.

Tadbirda tuman hokimi Sobir Xoʻjametov soʻzga chiqib, oliy taʼlim muassasalariga oʻqishga kirish uchun tavsiyanomalar olayotgan barcha askarlarni tabrikladi. Tadbirda soʻzga chiqqanlar bunday imkoniyatlar yoshlar kelajagi uchun poydevor boʻlishi, ularning hayotda oʻz oʻrnini topishlariga koʻmak berishi xususida soʻz yuritdilar.

Taʼkidlanganidek, tavsiyanomalar Oʻzbekiston Respublikasi Qurolli Kuchlari safida muddatli harbiy xizmatni oʻtab boʻlgan, jangovar va maʼnaviy-maʼrifiy tayyorgarlik boʻyicha yuksak natijalarga erishgan, zaruriy bilim saviyasiga ega, namunali harbiy intizomini namoyon etgan eng munosib harbiy xizmatchilarga harbiy qism komandiri tomonidan beriladi. Oʻzbekiston Respublikasi Qurolli Kuchlari safida muddatli harbiy xizmatni oʻtab boʻlgan fuqarolarga harbiy qismlar qoʻmondonligi tomonidan oliy taʼlim muassasalariga kirish uchun berilgan tavsiyanomalar, ular berilgan sanadan boshlab uch yil mobaynida amal qiladi.

Marosim davomida Maxsus muhandislik-qurilish boshqarmasi boshligʻining 2025-yil 7-martdagi buyrugʻiga asosan oliy taʼlim muassasalariga oʻqishga kirishlari uchun imtiyozli tavsiyanomalarga loyiq deb topilgan askarlar taqdirlandi. Xizmat mobaynida oʻzining tartib-intizomi, xulq-atvori, masʼuliyatini namoyish etgan, namuna koʻrsatgan askarlarga tavsiyanomalar tantanali ravishda topshirildi.

Qayd etish joizki, Qoraqalpogʻiston Respublikasining mahallalarida “Obod xonadon”, “Obod koʻcha”, “Obod mahalla”, “Yashil belbogʻ” hamda ichki yoʻllarni taʼmirlash mezonlarini bajarish, mahallalar infratuzilmasini yaxshilash, aholi uchun munosib turmush sharoitlarini yaratish borasida amalga oshiriladigan ishlarni samarali tashkil etish maqsadida Favqulodda vaziyatlar vazirligi Maxsus muhandislik-qurilish boshqarmasi 1-muhandislik qurilish batalonining 220 nafar shaxsiy tarkibi Amudaryo tumaniga jalb etilgan edi. Ular tumanda obodonlashtirish va koʻkalamzorlashtirish ishlariga munosib hissa qoʻshdilar. Tadbir mobaynida askarlar va ularning ota-onalari soʻzga chiqib, berilayotgan imkoniyatlar uchun minnatdorchilik bildirdi.

Shuningdek, taqdirlash marosimi tuman Madaniyat boʻlimi ijodkorlari tomonidan tayyorlangan kontsert dasturi namoyish etildi. Xonandalar Vatan, tinchlik va doʻstlik haqida kuy-qoʻshiqlar ijro qilishdi. Tadbir raqqosalarning betakror raqslari bilan bayramona kayfiyatda oʻtdi.

Charos Arslonova, tuman hokimligining Axborot xizmati rahbari.