Мини футбол бўйича ДХХ кубоги мусобақаларининг туман босқичига старт берилди

Жамиятнинг ҳар томонлама ривожланиши учун ёш авлоднинг соғлом ва жисмонан баркамол бўлиб улғайиши муҳим аҳамият касб этади. Шу боисдан спорт ва жисмоний тарбияни кенг тарғиб қилиш, айниқса, ўсиб келаётган ёшларни ушбу соҳаларга жалб этиш долзарб масалага айланган. Зеро, ёшларни спорт ва жисмоний тарбияга жалб қилиш – соғлом жамият пойдеворидир.

Шу мақсадда айни кунларда бутун мамлакатимиз бўйлаб анъанавий “Давлат хавфсизлик хизмати кубоги” спорт мусобақаларининг ҳудудий босқичлари ўтказилмоқда.  

8 апрель куни Амударё туманидаги 40-сонли умумтаълим мактабининг сунъий қопламали спорт майдончасида бу йилги мазкур мусобақаларнинг туман босқичига старт берилди.

Очилиш маросимида туман ҳокими Собир Хўжаметов сўзга чиқиб, туманимиз ёшларининг ушбу беллашувларда иштирок этишга бўлган қизиқишлари тобора ортиб бораётгани, спорт мусобақаларининг ёш авлодни ҳар томонлама етук, баркамол қилиб тарбиялашдаги ўрни ва аҳамияти тўхталиб ўтди. Туман ҳокими ўз нутқида амударёлик ёшлар ушбу мусобақаларда республикада энг пешқадамлар сафида иштирок этиб келаётгани хусусида сўз юритиб, ёшларга бу йилги беллашувларда ҳам омад ва зафарлар тилади ҳамда уларнинг Ўзбекистон миқёсида чемпионликни қўлга киритишларига ишонч билдирди.

Шунингдек, тадбирда сўзга чиққан масъуллар ўсмир йигит-қизларимиз “Давлат хавфсизлик хизмати кубоги” мусобақаларида Қорақалпоғистон миқёсида чемпионликни қўлга киритиб, Ўзбекистон босқичида муносиб иштирок этиб келаётганини алоҳида эътироф этдилар.

Шундан кейин туманимиздаги 49 та овул ва маҳаллаларидан келган ўсмир йигит-қизлардан иборат жамоалар ўртасида спортнинг мини футбол тури бўйича “Давлат хавфсизлик хизмати кубоги” мусобақаларига старт берилиб, қизғин баҳслар бошлаб юборилди.

Илк учрашув Бештом ва Дарё бўйи маҳалласининг ўғил болалар жамоалари ўртасида бўлди. Ўсмир қизлар ўртасидаги илк баҳсда эса Холимбег ҳамда Оқ олтин овули жамолари ўзаро беллашдилар.

Таъкидлаш керакки, спорт саломатлик ва тарбиянинг асосидир. Спорт нафақат инсон саломатлигини мустаҳкамлашда, балки интизомли, сабрли ва мақсадга интилувчан шахсни шакллантиришда ҳам муҳим воситадир. Ёшлигидан спорт билан шуғулланган фарзанд жисмоний ва маънавий баркамол бўлиб вояга етади. Спорт ёшларга ўз вақтини тўғри тақсимлашга, зарарли одатлардан йироқ бўлишга ва ҳаётда фаол позицияни эгаллашга ёрдам беради.

Мамлакатимизда ёшларни спортга фаол жалб қилиш мақсадида таълим муассасаларида спорт тўгараклари ташкил қилиниб, муассасаларнинг инфратузилмаси ривожлантирилмоқда. Футбол, волейбол, кураш, сузиш каби тўгаракларда минглаб ёшлар бўш вақтларини мазмунли ўтказиб, спортга ошно бўлмоқда.

Бу борада турли мусобақаларнинг, шу жумладан маҳаллаларда мунтазам ўтказилаётган спорт мусобақаларининг аҳамияти ҳам катта бўлмоқда. Бу орқали ёшлар ўз иқтидорини намоён этиб, бир-бири билан рақобатда янада фаол бўлишга, соғлом турмуш тарзига амал қилишга одатланмоқда.

Айтиш жоизки, ёшларни спорт ва жисмоний тарбияга жалб қилиш нафақат уларнинг соғлиғи, балки жамият келажаги учун ҳам сармоядир. Зеро, соғлом ёшлар – кучли давлатнинг таянчидир. Давлат хавфсизлик хизмати кубоги учун мини футбол бўйича ўтказилаётган мусобақалар ҳам айнан ана шу мақсадларга хизмат қилади.

Чарос Арслонова, туман ҳокимлигининг Ахборот хизмати раҳбари.