Томорқа барқарор даромад манбаига айланмоқда

Бугунги кунда мамлакатимизда аҳоли бандлигини таъминлаш, турмуш даражасини ошириш ва барқарор иқтисодий ўсишга эришиш давлат сиёсатининг устувор йўналишларидан бирига айланган. Амалга оширилаётган ислоҳотлар, аввало, янги иш ўринлари яратиш ва халқ фаровонлигини таъминлашга қаратилган. Аҳоли бандлигини таъминлаш ва оилалар даромадларини оширишда, айниқса, маҳаллаларда томорқа ва деҳқон хўжаликларини ривожлантиришга алоҳида эътибор бериляпти.

Президентимизнинг 2024 йил 5 март куни қабул қилинган “Аҳоли хонадонларида саноат усулида маҳсулот ишлаб чиқаришни қўллаб-қувватлаш ҳамда томорқа ва деҳқон хўжаликларида янги захираларни ишга солишга доир чора-тадбирлар тўғрисида”ги Қарори мазкур йўналишдаги муҳим ҳуқуқий асос бўлиб хизмат қилмоқда. Ҳужжат асосида мамлакатимизнинг барча ҳудудларида кенг кўламли ишлар амалга оширилмоқда.

Амударё туманининг Оқ олтин овул фуқаролар йиғини раиси Алишер Шамшатов бошчилигидаги “Маҳалла еттилиги” аъзолари аҳоли томорқаларидан самарали фойдаланишни мунтазам равишда тарғиб қилиб келмоқда. Жамоа олдидаги асосий мақсад – ишсизликни камайтириш ва аҳоли турмуш даражасини яхшилашдир. Овулдаги меҳнатсевар инсонлар ҳар бир кунни ғанимат билиб, меҳнатни ҳаёт мазмунига айлантиришган.

Шундай бободеҳқонлардан бири — нуроний Янгибой Қурбониёзовдир. “Ўзбекистон темир йўллари” тизимида узоқ йиллар самарали меҳнат қилган бу инсон ҳозирда ўз томорқаси имкониятларидан тўлиқ фойдаланиб, оиласи билан фаровон ҳаёт кечирмоқда. Хонадонидаги 4 сотихли иссиқхонада хориж навидаги картошка етиштирилмоқда. Томорқачи яқин кунларда ҳосилни йиғиб, сабзи экишни режалаштирмоқда.

Бундан ташқари, 1 сотих майдонда кўчатхона ташкил этилган бўлиб, унда гуллар, помидор, карам ва бошқа полиз маҳсулотлари парвариш қилинади. Иссиқхонадан ташқари яна 4 сотих ерда карам ва бақлажон етиштирилаётгани ерга берилган меҳр ва ҳалол меҳнат самараси сифатида ҳар йили 2-3 марта томорқадан барқарор даромад келтирмоқда. Етиштирилган маҳсулотлар маҳаллий бозорларда харидорсиз қолмайди.

Янгибой Қурбониёзов хонадонида чорвачилик ҳам йўлга қўйилган бўлиб, экин-текин, мевали дарахтлар, гуллар ва чорвачилик уйғунлигида амалга оширилаётган меҳнат ўз баракасини бермоқда.

Оқ олтин овулидаги яна бир ибратли оила – Баҳром Ўразимбетов хонадони. Оила 20 сотихдан ортиқ ерда полиз экинлари парвариш қилиб, барқарор даромад манбаига эга бўлишяпти. Оила раҳбари Баҳром Ўразимбетовга турмуш ўртоғи Гуласал Содиқова ва ўғли Акбар Саидмуродов кўмакчи бўлиб, хонадонда 2 сотихли иссиқхона ҳам ташкил этишган. Қиш ойларида бу ерда кўчатлар етиштирилиб, аҳоли ва доимий мижозлар томонидан харид қилинади. Ҳозирда иссиқхонада янги мавсум учун тайёргарлик ишлари олиб борилмоқда.

Бу оила ҳам чорвачилик билан шуғулланади. Бундан ташқари, ёшлар етакчисининг кўмагида Акбар Саидмуродовга 30 сотих ер ажратилиб, у ерда асосан қовун ва тарвуз етиштириш йўлга қўйилган. Бу каби ташаббуслар ёшлар бандлигини таъминлаш ва уларни ишбилармонликка ундашда муҳим омил бўлмоқда.

Маълумот ўрнида қайд этиш жоизки, туманда 49 та маҳалла, 39 минг 853 та хонадон мавжуд. Уларнинг 39 минг 477 тасида жами 5 минг 760,3 гектар томорқа ер майдони бор. Жорий йил баҳорида 2 минг 277,7 гектар ерга эртаги экинлар экилган. Жумладан, 1 минг 401 гектарга сабзавот, 338,2 гектарга полиз экинлари, 153,1 гектарга дуккакли экинлар, 173,7 гектарга озуқа, 33 гектарга мойли экинлар ва 178,6 гектарга бошқа турдаги экинлар экилган.

Тумандаги 5613 нафар ишсиз фуқарога 2 минг 41 гектарга яқин ер майдони ижарага берилиб, улар томонидан сабзавот, полиз, озуқа ва бошқа экинлар парвариш қилинмоқда. Шунингдек, туманда умумий майдони салкам 31 гектар бўлган иссиқхоналар фаолият юритиб, уларнинг 7,8 гектарида помидор, 6,5 гектарида бодринг, 4,1 гектарида кўкатлар, 7 гектарида сабзавот ва 5,8 гектарида бошқа турдаги маҳсулотлар етиштирилмоқда.

Давлат раҳбари бошчилигида амалга оширилаётган ислоҳотлар туфайли, бугун томорқа нафақат озиқ-овқат манбаи, балки фаровон ҳаёт, тўкинлик ва барқарор даромад кафолатига айланмоқда. Оқ олтин овулидаги меҳнаткаш инсонлар ҳаёти шундан далолат берадики, агар ҳар бир хонадон ўз томорқасидан унумли фойдаланса, бу нафақат оила, балки бутун маҳалланинг, пировардида бутун мамлакатнинг ижтимоий-иқтисодий тараққиётига хизмат қилади.

Шоҳзод Қурбонбоев.