Ҳар бир синфда билим ва илҳом нафаси
Аниқ мақсад, юқори шижоат ва илҳомбахш муҳит – Амударё тумани ихтисослаштирилган мактабида ташкил этилган “Очиқ эшиклар куни” тадбири бу ерда ўқиш ниятидаги талабгор-иштирокчилар қалбида ана шундай илиқ таассуротларни қолдирди. Мактабдаги таълим сифати, ўқувчиларнинг зукколиги ҳамда замонавий билимларга бўлган интилишини тадбир давомида ҳис этиш қийин эмас эди. Тақдимотчи-ўқувчиларнинг ишончли, равон ва мазмунли чиқишлари мактабда амалга оширилаётган таълим-тарбия ишларининг самарадорлигини ёрқин намоён этди. Меҳмонлар мактабда яратилган замонавий шарт-шароитлар билан танишиш баробарида, бу даргоҳда камол топаётган ёш авлоднинг юқори салоҳиятига ҳам гувоҳ бўлишди.
“Очиқ эшиклар куни” доирасида таълим-тарбия жараёни, ўқувчиларнинг билим даражаси, истеъдод ва қобилияти, педагогларнинг фаолияти кенг жамоатчиликка намоён этилди.
Тадбирда талабгор ўқувчилар, уларнинг ота-оналари, мактаблардан психологлар иштирок этди. Меҳмонлар учун ҳар бир фанга мўлжалланган махсус ўқув синфхоналари, фан-лаборатория хоналари, замонавий компьютер синфхоналари, бир сўз билан айтганда, мактабда яратилган барча шароитлар намойиш этилди. Меҳмонлар дарс машғулотлари, тўгараклар фаолияти ва ижодий ишлар билан яқиндан танишишди. Айниқса, тадбирнинг ўқувчилар томонидан эркин тарзда зукколик билан олиб борилиши бу ердаги таълим муҳити даражасини яққол кўрсатиб берди.
Жумладан, кимё ва биология фанлари учун мўлжалланган, замонавий ускуналар билан жиҳозланган лаборатория хоналарида юқори синф ўқувчилари иштирокида очиқ дарс машғулотлари ташкил этилди. Дарслар давомида ўқувчилар назарий билимлари ва амалий кўникмаларини намоён этишди. Улар турли тажриба ва кузатувлар орқали табиат қонунларини тадқиқ этиш, илмий ёндашув асосида хулосалар чиқариш қобилиятига эга эканликларини намойиш қилишди. Бу эса ўқувчиларнинг фақат назарий эмас, амалий билимларга ҳам эга эканлигини кўрсатди.
Бундан ташқари, тадбир доирасида ўқувчилар сунъий интеллект, ахборот технологиялари ва робототехника йўналишларида ҳам билим ва кўникмаларини намоён этишди. Улар томонидан тайёрланган дастурий моделлар, турли сенсорли қурилмалар ва робототехник жиҳозлар намойиш қилинди. Бу эса ўқувчиларнинг рақамли технологияларга бўлган қизиқишини, инновацион фикрлаш ва илмий ижодкорлик салоҳиятини яққол кўрсатди.
Шунингдек, чақирувга қадар бошланғич тайёргарлик фанига ихтисослаштирилган синфхоналардаги моддий-техник база ҳам меҳмонларда катта таассурот қолдирди. Ушбу синфларда ҳарбий қурол-аслаҳалар, ҳимоя воситалари ва ўқув қўлланмалари намойиш этилди. Тадбир иштирокчилари ушбу жиҳозлар билан бевосита танишиш, уларнинг тузилиши ва қўлланилиши ҳақида амалий маълумотларга эга бўлишди. Бу эса ёшларда Ватанга садоқат, масъулият ва ҳарбий-маънавий тарбияга бўлган қизиқишни оширишга хизмат қилди.
Бундай тадбирлар мактаб фаолиятидаги шаффофликни таъминлашда муҳим аҳамиятга эга. Ота-оналар муассасанинг кундалик ҳаётини ўз кўзлари билан кўриб, ишонч ва ҳамкорликни янада мустаҳкамлаш имконига эга бўладилар. Шу билан бирга, мактаб жамоаси учун ҳам бундай очиқ мулоқот мотивация манбаи бўлиб хизмат қилади — улар ўз ишларини холис баҳолаш ва келгусидаги фаолиятни янада такомиллаштириш имкониятига эга бўладилар.
Тадбир давомида билдирилган таклиф ва мулоҳазалар келгусида таълим сифатига ижобий таъсир кўрсатиши шубҳасиз. “Очиқ эшиклар куни” мактабнинг жамоатчилик олдидаги нуфузини ошириш, ёшларга янги имкониятлар эшигини очиш ва иқтидорли ўқувчиларни қўллаб-қувватлаш борасида муҳим восита бўлди. Бу нафақат тарғибот, балки муассасанинг янада ривожланишига хизмат қилувчи амалий натижаларни ҳам бериши билан аҳамиятлидир.
Бундай тадбирлар орқали мактаб жамоаси, ўқувчилар ва ота-оналар ўртасида самарали мулоқот, ҳамкорлик ва ўзаро ишонч мустаҳкамланиши таълим сифатини янги босқичга кўтариши шубҳасиз.
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
