Har bir sinfda bilim va ilhom nafasi

Aniq maqsad, yuqori shijoat va ilhombaxsh muhit – Amudaryo tumani ixtisoslashtirilgan maktabida tashkil etilgan “Ochiq eshiklar kuni” tadbiri bu yerda oʻqish niyatidagi talabgor-ishtirokchilar qalbida ana shunday iliq taassurotlarni qoldirdi. Maktabdagi taʼlim sifati, oʻquvchilarning zukkoligi hamda zamonaviy bilimlarga boʻlgan intilishini tadbir davomida his etish qiyin emas edi. Taqdimotchi-oʻquvchilarning ishonchli, ravon va mazmunli chiqishlari maktabda amalga oshirilayotgan taʼlim-tarbiya ishlarining samaradorligini yorqin namoyon etdi. Mehmonlar maktabda yaratilgan zamonaviy shart-sharoitlar bilan tanishish barobarida, bu dargohda kamol topayotgan yosh avlodning yuqori salohiyatiga ham guvoh boʻlishdi.

“Ochiq eshiklar kuni” doirasida taʼlim-tarbiya jarayoni, oʻquvchilarning bilim darajasi, isteʼdod va qobiliyati, pedagoglarning faoliyati keng jamoatchilikka namoyon etildi.

Tadbirda talabgor oʻquvchilar, ularning ota-onalari, maktablardan psixologlar ishtirok etdi. Mehmonlar uchun har bir fanga moʻljallangan maxsus oʻquv sinfxonalari, fan-laboratoriya xonalari, zamonaviy kompyuter sinfxonalari, bir soʻz bilan aytganda, maktabda yaratilgan barcha sharoitlar namoyish etildi. Mehmonlar dars mashgʻulotlari, toʻgaraklar faoliyati va ijodiy ishlar bilan yaqindan tanishishdi. Ayniqsa, tadbirning oʻquvchilar tomonidan erkin tarzda zukkolik bilan olib borilishi bu yerdagi taʼlim muhiti darajasini yaqqol koʻrsatib berdi.

Jumladan, kimyo va biologiya fanlari uchun moʻljallangan, zamonaviy uskunalar bilan jihozlangan laboratoriya xonalarida yuqori sinf oʻquvchilari ishtirokida ochiq dars mashgʻulotlari tashkil etildi. Darslar davomida oʻquvchilar nazariy bilimlari va amaliy koʻnikmalarini namoyon etishdi. Ular turli tajriba va kuzatuvlar orqali tabiat qonunlarini tadqiq etish, ilmiy yondashuv asosida xulosalar chiqarish qobiliyatiga ega ekanliklarini namoyish qilishdi. Bu esa oʻquvchilarning faqat nazariy emas, amaliy bilimlarga ham ega ekanligini koʻrsatdi.

Bundan tashqari, tadbir doirasida oʻquvchilar sunʼiy intellekt, axborot texnologiyalari va robototexnika yoʻnalishlarida ham bilim va koʻnikmalarini namoyon etishdi. Ular tomonidan tayyorlangan dasturiy modellar, turli sensorli qurilmalar va robototexnik jihozlar namoyish qilindi. Bu esa oʻquvchilarning raqamli texnologiyalarga boʻlgan qiziqishini, innovatsion fikrlash va ilmiy ijodkorlik salohiyatini yaqqol koʻrsatdi.

Shuningdek, chaqiruvga qadar boshlangʻich tayyorgarlik faniga ixtisoslashtirilgan sinfxonalardagi moddiy-texnik baza ham mehmonlarda katta taassurot qoldirdi. Ushbu sinflarda harbiy qurol-aslahalar, himoya vositalari va oʻquv qoʻllanmalari namoyish etildi. Tadbir ishtirokchilari ushbu jihozlar bilan bevosita tanishish, ularning tuzilishi va qoʻllanilishi haqida amaliy maʼlumotlarga ega boʻlishdi. Bu esa yoshlarda Vatanga sadoqat, masʼuliyat va harbiy-maʼnaviy tarbiyaga boʻlgan qiziqishni oshirishga xizmat qildi.

Bunday tadbirlar maktab faoliyatidagi shaffoflikni taʼminlashda muhim ahamiyatga ega. Ota-onalar muassasaning kundalik hayotini oʻz koʻzlari bilan koʻrib, ishonch va hamkorlikni yanada mustahkamlash imkoniga ega boʻladilar. Shu bilan birga, maktab jamoasi uchun ham bunday ochiq muloqot motivatsiya manbai boʻlib xizmat qiladi — ular oʻz ishlarini xolis baholash va kelgusidagi faoliyatni yanada takomillashtirish imkoniyatiga ega boʻladilar.

Tadbir davomida bildirilgan taklif va mulohazalar kelgusida taʼlim sifatiga ijobiy taʼsir koʻrsatishi shubhasiz. “Ochiq eshiklar kuni” maktabning jamoatchilik oldidagi nufuzini oshirish, yoshlarga yangi imkoniyatlar eshigini ochish va iqtidorli oʻquvchilarni qoʻllab-quvvatlash borasida muhim vosita boʻldi. Bu nafaqat targʻibot, balki muassasaning yanada rivojlanishiga xizmat qiluvchi amaliy natijalarni ham berishi bilan ahamiyatlidir.

Bunday tadbirlar orqali maktab jamoasi, oʻquvchilar va ota-onalar oʻrtasida samarali muloqot, hamkorlik va oʻzaro ishonch mustahkamlanishi taʼlim sifatini yangi bosqichga koʻtarishi shubhasiz.

Shohzod Qurbonboyev.