Ёшлар етакчилари орқали давлат эътибори ҳар бир ёшга етиб бормоқда

Юртимизда ёшларга оид давлат сиёсатини амалга ошириш, ҳар бир ёшнинг орзу-мақсадларини рўёбга чиқариш, уларнинг манфаатларини ҳимоя қилиш ҳамда мавжуд муаммоларини ҳал этишда маҳалла ва овулларда самарали фаолият юритаётган ёшлар етакчилари муҳим ўрин тутади. Президентимиз томонидан 2022 йил 19 январда қабул қилинган “Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида”ги Қарор асосида жорий этилган ёшлар етакчиси лавозими бугунги кунда давлат ва ёшлар ўртасидаги ишончли кўприкка айланди.

Ёшлар етакчиси — маҳалладаги ҳар бир ёш билан яқиндан ишлайдиган, уларнинг ҳаёт тарзи, муаммолари ва мақсадларини ўрганиб, тегишли ечимлар таклиф этадиган, ташаббускор ва масъулиятли шахс ҳисобланади. Хусусан, ишсиз, уюшмаган ҳамда эҳтиёжманд ёшларни аниқлаш ва улар билан индивидуал тарзда иш олиб боришда етакчиларнинг роли тобора мустаҳкамланиб бормоқда.

Амударё туманидаги Жумур овул маҳалласининг ёшлар етакчиси Зафар Отабоев 2022 йилдан буён ушбу масъулиятли вазифани сидқидилдан адо этиб келмоқда. Маҳаллада умумий аҳоли сони 4 минг 255 нафар бўлиб, 755 та хонадонда 1 минг 255 та оила истиқомат қилади. Уларнинг 1 минг 214 нафари ёшлардир. Аҳоли зич жойлашган ушбу ҳудудда 3 та мактабгача таълим ташкилоти, 10 та кичик савдо дўкони ва 1 та умумий овқатланиш шохобчаси фаолият юритмоқда.

Ёшлар етакчиси Зафар Отабоев томонидан 2024 йил давомида бир қатор амалий ишлар бажарилди. Хусусан, ишсиз ёшларнинг бандлигини таъминлаш мақсадида уларнинг рўйхати шакллантирилиб, 40 нафар ёшга ер ажратиб берилди. Уларнинг ўзини ўзи банд қилиши учун субсидия асосида мотокультиватор, тикув машиналари, пайвандлаш ускунаси ва ноутбуклар тақдим этилди. Шунингдек, маҳалладаги ёш тадбиркор Хушнуд Ўринбоевга имтиёзли кредит ажратилиб, автомашина ювиш шохобчасини ташкил этишда амалий кўмак берилди. Бу орқали маҳалладаги транспорт эгаларига қулайлик яратилди — энди улар машиналарини ювиш учун узоққа бормасдан маҳалланинг ўзида хизматдан фойдаланиш имконига эга бўлишди.

Қишлоқ хўжалигида ҳам ёшларнинг фаоллиги ортиб бормоқда. Хусусан, маҳаллада истиқомат қилувчи ёш оила — Сурайё Халиллаева ва турмуш ўртоғи Азизбек Болтабоевга ер ажратилиб, улар полиз маҳсулотлари — қовун, тарвуз, картошка ва сабзи етиштириш билан шуғулланмоқда. Бу орқали нафақат ўз оиласи даромадини оширди, балки иш билан банд бўлиш имконига ҳам эга бўлди. Аммо ёш оилани экинларни ўз вақтида суғориш масаласи ўйлантириб келмоқда. Бу муаммони бартараф этиш юзасидан “еттилик” аъзолари, жумладан, ёшлар етакчиси томонидан тегишли чоралар кўрилмоқда.

Маҳалладаги бошқа ташаббускор ёшлар ҳам ўз меҳнати билан тенгдошларига намуна бўлмоқда. 2022 йилдан буён тикувчилик билан шуғулланаётган Маҳфуза Ўразимбетовага субсидия асосида тикув машинаси ажратилган. Ҳозирда у олий таълим муассасасида таҳсил олмоқда, аммо ўқишдан бўш вақтларида буюртмаларни қабул қилиб, уларни сифатли тайёрлаб топширмоқда. Қолаверса, оиланинг келини Моҳигул Давлатбоева ҳам ушбу касбни пухта ўзлаштириб, оила даромадига муносиб ҳисса қўшиб келмоқда.

Ёшларнинг бўш вақтларини мазмунли ўтказиш мақсадида китобхонлик ва спорт тадбирлари мунтазам ўтказиб келинмоқда. Жорий йил бошида маҳалланинг ёшлар баланси шакллантирилди. Олий таълим муассасасида таҳсил олаётган 3 нафар ёшга тўлов-контракт суммасининг 30 фоизи қоплаб берилди. “Келажак касблари” лойиҳаси доирасида 3 нафар ёш касб-ҳунарга ўқитилди. Шунингдек, ҳоким ёрдамчиси билан ҳамкорликда 24 нафар ёшга имтиёзли кредитлар ажратилиб, улар тадбиркорлик фаолиятини бошлади.

Шунингдек, хатлов натижаларига таянилган ҳолда меҳнатга лаёқатли бўлган, аммо ишсиз 14 нафар ёш билан яккама-якка учрашувлар ўтказилиб, уларнинг қизиқишлари ва қобилиятига мос иш билан таъминланиш чоралари кўрилди.

Дарҳақиқат, маҳаллалардаги ёшлар етакчилари фаолияти орқали давлатнинг ёшларга бўлган эътибори ҳар бир хонадонгача етиб боряпти. Жумур овул маҳалласида ёшлар етакчиси Зафар Отабоевнинг саъй-ҳаракатлари маҳалланинг ижтимоий муҳитини мустаҳкамлаш, ёшлар ўртасида фаол фуқаролик позициясини шакллантириш, уларнинг таълим, тадбиркорлик ва бандликдаги иштирокига кенг йўл очишга хизмат қилмоқда.

Шоҳзод Қурбонбоев.