Yoshlar yetakchilari orqali davlat eʼtibori har bir yoshga yetib bormoqda

Yurtimizda yoshlarga oid davlat siyosatini amalga oshirish, har bir yoshning orzu-maqsadlarini roʻyobga chiqarish, ularning manfaatlarini himoya qilish hamda mavjud muammolarini hal etishda mahalla va ovullarda samarali faoliyat yuritayotgan yoshlar yetakchilari muhim oʻrin tutadi. Prezidentimiz tomonidan 2022-yil 19-yanvarda qabul qilingan “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi Qaror asosida joriy etilgan yoshlar yetakchisi lavozimi bugungi kunda davlat va yoshlar oʻrtasidagi ishonchli koʻprikka aylandi.

Yoshlar yetakchisi — mahalladagi har bir yosh bilan yaqindan ishlaydigan, ularning hayot tarzi, muammolari va maqsadlarini oʻrganib, tegishli yechimlar taklif etadigan, tashabbuskor va masʼuliyatli shaxs hisoblanadi. Xususan, ishsiz, uyushmagan hamda ehtiyojmand yoshlarni aniqlash va ular bilan individual tarzda ish olib borishda yetakchilarning roli tobora mustahkamlanib bormoqda.

Amudaryo tumanidagi Jumur ovul mahallasining yoshlar yetakchisi Zafar Otaboyev 2022-yildan buyon ushbu masʼuliyatli vazifani sidqidildan ado etib kelmoqda. Mahallada umumiy aholi soni 4 ming 255 nafar boʻlib, 755 ta xonadonda 1 ming 255 ta oila istiqomat qiladi. Ularning 1 ming 214 nafari yoshlardir. Aholi zich joylashgan ushbu hududda 3 ta maktabgacha taʼlim tashkiloti, 10 ta kichik savdo doʻkoni va 1 ta umumiy ovqatlanish shoxobchasi faoliyat yuritmoqda.

Yoshlar yetakchisi Zafar Otaboyev tomonidan 2024-yil davomida bir qator amaliy ishlar bajarildi. Xususan, ishsiz yoshlarning bandligini taʼminlash maqsadida ularning roʻyxati shakllantirilib, 40 nafar yoshga yer ajratib berildi. Ularning oʻzini oʻzi band qilishi uchun subsidiya asosida motokultivator, tikuv mashinalari, payvandlash uskunasi va noutbuklar taqdim etildi. Shuningdek, mahalladagi yosh tadbirkor Xushnud Oʻrinboyevga imtiyozli kredit ajratilib, avtomashina yuvish shoxobchasini tashkil etishda amaliy koʻmak berildi. Bu orqali mahalladagi transport egalariga qulaylik yaratildi — endi ular mashinalarini yuvish uchun uzoqqa bormasdan mahallaning oʻzida xizmatdan foydalanish imkoniga ega boʻlishdi.

Qishloq xoʻjaligida ham yoshlarning faolligi ortib bormoqda. Xususan, mahallada istiqomat qiluvchi yosh oila — Surayyo Xalillayeva va turmush oʻrtogʻi Azizbek Boltaboyevga yer ajratilib, ular poliz mahsulotlari — qovun, tarvuz, kartoshka va sabzi yetishtirish bilan shugʻullanmoqda. Bu orqali nafaqat oʻz oilasi daromadini oshirdi, balki ish bilan band boʻlish imkoniga ham ega boʻldi. Ammo yosh oilani ekinlarni oʻz vaqtida sugʻorish masalasi oʻylantirib kelmoqda. Bu muammoni bartaraf etish yuzasidan “yettilik” aʼzolari, jumladan, yoshlar yetakchisi tomonidan tegishli choralar koʻrilmoqda.

Mahalladagi boshqa tashabbuskor yoshlar ham oʻz mehnati bilan tengdoshlariga namuna boʻlmoqda. 2022-yildan buyon tikuvchilik bilan shugʻullanayotgan Mahfuza Oʻrazimbetovaga subsidiya asosida tikuv mashinasi ajratilgan. Hozirda u oliy taʼlim muassasasida tahsil olmoqda, ammo oʻqishdan boʻsh vaqtlarida buyurtmalarni qabul qilib, ularni sifatli tayyorlab topshirmoqda. Qolaversa, oilaning kelini Mohigul Davlatboyeva ham ushbu kasbni puxta oʻzlashtirib, oila daromadiga munosib hissa qoʻshib kelmoqda.

Yoshlarning boʻsh vaqtlarini mazmunli oʻtkazish maqsadida kitobxonlik va sport tadbirlari muntazam oʻtkazib kelinmoqda. Joriy yil boshida mahallaning yoshlar balansi shakllantirildi. Oliy taʼlim muassasasida tahsil olayotgan 3 nafar yoshga toʻlov-kontrakt summasining 30 foizi qoplab berildi. “Kelajak kasblari” loyihasi doirasida 3 nafar yosh kasb-hunarga oʻqitildi. Shuningdek, hokim yordamchisi bilan hamkorlikda 24 nafar yoshga imtiyozli kreditlar ajratilib, ular tadbirkorlik faoliyatini boshladi.

Shuningdek, xatlov natijalariga tayanilgan holda mehnatga layoqatli boʻlgan, ammo ishsiz 14 nafar yosh bilan yakkama-yakka uchrashuvlar oʻtkazilib, ularning qiziqishlari va qobiliyatiga mos ish bilan taʼminlanish choralari koʻrildi.

Darhaqiqat, mahallalardagi yoshlar yetakchilari faoliyati orqali davlatning yoshlarga boʻlgan eʼtibori har bir xonadongacha yetib boryapti. Jumur ovul mahallasida yoshlar yetakchisi Zafar Otaboyevning saʼy-harakatlari mahallaning ijtimoiy muhitini mustahkamlash, yoshlar oʻrtasida faol fuqarolik pozitsiyasini shakllantirish, ularning taʼlim, tadbirkorlik va bandlikdagi ishtirokiga keng yoʻl ochishga xizmat qilmoqda.

Shohzod Qurbonboyev.