ЖЎҚОРҒИ КЕНГЕС РАИСИ А.ОРИНБАЕВ АМУДАРЁ ТУМАНИДА БЎЛИБ, ЁШЛАР, ТАДБИРКОРЛАР ВА ТУМАН ФАОЛЛАРИ БИЛАН УЧРАШДИ

Қорақалпоғистон Республикаси Жўқорғи Кенгесининг Раиси Аманбай Оринбаев жойларда ёшлар билан учрашиб, уларнинг хоҳиш-истаклари, ташаббус ва муаммоларини тингламоқда. Шундай навбатдаги учрашув 19 июнь куни Амударё туманида ўтказилди.

Учрашувдан олдин бўш иш ўринлари ярмаркаси бўлиб ўтди. Шундан сўнг IT соҳаси, Ташқи беғараз кўмак маблағларини (грантларни) жалб қилиш ва донорлар билан ишлаш бўлими, тижорат банклари раҳбарлари томонидан семинарлар ташкил этилиб, ёшлар тадбиркорлигини йўлга қўйиш, уларнинг ўз ташаббусларини амалга ошириши борасида амалга оширилаётган ишлар ҳақида маълумотлар берилди.

Ўтказилган учрашувда дастлаб Жўқорғи Кенгес Раиси ҳурматли Президентимизнинг алоҳида эътибори билан ёшларга яратилган имкониятлар ҳақида кенг турда тўхталиб ўтди. Шу билан бирга, бундай имкониятлардан ўринли фойдаланиб, юқори натижаларга эришаётган ёшлар сони ортиб бораётгани алоҳида мамнуният билан қайд этилди.

Ўз навбатида, ёшлар давлатимиз раҳбарининг бундай юксак ишончи ва ёшларга кўрсатаётган оталарча ғамхўрлиги учун чуқур миннатдорлик билдирди.

Ўтказилган учрашув давомида ёшлар билан яқиндан мулоқот қилиниб, уларнинг хоҳиш-истаклари, шунингдек, таклифлари тингланди. Унда бир қатор муҳим ташаббуслар ва масалалар илгари сурилди. Ўз навбатида ҳар бир ташаббус ва таклиф Жўқорғи Кенгес Раиси томонидан қўллаб-қувватланиб, уларни ҳаётга татбиқ этиш бўйича масъулларга аниқ топшириқлар берилди.

Шундан сўнг бир гуруҳ ёшлар фаоллиги ва тенгдошлари орасида алоҳида ютуқларга эришиб, кўпчиликка намуна бўлаётгани учун Қорақалпоғистон Республикаси Жўқорғи Кенгеси Президиуми қарори билан тақдирланди.

***

Шу куни Қорақалпоғистон Республикаси Жўқорғи Кенгесининг Раиси Аманбай Оринбаев Амударё туманида янги иш ўринларини яратиш ва аҳоли бандлигини таъминлаш борасида амалга оширилаётган ишлар билан ҳам яқиндан танишди.

Дастлаб, Олмазор маҳалласида “Султон Кумуш” МЧЖ томонидан очилиш маросими ўтказилаётган “Болалар ўйингоҳи” лойиҳаси кўздан кечирилди. Шундан сўнг, ҳар бирида 10 иш ўрни яратилган “Ботир Хонқа” МЧЖ ва “Ал Кафил Бизнес Пласт” МЧЖга қарашли корхоналарнинг пластмасса идишлари ишлаб чиқариш лойиҳалари, 2 млрд. сўмлик маблағлар ҳисобидан 20 иш ўрни яратилишига эришилган “Равшанбек-Юлдузхон” хусусий корхонасининг қандолат, нон маҳсулотлари ишлаб чиқариш ва сутни қайта ишлаш цехи, “Жайхун моторс” МЧЖнинг мотороллерлар ишлаб чиқариш лойиҳалари билан танишилди. Янги иш ўрни яратган ҳар бир тадбиркор доимо қўллаб-қувватланиши, уларнинг ўз фаолиятини янада кенгайтириши учун барча ёрдамлар кўрсатилиши таъкидланди.

Уйшин маҳалласида “Жамолиддин Жайхун” МЧЖ томонидан 1 млрд. сўм маблағ асосида янгидан ишга туширилган балиқчилик лойиҳаси, шунингдек, “Қорақалпоқ маҳсулотлари” МЧЖ томонидан 1,3 млрд. сўм маблағ асосида ишга туширилган паррандачилик лойиҳаси ҳам меҳмонларнинг эътирофига сазовор бўлди. Халқимизни сифатли озиқ-овқат маҳсулотлари билан таъминлаш борасидаги бундай ташаббусларни кўпайтиришда янада жонбозлик билан ишлаш кераклиги юзасидан мутасаддиларга топшириқлар берилди.

Шундан кейин Дўстлик маҳалласи ҳудудидаги “Янги Ўзбекистон” массивида қад ростлаётган кўп қаватли уйларнинг қурилиш жараёни ҳам кўздан кечирилди.  Таъкидлаш жоизки, 2024-2025 йилларда жами 18,5 гектар ер майдонида 26 та кўп қаватли уйлар қурилиши белгиланган. Ҳозирги вақтда ишлар юқори суръатларда давом эттирилмоқда.

Жўқорғи Кенгес Раиси қурилиш ишларини сифатли қилиб, ўз вақтида якунлаш бўйича масъулларга аниқ топшириқлар берди.

***

Ташриф сўнгида Қорақалпоғистон Республикаси Жўқорғи Кенгесининг Раиси Аманбай Оринбаев туман ҳокимлиги биносида Амударё туманининг ижтимоий-иқтисодий ривожланиши масалаларига бағишланган мажлис ўтказди.

Унда дастлаб жорий йилги ўрим-йиғим мавсумини муваффақиятли якунлаб, республикамизда биринчилардан бўлиб контрактация шартномалари шартларини бажарган туман ғаллакорлари, бир гуруҳ меҳнат илғорларини Жўқорғи Кенгеснинг кўкрак нишонлари ва қимматбаҳо совғалар билан тақдирлаш маросими ўтказилди.

Шундан сўнг туманни ижтимоий-иқтисодий ривожлантириш масалалари муҳокамасига бағишланган йиғилиш бўлиб ўтди. Унда амалга оширилаётган ишлар бўйича ўрганишлар натижалари муҳокама қилиниб, тумандаги инвестиция лойиҳалари, янги иш ўринларини яратиш борасидаги ишлар таҳлил қилинди. Шунингдек, ободонлаштириш ишлари ва иқтисодий кўрсаткичлар муҳокама қилиниб, йўлларни таъмирлаш, ижтимоий объектларни қуриш ва реконструкция қилиш бўйича мавжуд муаммолар ўртага ташланиб, уларни ҳал этиш бўйича аниқ тавсия ва топшириқлар берилди.

Мажлисда аҳоли ҳаётида учраётган муаммоларга ечим топиш, халқни рози қилиш ва фаровонлигини таъминлаш борасидаги муҳим ишлар танқидий кўриб чиқилди.

Мажлис давомида Жўқорғи Кенгес Раиси томонидан таъкидланган камчиликларни бартараф этиш бўйича тегишли ташкилот ва мутасаддиларга аниқ вазифалар белгилаб берилди.

Қорақалпоғистон Республикаси Жўқорғи Кенгесининг Ахборот хизмати