Назархон овулининг ижтимоий-иқтисодий ривожи масъуллар диққат марказида
Амударё туманининг чеккасида жойлашган Назархон овулини ҳар томонлама ривожлантириш, аҳолининг турмуш фаровонлигини ошириш ҳамда мавжуд муаммоларга жойида ечим топиш мақсадида кенг кўламли ўрганиш ишлари амалга оширилди. Унга барча соҳалар – прокуратура, соғлиқни сақлаш, таълим, ички ишлар, маҳалла ва оилани қўллаб-қувватлаш, қишлоқ хўжалиги соҳалари мутасаддилари, инфратузилма, электр ва ичимлик суви таъминотига масъул ташкилотлар раҳбарлари жалб этилди.
Овул фуқаролар йиғини биносида фуқаролар учун очиқ сайёр қабул ташкил этилди. Қабулда Назархон аҳолисини қийнаётган муаммолар, жумладан, ичимлик суви таъминоти, йўлларнинг ҳолати, тиббий хизмат кўрсатиш сифати, мактаб ва боғчалар фаолияти каби масалалар юзасидан мурожаатлар қабул қилинди. Очиқ мулоқот жараёнида ҳар бир муаммоли масала алоҳида рўйхатга олиниб, ечими бўйича масъулларга тегишли топшириқлар берилди ва ижроси назоратга олинди.
Таъкидлаш жоизки, бугун мамлакатимизда давлат бошқаруви тизимида очиқлик ва шаффофлик тамойилларини кенг татбиқ этиш, халқ билан бевосита мулоқотда бўлиш, муаммоларни жойида аниқлаб, уларни ҳал қилиш амалиёти кун тартибидаги долзарб масалага айланган. Айниқса, жойлардаги раҳбарларнинг ташаббуси билан ташкил этилаётган сайёр қабуллар, маҳаллабай ишлаш тизимининг амалий самара бераётгани бунга яққол далилдир.
Шу маънода, Амударё туманининг чекка ҳудудларидан бири – Назархон овул фуқаролар йиғинида ўтказилган очиқ мулоқот ҳам ана шундай эзгу мақсадларга хизмат қилгани билан аҳамиятли бўлди. Ушбу мулоқотда тумандаги барча соҳалар бўйича масъул раҳбарлар туман прокурори Баҳрам Машарипов бошчилигида иштирок этди. Очиқ мулоқот давомида фуқаролар ўз муаммолари билан раҳбарларга бевосита мурожаат қилиш имкониятига эга бўлдилар.
Эътиборга молик жиҳати шундаки, ҳар бир мурожаат фақат эшитилиб қўйилмасдан, жойига чиққан ҳолда ўрганилиб, мутасаддилар томонидан тегишли чоралар белгиланди. Айрим масалаларга эса мулоқот чоғидаёқ амалий ечим топилди.
Туман прокурори Баҳрам Машариповнинг бошчилигида ўтказилган очиқ мулоқотда фуқароларга қонунчилик асосида ўз ҳуқуқлари тушунтирилди, айрим ҳуқуқбузарлик ҳолатлари бўйича огоҳлантиришлар берилди. Бундай мулоқотлар аҳолининг давлат органларига бўлган ишончини мустаҳкамлаш билан бирга, муаммоларнинг илдизини аниқлаб, тизимли ечимлар топишда катта аҳамият касб этиши шубҳасиз.
Бугун халқ дардини тинглаш ва муаммоларини ҳал қилиш ҳар бир раҳбар фаолиятининг асосий мезонига айланган. Назархон овулида ўтказилган очиқ мулоқот бунинг яна бир амалий исботидир. Аҳолининг дарди тингланган жойда тараққиёт бошланади, муаммога эътибор қаратилган жойда эса давлатга ишонч ортади. Асосийси, бундай учрашувлар мамлакатимизнинг энг чекка маҳаллалари ҳам давлатимиз ва ҳукуматимизнинг эътиборида эканини амалда намоён этади.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
