Прокуратура масъуллари оталиққа олинган ёшлар билан учрашдилар
Бугунги кунда мамлакатимизда ёшлар сиёсати янги босқичга кўтарилди. Йигит-қизларнинг муаммоларини хизмат хоналарида эмас, балки “маҳаллабай” ва “хонадонбай” тизими асосида бевосита жойига чиқиб ўрганиш, уларни қийнаётган масалаларга тезкор ечим топиш давлат сиёсатининг устувор йўналишига айланди. Давлатимиз раҳбарининг ташаббуси билан жорий этилган раҳбарларнинг ёшларни “оталиққа олиш” амалиёти Амударё туманида ҳам ўзининг ижобий самарасини бермоқда.
Маълумки, жамиятда ҳуқуқбузарлик ва жиноятчиликнинг олдини олиш, ҳаётда ўз ўрнини топишга қийналаётган ёки ижтимоий-ҳуқуқий кўмакка муҳтож ёшларни қўллаб-қувватлаш мақсадида тумандаги ташкилот раҳбарларига ёшлар номма-ном бириктирилган. Бу тизим доирасида Амударё тумани прокурори Баҳром Машариповга 8 нафар, туман прокурори ўринбосари Омирбай Худайбергеновга 7 нафар ҳамда Департаментнинг туман бўлими бошлиғи Махсетбай Утепбергеновга 7 нафар — жами 22 нафар ёшлар “оталиққа” бириктирилган.
Туман прокуратураси ташаббуси билан мазкур тоифадаги ёшлар иштирокида учрашув ташкил этилиб, уларнинг муаммолри тингланди. Таъкидлаш жоизки, мулоқот расмиятчиликдан холи, очиқ ва самимий руҳда ўтди. Унда туман прокурори ва масъул раҳбарлар ўзларига бириктирилган ёшлар билан юзма-юз ўтириб, дилдан суҳбатлашдилар.
Учрашувдан кўзланган асосий мақсад — “оталиққа” олинган ёшларнинг бугунги кундаги реал ҳолатини ўрганиш, уларнинг оилавий ва ижтимоий муҳити билан яқиндан танишиш ҳамда келажакдаги мақсадларини рўёбга чиқаришга кўмаклашишдан иборат бўлди.
Очиқ мулоқот давомида ёшлар ўзларини ўйлантираётган масалаларни экин баён этдилар. Хусусан, иштирокчилар доимий иш ўрнига эга бўлиш ва оиласига даромад келтириш, ўз бизнесини бошлаш мақсадида имтиёзли кредитлар ва ер майдонлари олиш тартиби, касб-ҳунарга ўқиш, замонавий IT технологияларини ўрганиш, тиббий хизмат ва соғлиқни сақлашга оид мурожаатларни ўртага ташладилар.
Раҳбарлар ҳар бир мурожаатни диққат билан тинглаб, уларни ҳал этиш юзасидан масъулларга аниқ муддатли топшириқлар бердилар ва ижросини ўз назоратига олдилар.
Шуни алоҳида таъкидлаш керакки, ёшларни "оталиққа олиш" тизими фақат муаммоларни ҳал қилиш билан чекланиб қолмайди. Масъуллар ёшларнинг иқтидор ва ташаббуслари ҳам қўллаб-қувватлашга эътбор қаратадилар. Уларнинг қизиқишларидан келиб чиқиб, спорт, маданият ва ахборот-коммуникация технологиялари соҳаларида ўз қобилиятларини намоён этишлари учун зарур шароитлар яратиб бериш масаласи ҳам масъулларнинг доимий эътиборида. Учрашувда ёшлар билан бу борада ҳам суҳбат қурилиб, уларнинг қизиқишлари ва келажакдаги режалари тингланди.
Хулоса ўрнида айтганда, Амударё тумани прокурори ва ҳуқуқни муҳофаза қилувчи органлар раҳбарлари томонидан амалга оширилаётган бундай хайрли ишлар ёшларнинг эртанги кунга бўлган ишончини мустаҳкамламоқда. Бу саъй-ҳаракатлар уларни жамиятнинг фаол ва ташаббускор аъзоси сифатида шаклланишига, энг муҳими, келажагимиз эгаларини турли ёт ғоялар таъсири ва жиноятчилик кўчасидан асраб қолишга хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
