Туман кичик фан олимпиадаси ғолиб ва совриндорлари муносиб тақдирланди

Мамлакатимизда ёшлар иқтидорини ривожлантириш, уларнинг интеллектуал салоҳиятини намоён этишига кенг йўл очиб беришга алоҳида эътибор қаратилмоқда. Айниқса, Президентимиз ташаббуси билан жорий этилган “Долзарб 90 кун” лойиҳаси доирасида мамлакатимизнинг барча ҳудудларида ўқувчи-ёшлар учун турли йўналишларда танлов ва мусобақалар кенг кўламда ташкил этилмоқда.

Ушбу ташаббус доирасида ёшларнинг илм-фанга бўлган қизиқишини ошириш ва уларни рағбатлантириш мақсадида Амударё тумани Мактабгача ва мактаб таълими бўлими ҳамда NEWBRIDGE ўқув маркази ҳамкорлигида 3–4 ҳамда 5–6-синф ўқувчилари ўртасида инглиз тили ва математика фанлари бўйича кичик фан олимпиадаси ташкил этилди.

Мазкур олимпиада 9 июндан 4 июлга қадар бўлиб ўтди. Унда 3–4-синфлардан 250 нафардан зиёд ва 5–6-синфлардан 180 нафардан ортиқ ўқувчи иштирок этди. Олимпиада иштирокчиларининг билимларини аниқлаш ва фанга бўлган қизиқишларини баҳолаш мақсадида адолат ва холислик мезонлари асосида ўтказилди.

Яқинда мазкур олимпиада ғолиб ва совриндорларини тақдирлаш маросими ташкил этилди. Тадбирда туман Мактабгача ва мактаб таълими бўлими бошлиғи Ялғаш Шомурадов, бўлим методисти Райҳон Якубова, NEWBRIDGE ўқув маркази директори Жўрабек Гулмирзаев, ўқувчилар ҳамда уларнинг ота-оналари иштирок этдилар.

Тадбирда бўлим бошлиғи Ялғаш Шомурадов сўзга чиқиб, ғолиб ва совриндор ўқувчиларни самимий муборакбод этди. Шунингдек, мазкур олимпиада ёш авлодда фанга бўлган қизиқишни янада ошириш, уларни ижодий ва мантиқий фикрлашга ундашда муҳим аҳамият касб этиши алоҳида таъкидланди. Қолаверса, келгусида бу каби танловлар кўламини янада кенгайтириш мақсад қилингани қайд этилди.

Беллашувда ғолибликни қўлга киритган ўқувчилар туман ҳокимлиги ва туман Мактабгача ва мактаб таълими бўлими томонидан диплом ва эсдалик совғалари билан тақдирландилар. Шу билан бирга, тадбир доирасида NEWBRIDGE ўқув маркази томонидан ғолиб ўқувчилар учун моддий рағбатлар ҳам тақдим этилди.

Хусусан, 1-ўринни эгаллаган иштирокчиларга 5 миллион сўмлик, 2-ўрин соҳибларига 3 миллион сўмлик ва 3-ўринни қўлга киритган ўқувчиларга 2 миллион сўмлик ўқув курслари учун ваучерлар совға қилинди. Ушбу рағбатлар орқали ёшларнинг таълимга бўлган қизиқишини янада ошириш, уларнинг билим олишга бўлган интилишини кучайтириш ҳамда иқтидорли ёшларни моддий ва маънавий қўллаб-қувватлаш кўзда тутилган.

Бундан ташқари, олимпиадада фаол иштирок этган ва юқори натижа кўрсатган 10 нафар иқтидорли ўқувчига махсус сертификатлар ҳамда 4 ой мобайнида ўқув курслари учун 50 фоизлик чегирма тақдим этилди.

Бу каби тадбирлар ўқувчи-ёшларда аниқ фанларга бўлган қизиқишни ошириш, уларнинг салоҳиятини тўлақонли намоён этиш, билим ва қобилиятларини ривожлантиришга хизмат қилади. Шу билан бир қаторда, бу каби танловлар орқали иқтидорли ўқувчилар саралаб олиниб, улар мамлакат миқёсда ўтказиладиган фан олимпиадаларида иштирок этиш учун тайёрлаб борилади. Бу эса, ўз навбатида, туманимиз ўқувчиларининг мамлакат миқёсидаги танловларда фаол иштироки учун замин яратади.

“Долзарб 90 кун” лойиҳаси доирасида амалга оширилаётган бу каби ташаббуслар орқали ёш авлоднинг таълим-тарбиясига қаратилаётган эътибор нафақат уларнинг келажаги, балки мамлакатимиз тараққиётининг мустаҳкам пойдевори ҳисобланади.

Райҳон Якубова, туман Мактабгача ва мактаб таълими бўлимининг Мактаблар фаолиятини мувофиқлаштириш шуъбаси методисти.