"НУРОНИЙ" ЖАМҒАРМАСИ ҚОРАҚАЛПОҒИСТОН РЕСПУБЛИКАСИ БЎЛИМИ ТОМОНИДАН "ҒАЙРАТЛИ КЕКСАЛАР" ШИОРИ ОСТИДА СПОРТ МУСОБАҚАЛАРИ ТАШКИЛ ЭТИЛДИ
Мамлакатимизда "Инсон қадри учун" тамойили асосида амалга оширилаётган барча эзгу ишларнинг мазмун-моҳиятида халқимизнинг ҳаётдан рози яшашини таъминлаш, турмуш тарзини ижобий ва яхши томонга ўзгартириш, қайси ёш тоифасида бўлишидан қатъий назар ҳар бир инсоннинг ижтимоий фаоллигини ошириш, уларнинг яшаш, дам олиш шароитларини замон талаблари даражасига кўтаришдек эзгу мақсадлар мужассам. Айниқса, ўзларининг ёшлик шижоатини, куч-ғайратини эл-юрт фаровонлиги йўлидаги фидойи меҳнат онларига бағишлаган, бугунги кунда кексалик палласига кирган нуронийларни ҳар томонлама қўллаб-қувватлашга қаратилган чора-тадбирлар ўзининг ижобий самарасини бермоқда.
Бу борада Ўзбекистон Республикаси Президентининг 2024 йил 25 ноябрдаги "Камбағалликдан фаровонлик сари" дастурини амалга оширишга фаол нуронийларни жалб этиш чора-тадбирлари тўғрисида"ги Қарори муҳим дастуруламал бўлиб хизмат қилмоқда. Мазкур Қарорга кўра, кекса ёшдаги фуқаролар учун спорт тадбирларини ташкил этиш, уларни жисмоний тарбия ва спорт билан шуғулланишга жалб қилиш, шунингдек, кексаларнинг спорт тадбирларида қатнашиши билан боғлиқ харажатларни қоплаб беришни ташкил этиш ҳамда уларни спортга кенг жалб қилиш учун "Нуроний" жамғармаси ҳисобидан ҳар бир маҳаллага йилига 10 млн сўм миқдорида маблағ ажратиш белгиланган эди. Ушбу Қарор ижросини таъминлаш мақсадида "Нуроний" жамғармаси Амударё туман бўлими томонидан ишлаб чиқилган режавий жадвалга мувофиқ туманнинг деярли барча ҳудудларида истиқомат қилувчи кекса ёшдаги фуқароларнинг қизиқишларини инобатга олган ҳолда ташкил этилаётган маънавий-маърифий кўнгилочар тадбирларда ва спорт мусобақаларида барча ёш тоифасидаги кексаларнинг иштирокини таъминлашга алоҳида эътибор қаратилмоқда. Айниқса, нуронийлар ўртасида ташкиллаштирилаётган спорт мусобақаларида қатнашиш истагидаги фуқаролар сафи кун сайин ошиб бормоқда.
Ана шундай спорт мусобақаларидан бири яқинда Амударё туман Мактабгача ва мактаб таълими бўлими тасарруфидаги 40-сонли умумтаълим мактабининг спорт майдонида ҳам ўтказилиб, унда тумандаги овул ва маҳаллаларда ташкил этилган кекса ёшдаги фуқаролардан иборат нуронийлар футбол жамоалари ўзаро беллашдилар. "Ғайратли кексалар" шиори остида, спортнинг мини футбол тури бўйича ташкил этилган мазкур мусобақанинг очилиш маросимида "Нуроний" жамғармаси Қорақалпоғистон Республикаси бўлими бошлиғи Турсунбай Абдижаббаров, жамғарманинг Амударё туман бўлими масъуллари, фуқароларнинг ўзини-ўзи бошқариш органлари ходимлари, шунингдек, аҳоли вакиллари иштирок этдилар.
Қизғин ва қизиқарли баҳсларга бой тарзда ўтган мусобақаларда туманнинг овул ва маҳаллаларида ташкил этилган нуронийлар мини футбол жамоалари аъзолари, ҳақиқатдан ҳам ғайратли кексалар ғолиблик учун кураш олиб бордилар. Мусобақа якунларига кўра, ўз ўйинлари орқали юксак сабр-тоқат билан эпчиллик, курашчанлик намуналарини кўрсатган Куюк кўпир овул фуқаролар йиғинининг "Куюк кўпир" мини футбол жамоасининг ғайратли кекса спортчилари фахрли 1-ўринни эгалладилар.
2-ўрин Бешовул МФЙнинг "Бешовул" жамоасига, 3-ўрин эса Олмазор маҳалласининг нуроний спортчилар жамоасига насиб этди. Ўзаро ҳамжиҳатлик ва дўстона руҳда ўтказилган мусобақа якунида "Нуроний" жамғармаси Қорақалпоғистон Республикаси бўлими бошлиғи Турсунбай Абдижаббаров ғолиб жамоалар аъзоларига "Нуроний" жамғармаси Қорақалпоғистон Республикаси бўлими томонидан тайёрланган Диплом ва қимматбаҳо эсдалик совғаларини топширди.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
