Депутатлар биринчи ярим йиллик якуни бўйича сайловчиларга ҳисобот бермоқда

2025 йил 25 июль куни Амударё туманининг Босув маҳалласида Қорақалпоғистон Республикаси Жўқорғи Кенгеси депутати Ғуломжон Ешниёзов ҳамда халқ депутатлари туман Кенгаши депутати Яхшимурод Аҳмедовнинг сайловчилар билан учрашуви бўлиб ўтди.

Учрашувда Қорақалпоғистон Республикаси Жўқорғи Кенгеси депутати Ғуломжон Ешниёзов 2025 йилнинг биринчи ярми давомида Жўқорғи Кенгес томонидан амалга оширилган ишлар, жумладан, қабул қилинган қонунлар ва қарорлар ҳақида, шунингдек, Жўқорғи Кенгес томонидан ҳудудларни ижтимоий-иқтисодий ривожлантириш, аҳолининг турмуш шароитини яхшилаш, янги иш ўринларини ташкил қилиш, тадбиркорликни ривожлантириш, ёшларнинг бандлигини таъминлаш, хотин-қизларга эътиборни кучайтириш, ҳудудлардаги ижтимоий инфратузилмани яхшилаш бўйича амалга оширилаётган ишлар хусусида маълумот берди.

Халқ депутатлари туман Кенгаши депутати Яхшимурод Аҳмедов Амударё туманида, хусусан Босув маҳалласи ҳудудида амалга оширилаётган қурилиш ва бунёдкорлик, ободонлаштириш ишларига эътибор қаратиб, Кенгашнинг жорий йил 1-ярми давомидаги фаолиятига тўхталиб ўтди.

Йиғилишда Босув маҳалласида яшовчи фуқаро Қурбонбой Бобожонов маҳалла ҳудудида тиббиёт маркази йўқлигини, аҳоли оддийгина укол олиш учун ҳам марказий поликлиникага боришга тўғри келаётганини маълум қилиб, маҳалла марказига қишлоқ шифокорлик пункти қуриш таклифини билдирди. Қолаверса, маҳалла ҳудудида ёшларнинг бўш вақтини мазмунли ўтказиш мақсадида футбол ва волейбол майдончаларини қуриш бўйича таклиф берди.

Фуқаро Латиф Ҳожибоев маҳалла аҳлига қулайлик яратиш, айниқса болалар мактабга бориб-келишида хавфсизликни таъминлаш мақсадида маҳалла ҳудудидаги 26-сонли мактабдан Манғит айланма йўлига чиқувчи йўл бўйига пиёдалар йўлакчаси қуриш таклифини билдирди.

Депутатлар таклифларни тегишли ижрочиларга етказиб, келгуси йилларнинг дастурларига киритиш бўйича чоралар кўрилишини маълум қилди.

Шу каби учрашув туманнинг Чойкўл овулида ҳам ўтказилди. Учрашувда Қорақалпоғистон Республикаси Жўқорғи Кенгеси депутати Ғуломжон Ешниёзов ҳамда халқ депутатлари туман Кенгаши депутати Сайлихон Муродбоевалар сайловчиларга ўзларининг депутатлик ваколатлари доирасида жорий йилнинг ўтган 6 ойи давомида амалга оширган ишлари ҳақида ҳисобот бердилар.

Сўзга чиққан маҳалла фаоллари овулнинг Маданият кўчасидаги ички йўлга асфальт ётқизиш ишларини давом эттириш, қолаверса, овул аҳолиси ва ўқувчиларга қулайлик яратиш мақсадида Манғит-Қипчоқ йўлининг бир томонига пиёдалар йўлакчасини қуриш, мактаб ёнидан ўтган автомобиль йўлида ҳаракат кўплигини инобатга олган ҳолда, ўқувчиларнинг ва ўқитувчиларнинг йўлдан хавфсиз ўтишини таъминлаш мақсадида светофор ўрнатиш бўйича таклифлар билдирилди.

Таклифлар инобатга олиниб, тегишли ташкилотларга депутатлик сўрови чиқарилиши маълум қилинди.

Йиғилишдан кейин Қорақалпоғистон Республикаси Жўқорғи Кенгеси депутати Ғуломжон Ешниёзов ва халқ депутатлари Амударё туман Кенгаши депутати, Ўзбекистон Либерал-демократик партиясининг туман Кенгаши раҳбари Яхшимурод Аҳмедов депутатлик назоратини ўрнатиш мақсадида Босув маҳалласи ҳудудига ичимлик суви тармоғини ётқизиш ишлари билан яқиндан танишди.

Маълумки, давлатимиз раҳбарининг махсус қарорига асосан Осиё Тараққиёт банки иштирокида Амударё туманида аҳолининг тоза ичимлик суви билан марказлашган ҳолда таъминланиш даражасини сезиларли даражада ошириш мақсадида Озарбайжон қурилиш корхонаси ҳамкорлигида қиймати 29 млн АҚШ долларидан ортиқ бўлган қурилиш ишлари амалга оширилмоқда.

Депутатлар қурилиш жараёнида смета ҳужжатлари ва тасдиқланган схемаларга қатъий риоя қилиш, жамоатчилик назорати субъектлари учун маҳаллага кириш қисмига тегишли тартибда тасдиқланган хариталарни ва қурилиш паспортини жойлаштириш бўйича тавсиялар берди.

Шунингдек, депутатлар Чойкўл овули ҳудудида қурилаётган 59-сонли мактабга ташриф буюриб, мактабнинг қурилиши билан яқиндан танишди. Мазкур мактаб биноси ёнига 180 ўқувчи ўринли қўшимча бино ҳамда спорт зали қурилмоқда. Объектнинг тендер қиймати 1 млрд 832 млн сўмни ташкил қилади.

Халқ вакиллари депутатлик назоратини ўрнатган ҳолда қурилиш ишларини сифатли ва ўз вақтида якунлаш бўйича тавсиялар бердилар.