Deputatlar birinchi yarim yillik yakuni boʻyicha saylovchilarga hisobot bermoqda

2025-yil 25-iyul kuni Amudaryo tumanining Bosuv mahallasida Qoraqalpogʻiston Respublikasi Joʻqorgʻi Kengesi deputati Gʻulomjon Yeshniyozov hamda xalq deputatlari tuman Kengashi deputati Yaxshimurod Ahmedovning saylovchilar bilan uchrashuvi boʻlib oʻtdi.

Uchrashuvda Qoraqalpogʻiston Respublikasi Joʻqorgʻi Kengesi deputati Gʻulomjon Yeshniyozov 2025-yilning birinchi yarmi davomida Joʻqorgʻi Kenges tomonidan amalga oshirilgan ishlar, jumladan, qabul qilingan qonunlar va qarorlar haqida, shuningdek, Joʻqorgʻi Kenges tomonidan hududlarni ijtimoiy-iqtisodiy rivojlantirish, aholining turmush sharoitini yaxshilash, yangi ish oʻrinlarini tashkil qilish, tadbirkorlikni rivojlantirish, yoshlarning bandligini taʼminlash, xotin-qizlarga eʼtiborni kuchaytirish, hududlardagi ijtimoiy infratuzilmani yaxshilash boʻyicha amalga oshirilayotgan ishlar xususida maʼlumot berdi.

Xalq deputatlari tuman Kengashi deputati Yaxshimurod Ahmedov Amudaryo tumanida, xususan Bosuv mahallasi hududida amalga oshirilayotgan qurilish va bunyodkorlik, obodonlashtirish ishlariga eʼtibor qaratib, Kengashning joriy yil 1-yarmi davomidagi faoliyatiga toʻxtalib oʻtdi.

Yigʻilishda Bosuv mahallasida yashovchi fuqaro Qurbonboy Bobojonov mahalla hududida tibbiyot markazi yoʻqligini, aholi oddiygina ukol olish uchun ham markaziy poliklinikaga borishga toʻgʻri kelayotganini maʼlum qilib, mahalla markaziga qishloq shifokorlik punkti qurish taklifini bildirdi. Qolaversa, mahalla hududida yoshlarning boʻsh vaqtini mazmunli oʻtkazish maqsadida futbol va voleybol maydonchalarini qurish boʻyicha taklif berdi.

Fuqaro Latif Hojiboyev mahalla ahliga qulaylik yaratish, ayniqsa bolalar maktabga borib-kelishida xavfsizlikni taʼminlash maqsadida mahalla hududidagi 26-sonli maktabdan Mangʻit aylanma yoʻliga chiquvchi yoʻl boʻyiga piyodalar yoʻlakchasi qurish taklifini bildirdi.

Deputatlar takliflarni tegishli ijrochilarga yetkazib, kelgusi yillarning dasturlariga kiritish boʻyicha choralar koʻrilishini maʼlum qildi.

Shu kabi uchrashuv tumanning Choykoʻl ovulida ham oʻtkazildi. Uchrashuvda Qoraqalpogʻiston Respublikasi Joʻqorgʻi Kengesi deputati Gʻulomjon Yeshniyozov hamda xalq deputatlari tuman Kengashi deputati Saylixon Murodboyevalar saylovchilarga oʻzlarining deputatlik vakolatlari doirasida joriy yilning oʻtgan 6 oyi davomida amalga oshirgan ishlari haqida hisobot berdilar.

Soʻzga chiqqan mahalla faollari ovulning Madaniyat koʻchasidagi ichki yoʻlga asfalt yotqizish ishlarini davom ettirish, qolaversa, ovul aholisi va oʻquvchilarga qulaylik yaratish maqsadida Mangʻit-Qipchoq yoʻlining bir tomoniga piyodalar yoʻlakchasini qurish, maktab yonidan oʻtgan avtomobil yoʻlida harakat koʻpligini inobatga olgan holda, oʻquvchilarning va oʻqituvchilarning yoʻldan xavfsiz oʻtishini taʼminlash maqsadida svetofor oʻrnatish boʻyicha takliflar bildirildi.

Takliflar inobatga olinib, tegishli tashkilotlarga deputatlik soʻrovi chiqarilishi maʼlum qilindi.

Yigʻilishdan keyin Qoraqalpogʻiston Respublikasi Joʻqorgʻi Kengesi deputati Gʻulomjon Yeshniyozov va xalq deputatlari Amudaryo tuman Kengashi deputati, Oʻzbekiston Liberal-demokratik partiyasining tuman Kengashi rahbari Yaxshimurod Ahmedov deputatlik nazoratini oʻrnatish maqsadida Bosuv mahallasi hududiga ichimlik suvi tarmogʻini yotqizish ishlari bilan yaqindan tanishdi.

Maʼlumki, davlatimiz rahbarining maxsus qaroriga asosan Osiyo Taraqqiyot banki ishtirokida Amudaryo tumanida aholining toza ichimlik suvi bilan markazlashgan holda taʼminlanish darajasini sezilarli darajada oshirish maqsadida Ozarbayjon qurilish korxonasi hamkorligida qiymati 29 mln AQSh dollaridan ortiq boʻlgan qurilish ishlari amalga oshirilmoqda.

Deputatlar qurilish jarayonida smeta hujjatlari va tasdiqlangan sxemalarga qatʼiy rioya qilish, jamoatchilik nazorati subʼektlari uchun mahallaga kirish qismiga tegishli tartibda tasdiqlangan xaritalarni va qurilish pasportini joylashtirish boʻyicha tavsiyalar berdi.

Shuningdek, deputatlar Choykoʻl ovuli hududida qurilayotgan 59-sonli maktabga tashrif buyurib, maktabning qurilishi bilan yaqindan tanishdi. Mazkur maktab binosi yoniga 180 oʻquvchi oʻrinli qoʻshimcha bino hamda sport zali qurilmoqda. Obʼektning tender qiymati 1 mlrd 832 mln soʻmni tashkil qiladi.

Xalq vakillari deputatlik nazoratini oʻrnatgan holda qurilish ishlarini sifatli va oʻz vaqtida yakunlash boʻyicha tavsiyalar berdilar.