Депутат сайловчиларнинг долзарб муаммоларига эътибор қаратди

Жорий йилнинг 28 июль санасида Амударё туманидаги 31-сонли Ўрта қалъа сайлов округидан Тадбиркорлар ва ишбилармонлар ҳаракати — Ўзбекистон либерал-демократик партиясидан Қорақалпоғистон Республикаси Жўқорғи Кенгеси депутати Илҳом Полвонов ўз сайловчилари билан учрашди. Депутат билан учрашув тадбирида ЎзЛиДеП Амударё туман Кенгаши аппарати раҳбари Яхшимурод Аҳмедов, Халқ депутатлари  туман Кенгаши депутати Мадамин Казаков, Беруний номли, Дўстлик, Дурунки маҳаллалари масъуллари ва сайловчилари иштирок этишди.

Учрашувда сайловчилар томонидан мазкур маҳаллалар аҳолиси ҳаётига доир инфратузилма билан боғлиқ бир қатор муаммоли масалалар кўтарилди. Хусусан, Беруний номли маҳалланинг шаҳар марказига яқин қисмидаги электр энергияси узатиш устунлари 1964 йилда ўрнатилган бўлиб, айни пайтда яроқлилик муддати ўтиб бўлган. Устунларнинг ер қисмидаги бетон таянчларда аллақачон емирилиш бошланган. Устунлар яқин вақт ичида алмаштирилмаса, ташқи таъсир натижасида қулаб тушиши ва бу ҳудуд аҳолиси ҳаётига хавф туғдириши мумкин. Сайловчилар томонидан кўтарилган ушбу масала юзасидан депутат Илхом Полвонов шу ернинг ўзида туман электр тармоқлари корхонаси раҳбари билан телефон орқали боғланиб, муаммоли масалани ижобий ҳал этиш чораларини кўрди ва соҳа масъуллари томонидан таянч устунларини алмаштириш бўйича ишлар олиб бориладиган бўлди.

Шу куни депутат Илхом Полвонов Арна бўйи маҳалласи ҳудудидаги сайловчилари билан ҳам учрашиб, маҳалла аҳолисини қийнаб келаётган муаммоли масалаларни ўрганди. Учрашувда маҳалла ҳудудидан оқиб ўтувчи 3,8 км. узунликдаги ариқни қазиш, ҳудудда аҳолига тиббий хизмат кўрсатишни яхшилаш билан боғлиқ масалалар қизғин муҳокамалар марказида бўлди.

Айниқса, маҳаллада деҳқончилик маданиятини юксалтиришда сув йўлларининг ўтказувчанлик ҳолатини яхшилаш, йиллар давомида тозаланмаган сув йўлларини махсус техника ёрдамида қазиб, тозалаш жуда муҳимлиги таъкидланди. Бундан ташқари, сўнгги йилларда аҳоли сонининг анча ўсганини инобатга олиб, уларнинг намунали тиббий хизматдан баҳраманд бўлиши учун ҳудудда оилавий шифокорлик пунктини қуриш масаласига эътибор қаратилди.

Ҳар икки масала  юзасидан билдирилган фикрлар ва таклифлар депутат томонидан алоҳида тизимга олиниб, маҳалла ҳудудидан оқиб ўтувчи 3,8 км. узунликдаги ариқни махсус техникаларни жалб қилган ҳолда  қазиш  бўйича тегишли ташкилотлар билан боғланиб, муаммонинг ечими юзасидан чоралар кўрилди. Шунингдек, маҳалла ҳудудида оилавий шифокорлик пунктини қуриш бўйича Қорақалпоғистон Республикаси Соғликни сақлаш вазирлигига депутат сўрови юбориш орқали муаммони ижобий ҳал этиш чоралари кўриладиган бўлди. Бундан ташқари,  сайловчилар Ўрта қалъа овули ҳудудида болалар ўйин майдончасини қуриш, Янгиобод маҳалласи ҳудудидан оқиб ўтувчи захкаш устига кўприк қуриш, маҳалла кўчаларига қум-шағал аралашмаси тўшаш зарурлиги ҳақидаги муаммоларни ҳал этишда депутатнинг иштироки, амалий кўмаги зарурлигини таъкидладилар. Ушбу масалалар ҳам депутат томонидан алоҳида қайд этилиб, тизимга олинди ва тегишли ташкилотлар орқали  муаммоларни ижобий ҳал этиш чоралари кўрилди.

Учрашув давомида депутат билан сайловчилар ўзаро дилдан мулоқот қилдилар. Хусусан, фарзандлар таълим-тарбияси, оилалар мустаҳкамлигини таъминлашда, аҳолининг иш билан бандлиги даражасини оширишда ёшлар тадбиркорлигининг аҳамияти каби масалалар бўйича фикр алмашдилар ҳамда ўзларини қизиқтирган саволлар билан мурожаат қилдилар, уларнинг барча саволларига депутат Илхом Полвонов ўз ваколати доирасида батафсил жавоб берди.

Бўлиб ўтган учрашув сиёсий партияларнинг аҳоли турмуш фаровонлигини ошириш йўлидаги сайловолди дастурий-режаларини амалга ошириш борасида халқ билан якдиллигининг ёрқин ифодаси бўлди.

РОБИЯ ЙЎЛДОШЕВА.