УСТОЗЛАР МИЛЛИЙ ФОРУМИ: ЯНГИ ЎҚУВ ЙИЛИГА ЯНГИ РЕЖАЛАР БИЛАН
"Устозлар миллий форуми"нинг шуъба семинарларидан сўнг Амударё тумани Маданият бўлими биносида анжуманнинг ялпи мажлиси бўлиб ўтди. Тадбирда туман ҳокими ўринбосари Нодирбек Камолов, Мактабгача ва мактаб таълими бўлими бошлиғи Ялғашбой Шамуратов, Қорақалпоғистон Республикаси Мактабгача ва мактаб таълими вазирлигининг ўқувчилар билимини баҳолаш ва таҳлил қилиш шўъбаси бошлиғи Ҳамидулла Бегдуллаев, шунингдек, умумий ўрта таълим ва мактабгача таълим ташкилотлари директорлари, тренер-ўқитувчилар, фахрий устозлар ва кенг жамоатчилик вакиллари иштирок этдилар.
Пленар йиғилишда сўзга чиққанлар томонидан таълим тизимидаги ислоҳотларнинг аҳамияти, ўқитувчи касбининг нуфузини ошириш борасида амалга оширилаётган ишлар ва келгусидаги режалар ҳақида атрофлича фикр юритилди. Туман ҳокими ўринбосари Нодирбек Камолов ўз нутқида ёш авлод тарбиясидек масъулиятли вазифани сидқидилдан адо этаётган устозларга миннатдорчилик билдириб, ҳокимлик томонидан педагогларни қўллаб-қувватлаш учун барча имкониятлар сафарбар этилишини таъкидлади. Туман Мактабгача ва мактаб таълими бўлими бошлиғи Ялғашбой Шамуратов эса янги ўқув йилида эътибор қаратилиши лозим бўлган устувор йўналишлар, хусусан, таълим сифатини ошириш, иқтидорли ўқувчилар билан ишлашни кучайтириш ва рақамли технологияларни таълим жараёнига кенг жорий этиш масалаларига алоҳида тўхталиб ўтди.
Тадбирнинг энг ҳаяжонли ва тантанали қисми, шубҳасиз, фидокорона меҳнатлари билан соҳа ривожига муносиб ҳисса қўшиб келаётган бир гуруҳ илғор ўқитувчи ва тарбиячиларни тақдирлаш маросими бўлди. 2024-2025 ўқув йили давомида ёшларни миллий ва умуминсоний қадриятлар руҳида тарбиялашга фаол ҳисса қўшган, таълим-тарбия жараёнида юқори натижаларга эришган, ўқувчилари турли танлов ва олимпиадаларда совринли ўринларни эгаллаган бир қатор педагоглар Қорақалпоғистон Республикаси Мактабгача ва мактаб таълими вазирлиги ҳамда туман ҳокимлигининг ташаккурномаси ва эсдалик совғалари билан мукофотландилар. Ушбу эътироф устозларнинг шарафли меҳнатига берилган юксак баҳо бўлиб, уларни янгидан-янги зафарлар сари руҳлантириши табиий.
Форумни ўтказишдан мақсад тизимда олиб борилаётган ислоҳотлар, таълим мазмунини такомиллаштириш борасида амалга оширилаётган ишлар билан таништириш, ўқув режалари, ўқув дастурлари, дарсликлар, янги баҳолаш тизими, шунингдек, ўқув жараёнига татбиқ этиладиган илғор методикаларнинг мазмун-моҳиятини соҳа ходимларига етказишдан иборатдир. Бу эса ўз навбатида педагогларнинг касбий савиясини ошириш, уларни замон талаблари билан уйғунлаштириш ва таълим жараёнида инновацион ёндашувларни кенг қўллашга йўл очади.
Шунингдек, форум доирасида ўтказилган тадбирлар ўқитувчиларга нафақат янги билимлар олиш, балки ўз тажрибаларини бошқалар билан бўлишиш, муаммоларни биргаликда муҳокама қилиш ва уларга самарали ечимлар топиш имкониятини ҳам тақдим қилди. Бундай ёндашув педагогик жамоатчиликда бирлик ва ҳамкорлик руҳини мустаҳкамлаш, ўзаро ёрдам ва қўллаб-қувватлаш анъаналарини ривожлантиришга хизмат қилади.
Хулоса қилиб айтганда, Амударё туманида бўлиб ўтган "Устозлар миллий форуми" нафақат анъанавий тадбир, балки таълим соҳаси ходимлари учун ўзига хос тажриба мактаби, илҳом ва ғайрат манбаи бўлди. Форумда белгилаб олинган вазифалар ва янги режалар, шубҳасиз, туманда таълим сифатини янги босқичга олиб чиқишга, ёш авлодни замонавий билим ва кўникмалар билан қуроллантиришга хизмат қилади. Бундай тадбирларнинг мунтазам ўтказилиши мамлакатимизда таълим тизимини янада ривожлантириш ва дунё миқёсидаги стандартларга мослаштиришнинг муҳим омилидир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
