Ўзбекистон Халқ демократик партияси Амударё туман кенгашининг III пленуми ўтказилди

Ўзбекистон Халқ демократик партияси Амударё туман кенгашининг III пленуми бўлиб ўтди. Унда партиянинг 2025 йил биринчи ярим йиллигида амалга оширилган ишлари сарҳисоб қилиниб, келгусидаги устувор вазифалар белгилаб олинди.

Пленумда партия Амударё туман кенгаши аъзолари, Қорақалпоғистон Республикаси Жўқорғи Кенгесидаги ЎзХДП фракцияси, Халқ депутатлари Амударё туман Кенгашидаги партия гуруҳи аъзолари ва оммавий ахборот воситалари вакиллари иштирок этди.

Пленум аввалида Ўзбекистон ХДП Амударё туман кенгаши раиси Ортиқбой Эрнафасов ҳисобот даврида амалга оширилган ишлар ҳақида маъруза қилди. Таъкидланишича, партиянинг сайловолди дастури ижросини таъминлаш мақсадида қатор лойиҳа ва акциялар ўтказилган. Жумладан, “Депутат маҳаллада”, “Қувонч ва меҳр улашайлик!”, “Саломатлик акцияси”, “Сиёсатдаги ёшлар”, “Сафимиздаги ёшлар”, “Ёшларга кўмак”, “Соғлом оила – соғлом жамият” каби 40 дан ортиқ тадбирлар ташкил этилиб, уларда 2 мингга яқин фуқаро қамраб олинган.

Шунингдек, аҳоли муаммоларини ўрганиш ва уларни ҳал этишга алоҳида эътибор қаратилган. Партиянинг “Жамоатчилик қабулхоналари”га келиб тушган 39 та мурожаатнинг 36 таси (92 фоизи) ижобий ҳал этилган. Бундан ташқари, партия гуруҳи ташаббуси билан ҳудудларни ижтимоий-иқтисодий ривожлантиришга қаратилган 3 та муҳим масала сессия кун тартибига киритилиб, тегишли қарорлар қабул қилинган.

Пленумда кун тартибидаги масалалар юзасидан фикр-мулоҳазалар билдирилиб, келгусидаги вазифалар белгилаб олинди. Тадбир сўнгида партия сафига янги қабул қилинган аъзоларга аъзолик гувоҳномалари топширилди.