Ёшлар келажаги учун янги имкониятлар яратилмоқда

Бугун ёшлар бандлиги, уларнинг иқтидорини юзага чиқариш ва замонавий касбларга йўналтириш масаласи давлат сиёсатининг энг устувор йўналишларидан бирига айланган. Амударё туманида мана шундай устувор мақсадларга йўналтирилган қатор амалий ишлар қилинмоқда.

Хусусан, туман ҳокими Собир Хўжаметов ташаббуси билан 1-сонли муҳандислик техникумида ёшларни касб-ҳунарга ўқитиш, уларнинг қобилиятларини рўёбга чиқариш ва муносиб иш билан таъминлаш мақсадида 18 та йўналишда қисқа муддатли ўқув курслари ташкил этилди. Энг эътиборлиси, бу курсларда таълим олиш мутлақо бепулдир.

17 сентябрь куни техникумда мазкур курсларнинг очилиш маросими ҳамда бўш иш ўринлари ярмаркаси бўлиб ўтди. Тадбирда туман ҳокими бошчилигида соҳа раҳбарлари, турли ташкилот вакиллари ва ёшлар иштирок этди.

Тадбирда сўзга чиққан туман ҳокими Собир Хўжаметов муҳтарам Президентимиз томонидан ёшларга таълим-тарбия олишлари, касб-ҳунар эгаллашлари, ўз қобилиятларини намойиш қилишлари учун кенг имкониятлар яратилаётганини алоҳида таъкидлади. Шунингдек, чет тилларини ўрганиш учун яратилган шарт-шароитлар, хорижий тилни билишнинг бугунги глобаллашув даврида нақадар муҳим экани хусусида сўз юритди.

Техникум директори Шуҳрат Матризаев ҳам нутқ сўзлаб, ушбу ташаббуснинг фарзандларимизнинг касб-ҳунар эгаллашларида, ўз ҳаёт йўлини топишда ва келажакда мустақил шахс сифатида шаклланишида беқиёс аҳамиятга эга эканини таъкидлади.

Тадбир доирасида ташкил этилган бўш иш ўринлари меҳнат ярмаркасида тижорат банклари, турли ташкилот ва муассасалар масъуллари, шунингдек, маҳаллий тадбиркорлар ўзларининг мавжуд иш ўринлари билан иштирок этдилар. Бу эса ёшларнинг нафақат билим олишлари, балки ўзлари учун муносиб иш жойи топишларига ҳам кенг имконият яратди.

Тадбир давомида жажжи қизалоқларнинг рақс чиқишлари, ҳарбий оркестр жамоасининг жўшқин куй-қўшиқлари йиғилганларга байрамона кайфият улашди. Бу эса ёшлар учун яратилаётган имкониятлар нафақат билим олишга, балки руҳий-маънавий юксалишга сабаб бўлаётганини кўрсатди.

Амударёда очилган қисқа муддатли курслар орқали ёшлар тикувчилик, сартарошлик, пазандалик, IT ва дастурлаш, пайвандчилик, электрмонтёрлик, автомеханиклик, қандолатчилик каби 18 та йўналишларда билим оладилар. Бу эса уларнинг меҳнат бозорида талабгир мутахассисга айланишига, ўз ҳаётини ўзи мустақил қуришига замин яратади.

Туман ҳокими Собир Хўжаметов томонидан илгари сурилган ушбу ташаббус ёшлар ҳаётида ўзларининг янги қирраларини очадиган, уларнинг орзу-интилишларини рўёбга чиқарадиган катта имкониятдир. Касб-ҳунар эгаллаган ёшнинг қўли гул, кўнгли тўқ, келажаги эса порлоқ бўлади.

 Чарос Арслонова, туман ҳокимлигининг Ахборот хизмати раҳбари.