Yoshlar kelajagi uchun yangi imkoniyatlar yaratilmoqda

Bugun yoshlar bandligi, ularning iqtidorini yuzaga chiqarish va zamonaviy kasblarga yoʻnaltirish masalasi davlat siyosatining eng ustuvor yoʻnalishlaridan biriga aylangan. Amudaryo tumanida mana shunday ustuvor maqsadlarga yoʻnaltirilgan qator amaliy ishlar qilinmoqda.

Xususan, tuman hokimi Sobir Xoʻjametov tashabbusi bilan 1-sonli muhandislik texnikumida yoshlarni kasb-hunarga oʻqitish, ularning qobiliyatlarini roʻyobga chiqarish va munosib ish bilan taʼminlash maqsadida 18 ta yoʻnalishda qisqa muddatli oʻquv kurslari tashkil etildi. Eng eʼtiborlisi, bu kurslarda taʼlim olish mutlaqo bepuldir.

17-sentyabr kuni texnikumda mazkur kurslarning ochilish marosimi hamda boʻsh ish oʻrinlari yarmarkasi boʻlib oʻtdi. Tadbirda tuman hokimi boshchiligida soha rahbarlari, turli tashkilot vakillari va yoshlar ishtirok etdi.

Tadbirda soʻzga chiqqan tuman hokimi Sobir Xoʻjametov muhtaram Prezidentimiz tomonidan yoshlarga taʼlim-tarbiya olishlari, kasb-hunar egallashlari, oʻz qobiliyatlarini namoyish qilishlari uchun keng imkoniyatlar yaratilayotganini alohida taʼkidladi. Shuningdek, chet tillarini oʻrganish uchun yaratilgan shart-sharoitlar, xorijiy tilni bilishning bugungi globallashuv davrida naqadar muhim ekani xususida soʻz yuritdi.

Texnikum direktori Shuhrat Matrizayev ham nutq soʻzlab, ushbu tashabbusning farzandlarimizning kasb-hunar egallashlarida, oʻz hayot yoʻlini topishda va kelajakda mustaqil shaxs sifatida shakllanishida beqiyos ahamiyatga ega ekanini taʼkidladi.

Tadbir doirasida tashkil etilgan boʻsh ish oʻrinlari mehnat yarmarkasida tijorat banklari, turli tashkilot va muassasalar masʼullari, shuningdek, mahalliy tadbirkorlar oʻzlarining mavjud ish oʻrinlari bilan ishtirok etdilar. Bu esa yoshlarning nafaqat bilim olishlari, balki oʻzlari uchun munosib ish joyi topishlariga ham keng imkoniyat yaratdi.

Tadbir davomida jajji qizaloqlarning raqs chiqishlari, harbiy orkestr jamoasining joʻshqin kuy-qoʻshiqlari yigʻilganlarga bayramona kayfiyat ulashdi. Bu esa yoshlar uchun yaratilayotgan imkoniyatlar nafaqat bilim olishga, balki ruhiy-maʼnaviy yuksalishga sabab boʻlayotganini koʻrsatdi.

Amudaryoda ochilgan qisqa muddatli kurslar orqali yoshlar tikuvchilik, sartaroshlik, pazandalik, IT va dasturlash, payvandchilik, elektrmontyorlik, avtomexaniklik, qandolatchilik kabi 18 ta yoʻnalishlarda bilim oladilar. Bu esa ularning mehnat bozorida talabgir mutaxassisga aylanishiga, oʻz hayotini oʻzi mustaqil qurishiga zamin yaratadi.

Tuman hokimi Sobir Xoʻjametov tomonidan ilgari surilgan ushbu tashabbus yoshlar hayotida oʻzlarining yangi qirralarini ochadigan, ularning orzu-intilishlarini roʻyobga chiqaradigan katta imkoniyatdir. Kasb-hunar egallagan yoshning qoʻli gul, koʻngli toʻq, kelajagi esa porloq boʻladi.

 Charos Arslonova, tuman hokimligining Axborot xizmati rahbari.