Ёшлар учун ажратилган ер – фаровон ҳаёт сари мустаҳкам пойдевор вазифасини ўтамоқда

Бугун мамлакатимизда ёшлар келажаги учун, уларнинг ўз салоҳиятини рўёбга чиқариши ва оиласига муносиб даромад топиши учун барча шароитлар яратилмоқда. Муҳтарам Президентимиз ташаббуси билан қабул қилинган “Ёшларга ер ажратиш орқали уларнинг даромадларини ошириш ва бандлигини таъминлаш, шунингдек, янги ер майдонларини ўзлаштириш чора-тадбирлари тўғрисида”ги қарор ҳаётга изчил татбиқ этилиб, ўзининг юксак самарасини бермоқда.

Амударё туманининг Холимбег овулида мазкур қарор доирасида 23 нафар ёшларнинг ҳар бирига 25 сотихдан, жами 8,5 гектар ер майдони ажратилган. Бугун ушбу ёшлар нафақат ўзлари, балки ота-онаси, ака-укалари ва оила аъзолари билан биргаликда далада меҳнат қилиб, бир нечта оиланинг бандлигини таъминлашга эришмоқда. Уларнинг меҳнати натижасида оилалар даромад топиб, фаровон турмуш сари дадил одимламоқда.

Ажратилган унумдор ер майдонларида картошка, карам, помидор, бодринг, сабзи каби турли сабзавот экинлари етиштирилиб, бу маҳсулотлар нафақат оилаларнинг даромад манбаига, балки маҳаллий бозорни тўлдиришга ҳам муносиб ҳисса бўлиб қўшилмоқда.

Маълумот ўрнида айтиш жоизки, ёшларга ер ажратиш орқали бандлигини таъминлаш ва даромадларини ошириш мақсадида маҳаллалардаги ишсиз ёшлар рўйхати шакллантирилиб, туман захирасидаги 400 гектар ер майдонлари 1104 нафар ёшларга ажратиб берилган эди.

Бугунги кунда бу ерларнинг 100 фоизи ўзлаштирилиб, турли экинлар экилди. Хусусан, 20,6 гектар ер майдонига картошка, 93,6 гектар ер майдонига полиз экинлари, 105 гектар ер майдонига донли экинлар, салкам 50 гектар майдонга сабзавот экинлари, 128 гектар майдонга эса бошқа экинлар экилиб, юқори ҳосил ва мўмай даромад олинмоқда. Бу нафақат ёшларга барқарор даромад манбаи бўлиб хизмат қилмоқда, балки туманда озиқ-овқат хавфсизлигини таъминлаш, ички бозорни тоза ва сифатли маҳсулотлар билан тўлдиришга ҳам катта ёрдам бермоқда.

Яна бир эътиборга молик жиҳат шуки, 2025 йилда ғалладан бўшаган ер майдонларидан 807 нафар ёшларга жами 121 гектар ер майдонлари мавсумий ижара асосида ажратиб берилди. Бу эса ёшларнинг мавсумий бандлигини таъминлаш, уларни қишлоқ хўжалигига кенг жалб қилишда муҳим аҳамият касб этмоқда.

Таъкидлаш жоизки, ёшларга ер ажратиш — уларнинг бандлигини таъминлаш, даромадларини ошириш, маҳаллаларда ижтимоий муҳитни яхшилаш ва энг асосийси, янги ер майдонларини ўзлаштириш орқали қишлоқ хўжалигида самарадорликни оширишнинг муҳим омилидир.

Амударё туманида амалга оширилаётган бу каби амалий ишлар, бу ишларда ёшларнинг фаол иштироки ва ота-оналари билан бирга меҳнат қилиши – давлатимиз раҳбари белгилаб берган эзгу мақсадлар ҳаётга изчил татбиқ этилаётганидан далолатдир.

Бугун кўплаб ёшлар далада меҳнат қилмоқда, оиласига даромад олиб келмоқда, юртимиз равнақига ҳисса қўшмоқда. Шубҳасиз, ёшларимизнинг бу каби фидокорона меҳнати эртанги кунимизни янада фаровон этиб, мамлакатимиз тараққиётида муҳим ўрин эгаллайди.

Чарос Арслонова, туман ҳокимлигининг Ахборот хизмати раҳбари.