Yoshlar uchun ajratilgan yer – farovon hayot sari mustahkam poydevor vazifasini oʻtamoqda

Bugun mamlakatimizda yoshlar kelajagi uchun, ularning oʻz salohiyatini roʻyobga chiqarishi va oilasiga munosib daromad topishi uchun barcha sharoitlar yaratilmoqda. Muhtaram Prezidentimiz tashabbusi bilan qabul qilingan “Yoshlarga yer ajratish orqali ularning daromadlarini oshirish va bandligini taʼminlash, shuningdek, yangi yer maydonlarini oʻzlashtirish chora-tadbirlari toʻgʻrisida”gi qaror hayotga izchil tatbiq etilib, oʻzining yuksak samarasini bermoqda.

Amudaryo tumanining Xolimbeg ovulida mazkur qaror doirasida 23 nafar yoshlarning har biriga 25 sotixdan, jami 8,5 gektar yer maydoni ajratilgan. Bugun ushbu yoshlar nafaqat oʻzlari, balki ota-onasi, aka-ukalari va oila aʼzolari bilan birgalikda dalada mehnat qilib, bir nechta oilaning bandligini taʼminlashga erishmoqda. Ularning mehnati natijasida oilalar daromad topib, farovon turmush sari dadil odimlamoqda.

Ajratilgan unumdor yer maydonlarida kartoshka, karam, pomidor, bodring, sabzi kabi turli sabzavot ekinlari yetishtirilib, bu mahsulotlar nafaqat oilalarning daromad manbaiga, balki mahalliy bozorni toʻldirishga ham munosib hissa boʻlib qoʻshilmoqda.

Maʼlumot oʻrnida aytish joizki, yoshlarga yer ajratish orqali bandligini taʼminlash va daromadlarini oshirish maqsadida mahallalardagi ishsiz yoshlar roʻyxati shakllantirilib, tuman zaxirasidagi 400 gektar yer maydonlari 1104 nafar yoshlarga ajratib berilgan edi.

Bugungi kunda bu yerlarning 100 foizi oʻzlashtirilib, turli ekinlar ekildi. Xususan, 20,6 gektar yer maydoniga kartoshka, 93,6 gektar yer maydoniga poliz ekinlari, 105 gektar yer maydoniga donli ekinlar, salkam 50 gektar maydonga sabzavot ekinlari, 128 gektar maydonga esa boshqa ekinlar ekilib, yuqori hosil va moʻmay daromad olinmoqda. Bu nafaqat yoshlarga barqaror daromad manbai boʻlib xizmat qilmoqda, balki tumanda oziq-ovqat xavfsizligini taʼminlash, ichki bozorni toza va sifatli mahsulotlar bilan toʻldirishga ham katta yordam bermoqda.

Yana bir eʼtiborga molik jihat shuki, 2025-yilda gʻalladan boʻshagan yer maydonlaridan 807 nafar yoshlarga jami 121 gektar yer maydonlari mavsumiy ijara asosida ajratib berildi. Bu esa yoshlarning mavsumiy bandligini taʼminlash, ularni qishloq xoʻjaligiga keng jalb qilishda muhim ahamiyat kasb etmoqda.

Taʼkidlash joizki, yoshlarga yer ajratish — ularning bandligini taʼminlash, daromadlarini oshirish, mahallalarda ijtimoiy muhitni yaxshilash va eng asosiysi, yangi yer maydonlarini oʻzlashtirish orqali qishloq xoʻjaligida samaradorlikni oshirishning muhim omilidir.

Amudaryo tumanida amalga oshirilayotgan bu kabi amaliy ishlar, bu ishlarda yoshlarning faol ishtiroki va ota-onalari bilan birga mehnat qilishi – davlatimiz rahbari belgilab bergan ezgu maqsadlar hayotga izchil tatbiq etilayotganidan dalolatdir.

Bugun koʻplab yoshlar dalada mehnat qilmoqda, oilasiga daromad olib kelmoqda, yurtimiz ravnaqiga hissa qoʻshmoqda. Shubhasiz, yoshlarimizning bu kabi fidokorona mehnati ertangi kunimizni yanada farovon etib, mamlakatimiz taraqqiyotida muhim oʻrin egallaydi.

Charos Arslonova, tuman hokimligining Axborot xizmati rahbari.