Амударё туманида Ўзбекистон Республикаси Сув хўжалиги вазирининг сайёр қабули ўтказилди

25 сентябрь куни Ўзбекистон Республикаси Сув хўжалиги вазири Шавкат Хамраев Амударё туманида оммавий сайёр қабул ўтказди. Ушбу тадбир нафақат ҳудуд аҳолисининг муаммоларини ҳал этиш, балки сув ресурсларидан оқилона фойдаланиш, соҳада олиб борилаётган ислоҳотларни тушунтириш ҳамда жойлардаги амалий муаммоларга ечим топиш учун муҳим мулоқот майдонига айланди.

Туманнинг Чойкўл овулида ташкил этилган сайёр қабулда Қорақалпоғистон Республикаси Вазирлар Кенгаши Раисининг қишлоқ ва сув хўжалиги масалалари бўйича ўринбосари Шуҳрат Тешаев, Амударё тумани ҳокими Собир Хўжаметов, Қорақалпоғистон Республикаси Сув хўжалиги вазири Бахтиёр Юсупов, мутасадди идоралар вакиллари, сув хўжалиги соҳаси мутахассислари, фермер хўжаликлари раҳбарлари ҳамда сув истеъмолчилари, аҳоли вакиллари қатнашди.

Вазир Шавкат Хамраев ўз чиқишида мамлакатимиз сув хўжалиги тизимида амалга оширилаётган кенг кўламли ислоҳотлар ҳақида тўхталиб, Президент ташаббуси билан қабул қилинган янги фармон ва қарорларнинг амалий аҳамиятини атрофлича тушунтирди. Хусусан, сув ресурсларидан самарали фойдаланиш, уларни тежаш ва қайта тақсимлаш, янги технологияларни жорий этиш, мўл ҳосил етиштиришда сувнинг тўғри бошқарилиши ҳал қилувчи омил эканини таъкидлади.

Тадбир очиқ мулоқот шаклида давом эттирилди. Унда ҳудуддаги фермерлар, тадбиркорлар, маҳалла фаоллари ўз муаммолари ва таклифлари билан мурожаат қилдилар. Сув тақчиллиги, ирригация тармоқларини таъмирлаш, суғориш тизимларида электр таъминоти, янги қувурлар тортиш каби масалалар кўтарилди.

Қабул жараёнида жами ўндан ортиқ мурожаат тингланди. Улардан кўпчилигига жойида ҳал этилади. Айрим масалалар эса қўшимча ўрганишни талаб этгани боис, мутасаддиларга аниқ топшириқлар берилди. Жумладан, Қорақалпоғистон Республикаси Сув хўжалиги вазири Бахтиёр Юсупов ва Амударё тумани “Сув етказиб бериш хизмати” давлат муассасаси директори Бахтиёр Давековлар ушбу масалалар ижросига масъул этиб белгиланди.

Қабул якунида иштирокчилар ўз мурожаатлари ижобий ҳал этилганидан мамнун эканликларини билдириб, сув хўжалиги тизими вакилларига миннатдорчилик изҳор қилдилар. “Энг муҳими – бизнинг овозимиз эшитилаётганидан, муаммоларимиз жойида ҳал қилинаётганидан хурсандмиз”, – дея таъкидладилар улар.

Дарҳақиқат, сув – ҳаёт манбаи. Унинг оқилона бошқарилиши нафақат деҳқоннинг мўл ҳосили, балки халқ фаровонлиги ва юрт тараққиёти билан чамбарчас боғлиқ. Туманимизда ўтказилган ушбу сайёр қабул ҳам айнан шу эзгу мақсадларга хизмат қилди.

Бугунги кунда давлатимиз томонидан сув хўжалигини такомиллаштириш, сув тежовчи технологияларни кенг жорий этиш, мавжуд ресурслардан самарали фойдаланиш борасида кенг кўламли ишлар амалга оширилмоқда. Бундай очиқ мулоқотлар эса бу жараённи янада жадаллаштириш, халқ билан тизим мутасаддилари ўртасида бевосита алоқани мустаҳкамлаш учун муҳим омил бўлиб хизмат қилмоқда.

Чарос Арслонова, туман ҳокимлигининг Ахборот хизмати раҳбари.