ИНФОРМАТИКА ФАНИНИНГ БИЛИМДОНИ
Инсоннинг шахс сифатида шаклланишида у ўсиб-улғайган оила муҳитининг ўрни муҳим аҳамиятга эга. Амударё туманининг Босув маҳалласида, зиёли оилада туғилиб-ўсган Жамшид Ражабов феълидаги жамики гўзал фазилатларнинг барчаси, энг аввало, ота-онасидан, қолаверса, тинч ва осуда оила муҳитидан “юққан”.
Оилада 3 нафар фарзанднинг каттаси бўлган Жамшид болалигидан қатъиятли, атрофидагиларга меҳрибон, илмга интилувчан бўлиб ўсди. Мактабда аълочи ўқувчи, оилада укаси ва синглисига меҳрибон, ота-онасига яқин ёрдамчи бўлган қаҳрамонимизга “яхши бола” деб таъриф беришганларида, маҳалладошлари албатта, ота-онасини тилга олишади: “отага қараб ўғил, онага қараб қиз улғаяди, ота-онаси яхши одамлар-да” дея ҳавас қилишади.
ТАЛАБАЛИКДАН УСТОЗЛИККА
Босув маҳалласидаги 26-сонли мактабда информатика фани ўқитувчиси бўлиб ишловчи Акбарали Шомуродов ҳамда ушбу мактабнинг она тили ва адабиёт фани ўқитувчиси Гулсевар Камоловаларнинг тўнғич фарзанди бўлган Жамшид ҳали 1-синфга қадам қўймасидан олдин дадаси билан оила даврасидаги суҳбатлар орқали информатика фанининг мўъжизавий олами ҳақидаги илк тасаввурга эга бўлди. У улғайган сари ана шу тасаввурлар қалбида бу фанга нисбатан меҳр ва иштиёқ уйғотди ва бутун вужуди билан информатика оламининг мўъжизалари ичида яшай бошлади.
Умумтаълим мактабини аъло баҳоларга тугатган Жамшид Ражабов Қорақалпоқ Давлат Университетининг амалий математика факультетига ўқишга кирди.
Интилувчан ва тиришқоқ, ўз устида ишлашдан, ўқиб-изланишдан асло чарчамайдиган Жамшид Университет илмий педагогика жамоасининг эътиборига тушди. У талабалик давридаёқ ўзи танлаган йўналиш бўйича 2022-2023 йилларда, бир вақтнинг ўзида ҳам ўқиб, ҳам Университетнинг Алгоритмлаш ва дастурлаш технологиялари кафедраси кабинет бошлиғи вазифасида фаолият олиб борди. Мазкур кабинет раҳбари сифатида тенгдош талабаларга алгоритмлаш ва дастурлаш технологиялари бўйича амалий машғулотлар ўтказди. 2024 йилда университетни имтиёзли диплом билан тугатган Жамшид Ражабов билимини бойитиш, ўзи танлаган йўналиш бўйича жорий этилаётган инновацион технологиялар, янги ғоялардан хабардорлигини ошириш мақсадида бакалавриат таҳсилидан сўнг 2024 йилда Университетнинг Компьютер тизимлари ва уларнинг дастурий таъминоти мутахассислиги бўйича магистратурага ўқишга кирди.
ЮТУҚЛАР ВА МУВАФФАҚИЯТЛАР
Айни пайтда Жамшид Ражабов магистратура таҳсили билан бирга Амударё тумани Мактабгача ва мактаб таълими бўлими тасарруфидаги 26-сонли мактабда ўқувчиларга информатика фанидан сабоқ бериб келмоқда. У бир вақтнинг ўзида Қорақалпоқ Давлат Университети Ахборот тизимлари ва технологиялари кафедрасида амалиётчи-ўқитувчи сифатида ҳам фаолият олиб бормоқда.
Қайси соҳада бўлмасин, ўз касбининг фидойиси, билимдони бўлган инсонлар ҳамиша қадрланади. Жамшид Ражабов ҳам ёш бўлишига қарамасдан ўз фаолият йўналиши бўйича нафақат 26-сонли мактаб жамоаси, балки Амударё тумани Мактабгача ва мактаб таълими бўлими тасарруфидаги таълим-тарбия муассасалари педагогика жамоаларининг ҳурмат ва эътиборини қозонган билимдон, изланувчан ўқитувчи сифатида эътироф этилади. Боиси, ўзининг педагогик фаолиятини бошлаганига энди икки йил бўлган ёш мутахассис қисқа фурсат ичида, 2024 йилги кузги аттестация натижаларига кўра 2-тоифали, 2025 йилги баҳорги аттестацияда эса 1-тоифали ўқитувчи мақомига эришди. 2024 йилда инглиз тилидан B2 даражадаги, 2025 йилда эса информатика фани бўйича халқаро даражадаги сертификатлар соҳиби бўлди.
ҲУРМАТ ВА ЭҲТИРОМ
Жамшид Ражабов амалиётчи-ўқитувчи сифатида Қорақалпоқ Давлат Университети илмий жамоатчилиги томонидан алоҳида эътибор ва эътирофга сазовор бўлган билимдон мутахассислардан. Унинг саъй-ҳаракатлари билан Университетнинг битирувчи босқич талабаларидан иборат жамоа информатика ва ахборот технологиялари йўналишида битирувчи талаба-ёшлар ўртасида ўтказилган олимпиадада фаол иштирок этишиб, Қорақалпоғистонда фахрли 1-ўринни, Олимпиаданинг Ўзбекистон Республикаси босқичида 5-ўринни эгалладилар.
Яқинда Жамшид Ражабов шахсий ютуқлари ҳақидаги ён дафтарчасига яна бир муваффақиятини қайд этиб қўйди: информатика ва ахборот технологиялари фанидан ўқитувчилар ўртасида ўтказилган олимпиадада туман ва Қорақалпоғистон Республикаси босқичларида 1-ўринни эгаллаб, мазкур олимпиаданинг Ўзбекистон Республикаси босқичига йўлланма олди.
Орамизда ўз касбининг фидойилари жуда кўп. Уларнинг барчасига қалбимда чексиз ҳурмат ва эҳтиром сақлаган ҳолда ўз ҳаётини таълим-тарбия соҳасининг барқарор ривожи, ёш авлодни миллий-маънавий қадриятларга, истиқлол ғояларига садоқат, ватанпарвар ва халқпарвар, билимдон инсонлар қилиб тарбиялашдек ниҳоятда масъулиятли ва шарафли ишга бағишлаган, қалбларини келажакка дахлдорлик туйғуси билан зийнатлаган Жамшид Ражабов ва у каби фидойи ўқитувчи ва мураббийларга чин дилдан таъзим қиламан. Зотан,
Улардир ҳаётнинг чин меъморлари,
Феълимиз кенг қилган, тилимиз ширин.
Парвозга шайлаган лочин-сорлари,
Обод этаётир Она Юрт бағрин!
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
