INFORMATIKA FANINING BILIMDONI
Insonning shaxs sifatida shakllanishida u oʻsib-ulgʻaygan oila muhitining oʻrni muhim ahamiyatga ega. Amudaryo tumanining Bosuv mahallasida, ziyoli oilada tugʻilib-oʻsgan Jamshid Rajabov feʼlidagi jamiki goʻzal fazilatlarning barchasi, eng avvalo, ota-onasidan, qolaversa, tinch va osuda oila muhitidan “yuqqan”.
Oilada 3 nafar farzandning kattasi boʻlgan Jamshid bolaligidan qatʼiyatli, atrofidagilarga mehribon, ilmga intiluvchan boʻlib oʻsdi. Maktabda aʼlochi oʻquvchi, oilada ukasi va singlisiga mehribon, ota-onasiga yaqin yordamchi boʻlgan qahramonimizga “yaxshi bola” deb taʼrif berishganlarida, mahalladoshlari albatta, ota-onasini tilga olishadi: “otaga qarab oʻgʻil, onaga qarab qiz ulgʻayadi, ota-onasi yaxshi odamlar-da” deya havas qilishadi.
TALABALIKDAN USTOZLIKKA
Bosuv mahallasidagi 26-sonli maktabda informatika fani oʻqituvchisi boʻlib ishlovchi Akbarali Shomurodov hamda ushbu maktabning ona tili va adabiyot fani oʻqituvchisi Gulsevar Kamolovalarning toʻngʻich farzandi boʻlgan Jamshid hali 1-sinfga qadam qoʻymasidan oldin dadasi bilan oila davrasidagi suhbatlar orqali informatika fanining moʻʼjizaviy olami haqidagi ilk tasavvurga ega boʻldi. U ulgʻaygan sari ana shu tasavvurlar qalbida bu fanga nisbatan mehr va ishtiyoq uygʻotdi va butun vujudi bilan informatika olamining moʻʼjizalari ichida yashay boshladi.
Umumtaʼlim maktabini aʼlo baholarga tugatgan Jamshid Rajabov Qoraqalpoq Davlat Universitetining amaliy matematika fakultetiga oʻqishga kirdi.
Intiluvchan va tirishqoq, oʻz ustida ishlashdan, oʻqib-izlanishdan aslo charchamaydigan Jamshid Universitet ilmiy pedagogika jamoasining eʼtiboriga tushdi. U talabalik davridayoq oʻzi tanlagan yoʻnalish boʻyicha 2022-2023-yillarda, bir vaqtning oʻzida ham oʻqib, ham Universitetning Algoritmlash va dasturlash texnologiyalari kafedrasi kabinet boshligʻi vazifasida faoliyat olib bordi. Mazkur kabinet rahbari sifatida tengdosh talabalarga algoritmlash va dasturlash texnologiyalari boʻyicha amaliy mashgʻulotlar oʻtkazdi. 2024-yilda universitetni imtiyozli diplom bilan tugatgan Jamshid Rajabov bilimini boyitish, oʻzi tanlagan yoʻnalish boʻyicha joriy etilayotgan innovatsion texnologiyalar, yangi gʻoyalardan xabardorligini oshirish maqsadida bakalavriat tahsilidan soʻng 2024-yilda Universitetning Kompyuter tizimlari va ularning dasturiy taʼminoti mutaxassisligi boʻyicha magistraturaga oʻqishga kirdi.
YuTUQLAR VA MUVAFFAQIYaTLAR
Ayni paytda Jamshid Rajabov magistratura tahsili bilan birga Amudaryo tumani Maktabgacha va maktab taʼlimi boʻlimi tasarrufidagi 26-sonli maktabda oʻquvchilarga informatika fanidan saboq berib kelmoqda. U bir vaqtning oʻzida Qoraqalpoq Davlat Universiteti Axborot tizimlari va texnologiyalari kafedrasida amaliyotchi-oʻqituvchi sifatida ham faoliyat olib bormoqda.
Qaysi sohada boʻlmasin, oʻz kasbining fidoyisi, bilimdoni boʻlgan insonlar hamisha qadrlanadi. Jamshid Rajabov ham yosh boʻlishiga qaramasdan oʻz faoliyat yoʻnalishi boʻyicha nafaqat 26-sonli maktab jamoasi, balki Amudaryo tumani Maktabgacha va maktab taʼlimi boʻlimi tasarrufidagi taʼlim-tarbiya muassasalari pedagogika jamoalarining hurmat va eʼtiborini qozongan bilimdon, izlanuvchan oʻqituvchi sifatida eʼtirof etiladi. Boisi, oʻzining pedagogik faoliyatini boshlaganiga endi ikki yil boʻlgan yosh mutaxassis qisqa fursat ichida, 2024-yilgi kuzgi attestatsiya natijalariga koʻra 2-toifali, 2025-yilgi bahorgi attestatsiyada esa 1-toifali oʻqituvchi maqomiga erishdi. 2024-yilda ingliz tilidan B2 darajadagi, 2025-yilda esa informatika fani boʻyicha xalqaro darajadagi sertifikatlar sohibi boʻldi.
HURMAT VA EHTIROM
Jamshid Rajabov amaliyotchi-oʻqituvchi sifatida Qoraqalpoq Davlat Universiteti ilmiy jamoatchiligi tomonidan alohida eʼtibor va eʼtirofga sazovor boʻlgan bilimdon mutaxassislardan. Uning saʼy-harakatlari bilan Universitetning bitiruvchi bosqich talabalaridan iborat jamoa informatika va axborot texnologiyalari yoʻnalishida bitiruvchi talaba-yoshlar oʻrtasida oʻtkazilgan olimpiadada faol ishtirok etishib, Qoraqalpogʻistonda faxrli 1-oʻrinni, Olimpiadaning Oʻzbekiston Respublikasi bosqichida 5-oʻrinni egalladilar.
Yaqinda Jamshid Rajabov shaxsiy yutuqlari haqidagi yon daftarchasiga yana bir muvaffaqiyatini qayd etib qoʻydi: informatika va axborot texnologiyalari fanidan oʻqituvchilar oʻrtasida oʻtkazilgan olimpiadada tuman va Qoraqalpogʻiston Respublikasi bosqichlarida 1-oʻrinni egallab, mazkur olimpiadaning Oʻzbekiston Respublikasi bosqichiga yoʻllanma oldi.
Oramizda oʻz kasbining fidoyilari juda koʻp. Ularning barchasiga qalbimda cheksiz hurmat va ehtirom saqlagan holda oʻz hayotini taʼlim-tarbiya sohasining barqaror rivoji, yosh avlodni milliy-maʼnaviy qadriyatlarga, istiqlol gʻoyalariga sadoqat, vatanparvar va xalqparvar, bilimdon insonlar qilib tarbiyalashdek nihoyatda masʼuliyatli va sharafli ishga bagʻishlagan, qalblarini kelajakka daxldorlik tuygʻusi bilan ziynatlagan Jamshid Rajabov va u kabi fidoyi oʻqituvchi va murabbiylarga chin dildan taʼzim qilaman. Zotan,
Ulardir hayotning chin meʼmorlari,
Feʼlimiz keng qilgan, tilimiz shirin.
Parvozga shaylagan lochin-sorlari,
Obod etayotir Ona Yurt bagʻrin!
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
