Қишлоқ хўжалиги вазири амалий ташриф билан Амударё туманида бўлди

Қорақалпоғистон Республикасига ишчи ташриф билан келган Ўзбекистон Республикаси Қишлоқ хўжалиги вазири Иброҳим Абдураҳмонов Вазирлар Кенгаши раиси Фарҳод Эрманов ҳамроҳлигида ҳудудларда бўлиб, қишлоқ хўжалиги соҳасида амалга оширилаётган ишлар билан яқиндан танишди.

Ташриф дастурига кўра меҳмонлар Амударё тумани Жайхун овули ҳудудида жойлашган “Экотекс кластер” корхонасига қарашли Қипчоқ пахта қабул қилиш масканида бўлди. Бу ерда пахта терими жараёни, уни қабул қилиш, саралаш ва қайта ишлаш ишлари билан танишди.

Қайд этиш жоизки, қабул масканларида қишлоқ хўжалиги маҳсулотларини тарозида тортиш жараёнларини сунъий интеллект ёрдамида назорат қилувчи замонавий “АгроТарози” тизими йўлга қўйилган. Далаларда йиғилган ҳосил ушбу тизим орқали аниқ ва шаффоф тарзда сақлаш масканларига қабул қилинмоқда. Шунингдек, махсус лабораторияларда пахтанинг намлиги ва сифати текширилиб, тегишли талабларга мослиги баҳоланмоқда.

Пахта йиғим-терими уюшқоқлик билан олиб борилаётган айни кунларда қабул масканларида ҳам иш қайнаган пайт. Вазир Иброҳим Абдураҳмонов йиғим-терим мавсумида меҳнат қилаётган ишчи-ходимлар билан суҳбатлашиб, уларга яратилган шарт-шароитларни кўздан кечирди.

Шу тариқа Қорақалпоғистонга ташриф чоғида агротехник тадбирларнинг самарадорлиги, пахтачиликда замонавий технологиялардан фойдаланиш ҳамда қабул жараёнларида шаффофлик ва сифат назорати масалалари алоҳида эътибор марказида бўлди.

Ташриф доирасида раҳбарлар Чойкўл овули ҳудудидаги “Чойкўл дўстлик” фермер хўжалигига қарашли далаларда амалга оширилаётган агротехник жараёнлар билан танишди. Ушбу далаларга хориждан келтирилган пахта навлари замонавий агротехнологиялар асосида экилган. Чигит қўшқатор усулида, плёнка остига экилди ва ғўза ниҳолларини тўлиқ парваришлаш ишлари махсус услубий қўлланмалар талаблари асосида ташкил этилди. Агротехник тадбирларнинг тизимли йўлга қўйилгани ва дефолиация жараёнининг белгиланган стандартларга мувофиқ амалга оширилгани натижасида, бугун далаларда мўл ҳосил тўпланди ва ҳосилдорлик ҳар гектардан 60 центнерни ташкил этиши кутилмоқда.

Бугунги кунда пахта териш ишлари жадал суръатларда олиб борилмоқда. Хомашё йиғиб олингач, иккинчи терим учун зарур агротехник тадбирлар жорий этилиши режалаштирилмоқда. Навбатдаги теримдан ҳам юқори миқдорда ҳосил олиниши тахмин қилинмоқда.

Ташриф давомида расмийлар томонидан бугунги кунда соҳада амалга оширилаётган ислоҳотлар натижаси ва ҳудудларда агротехник амалиётларнинг ҳолати муҳокама қилинди. Шунингдек, йиғим-терим жараёнларида муносиб иштирок этаётган соҳа фидойиларига эсдалик совғалари топширилди.

Мулоқот чоғида вазир Иброҳим Абдураҳмонов дала майдонида олиб борилаётган кенг кўламли ишларни юқори баҳолаб, келгуси мавсумда ҳам бундай ёндашувларни янада кенгайтириш, қатор ораларига эса зира экиб, ҳосилни кўпайтириш бўйича тегишли тавсияларини берди.

Меҳмонлар туманда олиб борилаётган пахта терими жараёнлари ва фермер хўжаликларидаги натижалар билан ҳам яқиндан танишдилар.

Ташриф давомида меғмонлар туманнинг Жумуровул маҳалласи ҳудудидаги “Ҳайтаков Улуғбек” фермер хўжалигининг 10 гектарлик дала майдонида бўлди. Бу ерда хорижий ғўза нави қатор ораси 76 сантиметр бўлган схемада экилиб, агротехник тадбирлар ўз вақтида ва сифатли амалга оширилгани туфайли мўл ҳосил етиштирилган.

Айни пайтда терим машиналари ёрдамида йиғим-терим жараёнлари қизғин давом этмоқда. Ҳосилдорлик гектарига 60 центнерни ташкил этиши кутилмоқда. Далаларда ҳеч қандай бегона ўтнинг йўқлиги, қишлоқ хўжалиги ишларининг тизимли ва самарали йўлга қўйилганидан далолат беради. Вазир Иброҳим Абдураҳмонов ҳам бу ҳолатни юқори баҳолаб, фермер меҳнатини алоҳида эътироф этди.

Шунингдек, масъуллар Жумуртов шаҳарчаси ҳудудида жойлашган “Умид Азимхўжа” фермер хўжалиги фаолияти билан ҳам танишдилар. Бу ерда ҳам ғўзанинг хорижий нави қатор ораси 76 сантиметрлик схема асосида экилган. Айни пайтда гектарига 70 центнердан ҳосил олинган бўлиб, фермернинг режаси — 80 центнердан ҳам юқори ҳосилга эришиш. Бу кўрсаткич Қорақалпоғистон шароитида аввал кузатилмаган юқори натижадир. Вазир илм ва инновацияни амалиётга уйғунлаштиришнинг аҳамияти ҳақида сўз юритар экан, фермер хўжалигидаги меҳнат самарасини ҳам мамнуният билан эътироф этди.

Амударё туманидаги фермер хўжаликлари далаларида жадал суръатларда олиб борилаётган пахта терими соҳадаги ислоҳотлар самарасини яққол намоён этмоқда. Замонавий агротехник тадбирлар, илғор агротехнологиялар ҳамда фермерларнинг самарали меҳнати туфайли эришилаётган натижалар мамлакатимиз қишлоқ хўжалигида янги тарихий босқични бошлаб бермоқда.

Чарос Арслонова, туман ҳокимлигининг Ахборот хизмати раҳбари.