Qishloq xoʻjaligi vaziri amaliy tashrif bilan Amudaryo tumanida boʻldi

Qoraqalpogʻiston Respublikasiga ishchi tashrif bilan kelgan Oʻzbekiston Respublikasi Qishloq xoʻjaligi vaziri Ibrohim Abdurahmonov Vazirlar Kengashi raisi Farhod Ermanov hamrohligida hududlarda boʻlib, qishloq xoʻjaligi sohasida amalga oshirilayotgan ishlar bilan yaqindan tanishdi.

Tashrif dasturiga koʻra mehmonlar Amudaryo tumani Jayxun ovuli hududida joylashgan “Ekoteks klaster” korxonasiga qarashli Qipchoq paxta qabul qilish maskanida boʻldi. Bu yerda paxta terimi jarayoni, uni qabul qilish, saralash va qayta ishlash ishlari bilan tanishdi.

Qayd etish joizki, qabul maskanlarida qishloq xoʻjaligi mahsulotlarini tarozida tortish jarayonlarini sunʼiy intellekt yordamida nazorat qiluvchi zamonaviy “AgroTarozi” tizimi yoʻlga qoʻyilgan. Dalalarda yigʻilgan hosil ushbu tizim orqali aniq va shaffof tarzda saqlash maskanlariga qabul qilinmoqda. Shuningdek, maxsus laboratoriyalarda paxtaning namligi va sifati tekshirilib, tegishli talablarga mosligi baholanmoqda.

Paxta yigʻim-terimi uyushqoqlik bilan olib borilayotgan ayni kunlarda qabul maskanlarida ham ish qaynagan payt. Vazir Ibrohim Abdurahmonov yigʻim-terim mavsumida mehnat qilayotgan ishchi-xodimlar bilan suhbatlashib, ularga yaratilgan shart-sharoitlarni koʻzdan kechirdi.

Shu tariqa Qoraqalpogʻistonga tashrif chogʻida agrotexnik tadbirlarning samaradorligi, paxtachilikda zamonaviy texnologiyalardan foydalanish hamda qabul jarayonlarida shaffoflik va sifat nazorati masalalari alohida eʼtibor markazida boʻldi.

Tashrif doirasida rahbarlar Choykoʻl ovuli hududidagi “Choykoʻl doʻstlik” fermer xoʻjaligiga qarashli dalalarda amalga oshirilayotgan agrotexnik jarayonlar bilan tanishdi. Ushbu dalalarga xorijdan keltirilgan paxta navlari zamonaviy agrotexnologiyalar asosida ekilgan. Chigit qoʻshqator usulida, plyonka ostiga ekildi va gʻoʻza nihollarini toʻliq parvarishlash ishlari maxsus uslubiy qoʻllanmalar talablari asosida tashkil etildi. Agrotexnik tadbirlarning tizimli yoʻlga qoʻyilgani va defoliatsiya jarayonining belgilangan standartlarga muvofiq amalga oshirilgani natijasida, bugun dalalarda moʻl hosil toʻplandi va hosildorlik har gektardan 60 tsentnerni tashkil etishi kutilmoqda.

Bugungi kunda paxta terish ishlari jadal surʼatlarda olib borilmoqda. Xomashyo yigʻib olingach, ikkinchi terim uchun zarur agrotexnik tadbirlar joriy etilishi rejalashtirilmoqda. Navbatdagi terimdan ham yuqori miqdorda hosil olinishi taxmin qilinmoqda.

Tashrif davomida rasmiylar tomonidan bugungi kunda sohada amalga oshirilayotgan islohotlar natijasi va hududlarda agrotexnik amaliyotlarning holati muhokama qilindi. Shuningdek, yigʻim-terim jarayonlarida munosib ishtirok etayotgan soha fidoyilariga esdalik sovgʻalari topshirildi.

Muloqot chogʻida vazir Ibrohim Abdurahmonov dala maydonida olib borilayotgan keng koʻlamli ishlarni yuqori baholab, kelgusi mavsumda ham bunday yondashuvlarni yanada kengaytirish, qator oralariga esa zira ekib, hosilni koʻpaytirish boʻyicha tegishli tavsiyalarini berdi.

Mehmonlar tumanda olib borilayotgan paxta terimi jarayonlari va fermer xoʻjaliklaridagi natijalar bilan ham yaqindan tanishdilar.

Tashrif davomida megʻmonlar tumanning Jumurovul mahallasi hududidagi “Haytakov Ulugʻbek” fermer xoʻjaligining 10 gektarlik dala maydonida boʻldi. Bu yerda xorijiy gʻoʻza navi qator orasi 76 santimetr boʻlgan sxemada ekilib, agrotexnik tadbirlar oʻz vaqtida va sifatli amalga oshirilgani tufayli moʻl hosil yetishtirilgan.

Ayni paytda terim mashinalari yordamida yigʻim-terim jarayonlari qizgʻin davom etmoqda. Hosildorlik gektariga 60 tsentnerni tashkil etishi kutilmoqda. Dalalarda hech qanday begona oʻtning yoʻqligi, qishloq xoʻjaligi ishlarining tizimli va samarali yoʻlga qoʻyilganidan dalolat beradi. Vazir Ibrohim Abdurahmonov ham bu holatni yuqori baholab, fermer mehnatini alohida eʼtirof etdi.

Shuningdek, masʼullar Jumurtov shaharchasi hududida joylashgan “Umid Azimxoʻja” fermer xoʻjaligi faoliyati bilan ham tanishdilar. Bu yerda ham gʻoʻzaning xorijiy navi qator orasi 76 santimetrlik sxema asosida ekilgan. Ayni paytda gektariga 70 tsentnerdan hosil olingan boʻlib, fermerning rejasi — 80 tsentnerdan ham yuqori hosilga erishish. Bu koʻrsatkich Qoraqalpogʻiston sharoitida avval kuzatilmagan yuqori natijadir. Vazir ilm va innovatsiyani amaliyotga uygʻunlashtirishning ahamiyati haqida soʻz yuritar ekan, fermer xoʻjaligidagi mehnat samarasini ham mamnuniyat bilan eʼtirof etdi.

Amudaryo tumanidagi fermer xoʻjaliklari dalalarida jadal surʼatlarda olib borilayotgan paxta terimi sohadagi islohotlar samarasini yaqqol namoyon etmoqda. Zamonaviy agrotexnik tadbirlar, ilgʻor agrotexnologiyalar hamda fermerlarning samarali mehnati tufayli erishilayotgan natijalar mamlakatimiz qishloq xoʻjaligida yangi tarixiy bosqichni boshlab bermoqda.

Charos Arslonova, tuman hokimligining Axborot xizmati rahbari.