ТУМАН ПРОКУРАТУРАСИ ТОМОНИДАН ИЖТИМОИЙ СОҲА ОБЪЕКТЛАРИНИНГ КУЗ-ҚИШ МАВСУМИГА ТАЙЁРГАРЛИК ҲОЛАТИ ЎРГАНИЛМОҚДА
Айни кунларда мамлакатимизнинг деярли барча ҳудудларида куз-қиш иситиш мавсумига тараддуд кўриш, мавсумни талофатларсиз ўтказиш, идора ва ташкилотлар, айниқса, ижтимоий соҳа объектларидаги иситиш тизимларининг яроқлилик ҳолатини ўрганиш ишлари олиб борилмоқда.
Бу борадаги ишлар Амударё туман прокуратураси томонидан тизимли равишда йўлга қўйилган. Таълим-тарбия ва тиббиёт муассасаларида амалга оширилаётган назорат тадбирлари жараёнида аниқланган камчиликлар жойида бартараф этилмоқда. Шу билан бирга мазкур муассасаларни қаттиқ ёқилғи маҳсулотлари билан таъминлашдаги муаммолар юзасидан тегишли ташкилотларга топшириқлар берилмоқда.
Жорий йилнинг 22 октябрь санасида Амударё туман прокурори Баҳром Машарипов раҳбарлигида туман Тиббиёт бирлашмаси тасарруфидаги оилавий поликлиникалар, марказий касалхона бўлимлари, Кўп тармоқли марказий поликлиниканинг куз-қиш мавсумига тайёргарлик ҳолати бўйича назорат ишлари олиб борилди.
Назорат тадбирлари жараёнида соғлиқни сақлаш тизими объектларида иситиш тизимлари, электр ва табиий газ тармоқларида узилишлар ҳамда носозликлар содир бўлмаслиги чоралари кўрилганлиги, шунингдек, куз-қиш мавсумида аҳолига тиббий хизмат кўрсатиш учун зарур имкониятларнинг мавжудлигига алоҳида эътибор қаратилди.
Назорат тадбирлари давомида Тиббиёт бирлашмаси биноларининг техник таъмирланиши билан боғлиқ ҳолатлар ҳам ўрганилди. Хусусан, иситиш қозонларининг юқори даражадаги ҳароратга чидамлилиги, бинолар ичкарисидаги иситиш тизимлари сифати, электр энергияси тармоқларининг белгиланган юкламага мос ўрнатилганлиги, тиббий ходимлар ўз касбий фаолиятини олиб боришлари учун замонавий талаблар асосида шароитлар яратилганлиги ҳам таҳлил қилиниб, аниқланган камчиликларни бартараф этиш бўйича бирлашма масъулларига зарур топшириқ ва тавсиялар берилди.
Шунингдек, туман прокурори Баҳром Машарипов раҳбарлигидаги назорат гуруҳи аъзолари Тиббиёт бирлашмаси тасарруфидаги 5-сонли Куюк кўпир оилавий поликлиникасида амалга оширилган куз-қиш мавсумига тайёргарлик ишлари билан ҳам яқиндан танишдилар.
Мазкур оилавий поликлиника биноси қаттиқ ёқилғи — кўмир маҳсулоти билан иситилади. Шу боис, муассаса раҳбарияти томонидан куз-қиш мавсумига тайёргарлик совуқ ва изғиринли кунлар бошланмасидан аввал сифатли кўмир маҳсулотини ғамлашдан бошланади. Ўрганишлар жараёнида 2025-2026 йилги иситиш мавсуми учун ғамланган кўмир маҳсулотининг сифати ҳамда иситиш қозонларининг юқори ҳароратга чидамлилиги, қозонхона мўриларининг шайлиги ҳолати кўздан кечирилди. Шу билан бирга, ғамлаб қўйилган кўмир маҳсулоти таркибидаги кўмир кукуни миқдори меъёрдагидан кўпроқ эканлигига эътибор қаратилиб, ижтимоий соҳа объектларига кўмир етказиб берувчи таъминотчи ташкилотларга бу борада тегишли тақдимномалар киритилиши маълум қилинди.
Ҳадемай совуқ ва изғиринли кунлар бошланади. Куз-қиш мавсумини хавф-хатардан холи, талофатларсиз ўтказиш, айниқса, соғлиқни сақлаш тизими тасарруфидаги биноларнинг иситиш тизимларини юз фоиз мавсумга шай ҳолатга келтириш соҳа масъулларининг бугунги кундаги энг долзарб вазифасидир. Айни пайтда туман прокурори Баҳром Машарипов раҳбарлигида ижтимоий соҳа объектларининг куз-қиш мавсумига тайёргарлик ҳолати бўйича назорат тадбирлари давом этмоқда.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
