TUMAN PROKURATURASI TOMONIDAN IJTIMOIY SOHA OBʼEKTLARINING KUZ-QISh MAVSUMIGA TAYYoRGARLIK HOLATI OʻRGANILMOQDA

Ayni kunlarda mamlakatimizning deyarli barcha hududlarida kuz-qish isitish mavsumiga taraddud koʻrish, mavsumni talofatlarsiz oʻtkazish, idora va tashkilotlar, ayniqsa, ijtimoiy soha obʼektlaridagi isitish tizimlarining yaroqlilik holatini oʻrganish ishlari olib borilmoqda.

Bu boradagi ishlar Amudaryo tuman prokuraturasi tomonidan tizimli ravishda yoʻlga qoʻyilgan. Taʼlim-tarbiya va tibbiyot muassasalarida amalga oshirilayotgan nazorat tadbirlari jarayonida aniqlangan kamchiliklar joyida bartaraf etilmoqda. Shu bilan birga mazkur muassasalarni qattiq yoqilgʻi mahsulotlari bilan taʼminlashdagi muammolar yuzasidan tegishli tashkilotlarga topshiriqlar berilmoqda.

Joriy yilning 22-oktyabr sanasida Amudaryo tuman prokurori Bahrom Masharipov rahbarligida tuman Tibbiyot birlashmasi tasarrufidagi oilaviy poliklinikalar, markaziy kasalxona boʻlimlari, Koʻp tarmoqli markaziy poliklinikaning kuz-qish mavsumiga tayyorgarlik holati boʻyicha nazorat ishlari olib borildi.

Nazorat tadbirlari jarayonida sogʻliqni saqlash tizimi obʼektlarida isitish tizimlari, elektr va tabiiy gaz tarmoqlarida uzilishlar hamda nosozliklar sodir boʻlmasligi choralari koʻrilganligi, shuningdek, kuz-qish mavsumida aholiga tibbiy xizmat koʻrsatish uchun zarur imkoniyatlarning mavjudligiga alohida eʼtibor qaratildi.

Nazorat tadbirlari davomida Tibbiyot birlashmasi binolarining texnik taʼmirlanishi bilan bogʻliq holatlar ham oʻrganildi. Xususan, isitish qozonlarining yuqori darajadagi haroratga chidamliligi, binolar ichkarisidagi isitish tizimlari sifati, elektr energiyasi tarmoqlarining belgilangan yuklamaga mos oʻrnatilganligi, tibbiy xodimlar oʻz kasbiy faoliyatini olib borishlari uchun zamonaviy talablar asosida sharoitlar yaratilganligi ham tahlil qilinib, aniqlangan kamchiliklarni bartaraf etish boʻyicha birlashma masʼullariga zarur topshiriq va tavsiyalar berildi.

Shuningdek, tuman prokurori Bahrom Masharipov rahbarligidagi nazorat guruhi aʼzolari Tibbiyot birlashmasi tasarrufidagi 5-sonli Kuyuk koʻpir oilaviy poliklinikasida amalga oshirilgan kuz-qish mavsumiga tayyorgarlik ishlari bilan ham yaqindan tanishdilar.

Mazkur oilaviy poliklinika binosi qattiq yoqilgʻi — koʻmir mahsuloti bilan isitiladi. Shu bois, muassasa rahbariyati tomonidan kuz-qish mavsumiga tayyorgarlik sovuq va izgʻirinli kunlar boshlanmasidan avval sifatli koʻmir mahsulotini gʻamlashdan boshlanadi. Oʻrganishlar jarayonida 2025-2026-yilgi isitish mavsumi uchun gʻamlangan koʻmir mahsulotining sifati hamda isitish qozonlarining yuqori haroratga chidamliligi, qozonxona moʻrilarining shayligi holati koʻzdan kechirildi. Shu bilan birga, gʻamlab qoʻyilgan koʻmir mahsuloti tarkibidagi koʻmir kukuni miqdori meʼyordagidan koʻproq ekanligiga eʼtibor qaratilib, ijtimoiy soha obʼektlariga koʻmir yetkazib beruvchi taʼminotchi tashkilotlarga bu borada tegishli taqdimnomalar kiritilishi maʼlum qilindi.

Hademay sovuq va izgʻirinli kunlar boshlanadi. Kuz-qish mavsumini xavf-xatardan xoli, talofatlarsiz oʻtkazish, ayniqsa, sogʻliqni saqlash tizimi tasarrufidagi binolarning isitish tizimlarini yuz foiz mavsumga shay holatga keltirish soha masʼullarining bugungi kundagi eng dolzarb vazifasidir. Ayni paytda tuman prokurori Bahrom Masharipov rahbarligida ijtimoiy soha obʼektlarining kuz-qish mavsumiga tayyorgarlik holati boʻyicha nazorat tadbirlari davom etmoqda.

Robiya Yoʻldosheva.