Амударёда иқтисодий тараққиёт ва шаффофлик сари дадил қадам

Бугунги кунда мамлакатимиз миқёсида иқтисодиётнинг барқарор ўсишини таъминлаш, яширин иқтисодиётни қисқартириш ва соҳада шаффофликни кучайтириш давлат сиёсатининг устувор йўналишларидан бири бўлиб қолмоқда. Амударё туманида ҳам мазкур йўналишда изчил ишлар олиб борилмоқда.

Амударё тумани ҳокимлигининг мажлислар залида туманни ижтимоий-иқтисодий ривожлантириш дастурлари ижросини таъминлаш ҳамда яширин иқтисодиётни қисқартириш чора-тадбирларининг танқидий муҳокамасига бағишланган йиғилиш бўлиб ўтди.

Тадбирда Қорақалпоғистон Республикаси Жўқорғи Кенгесининг Саноат, қурилиш, транспорт ва алоқа масалалари қўмитаси раиси Ислам Сдиқов, туман ҳокими Собир Хўжаметов, туман ҳокимининг биринчи ўринбосари Фахриддин Юсупов, тегишли ташкилот ва муассасалар раҳбарлари, тижорат банклари вакиллари, шунингдек ҳоким ёрдамчилари иштирок этдилар.

Йиғилишда туманнинг иқтисодий кўрсаткичлари, сармоя жалб этиш ҳолати, тадбиркорликни ривожлантириш, янги иш ўринларини яратиш, солиққа тортиш тизимидаги шаффофлик масалалари кенг таҳлил қилинди.

Ислам Сдиқов йиғилишда сўзга чиқиб, яширин иқтисодиётнинг миллий иқтисодий тараққиётга салбий таъсири, уни бартараф этиш борасида амалга оширилаётган ислоҳотлар, замонавий назорат механизмларини жорий этиш зарурати ҳақида сўз юритди. У шунингдек, жойларда бу борадаги ишларни тизимли равишда кучайтириш, ҳар бир раҳбар масалага масъулият билан ёндашиши лозимлигини таъкидлади.

Мамлакатимизда яширин иқтисодиёт даражасини пасайтириш, тадбиркорлик фаолиятини юритиш учун, шу жумладан тартибга солиш ва маъмурий юкни камайтириш ҳисобига тенг рақобат шароитларини яратиш, солиқ қонунчилиги талабларига риоя қилиш тартиб-таомилларини автоматлаштириш ва унинг тартибини соддалаштириш борасида самарали ислоҳотлар амалга оширилмоқда. Давлатимиз раҳбарининг “Яширин иқтисодиётни қисқартириш ва солиқ органлари фаолияти самарадорлигини ошириш бўйича ташкилий чора-тадбирлар тўғрисида”ги фармони бу борада муҳим дастуруламал бўлиб хизмат қилмоқда.

Йиғилишда туман ҳокими Собир Хўжаметов туманда яширин иқтисодиётни аниқлаш ва олдини олиш бўйича амалга оширилаётган ишлар, эришилган натижалар ҳамда мавжуд муаммолар ҳақида батафсил тўхталди.

Таъкидланганидек, иқтисодий жараёнларда шаффофликни таъминлаш, солиққа тортиш тизимини соддалаштириш, маҳаллий ишлаб чиқарувчиларни қўллаб-қувватлаш орқали норасмий фаолиятни қонунийлаштириш бўйича комплекс чоралар амалга оширилмоқда.

Муҳокама жараёнида соҳа раҳбарлари томонидан ўз тармоқлари бўйича муаммолар баён қилиниб, уларни ҳал қилиш юзасидан таклифлар билдирилди. Ҳар бир масъулга натижадорлик, таҳлилий ёндашув ва аниқ режаларга эга бўлиш талаби қўйилди.

Йиғилиш якунида аниқланган камчиликларни бартараф этиш, иқтисодий ислоҳотларнинг амалий самарасини ошириш, аҳоли фаровонлигини юксалтиришга қаратилган топшириқ ва тавсиялар белгилаб олинди.

Амударё туманида иқтисодий тараққиёт ва шаффофлик сари дадил қадамлар ташланмоқда. Зеро, бугун амалга оширилаётган ислоҳотлар эртанги куннинг барқарор иқтисодий пойдеворини яратиш, ҳалол меҳнат ва қонун устуворлиги тамойилларини мустаҳкамлашга хизмат қилади.

Чарос Арслонова, туман ҳокимлигининг Ахборот хизмати раҳбари.