Амударё туманида меҳнат миграцияси бўйича семинар бўлиб ўтди

Амударё туман ҳокимлигида “Хавфсиз, тартибли ва қонуний меҳнат миграцияси тизими” мавзусида семинар бўлиб ўтди. Тадбирда Ўзбекистон Республикаси Вазирлар Маҳкамаси ҳузуридаги Миграция агентлиги бошқарма бошлиғи Шоҳруз Хакимов, агентликнинг Қорақалпоғистон Республикаси филиали раҳбари Азамат Ачилов, туман ҳокими ўринбосари Нодирбек Камолов ҳамда тумандаги 49 та “Маҳалла еттиликлари” ва тегишли ташкилотлар вакиллари иштирок этди.

Туман аҳолиси учун долзарб бўлган меҳнат миграцияси масалаларини ўрганиш, хавфсиз механизмларни янада мустаҳкамлаш ва фуқароларнинг хориждаги ҳуқуқий ҳимоясини кучайтириш мақсадида ташкил этилган мазкур семинар жамоатчилик томонидан ҳам катта қизиқиш билан кузатилди.

Семинарда Миграция агентлигининг асосий йўналишлари батафсил тушунтирилди. Хусусан, меҳнат миграцияси жараёнларини самарали бошқариш, хорижда ишлаётган фуқароларни ҳисобга олиш ва уларнинг ҳолатини мониторинг қилиш, чет элнинг нуфузли ташкилотлари билан вақтинчалик меҳнат фаолияти бўйича ҳамкорликни ривожлантириш, Ўзбекистоннинг дипломатик ваколатхоналари билан ўзаро ҳамкорликни кенгайтириш, хориждаги ўзбек диаспоралари билан алоқаларни мустаҳкамлаш, фуқароларнинг меҳнат ҳуқуқларини ҳимоя қилиш бўйича янги механизмларни жорий этиш каби тамойиллар агентлик фаолиятининг асосий пойдеворини ташкил қилиши алоҳида таъкидланди.

Бугунги шиддатли даврда миграция жараёнларини қонунийлаштириш, ҳар бир фуқаронинг меҳнат фаолиятини хавфсиз ташкил этиш муҳим аҳамият касб этаётгани, бу борада давлат томонидан кенг кўламли тизимли ислоҳотлар амалга оширилаётгани қайд этилди.

Семинар давомида Миграция агентлиги томонидан амалга оширилаётган бандликни қўллаб-қувватлаш бўйича комплекс жараёнлар ҳақида ҳам батафсил маълумот берилди. Унга кўра хорижий мамлакатларда иш берувчилар билан шартномалар тузиш, ташқи меҳнат миграциясига чиқмоқчи бўлган фуқароларни аниқлаш ва рўйхатга олиш, уларни касбга ва чет тилларига ўқитиш, иш жараёнида мониторинг олиб бориш, фуқароларга ижтимоий ва ҳуқуқий ёрдам кўрсатиш каби йўналишлар меҳнат бозори талабларидан келиб чиқиб амалга оширилмоқда.

Бу борада “Маҳалла еттиликлари”нинг фаол иштироки, хонадонларга кириб борилаётгани, аҳоли билан юзма-юз мулоқотлар орқали мавжуд муаммоларни аниқлаш ишлари ҳам янги тизимнинг самарадорлигини оширмоқда.

Семинарда тақдим этилган рақамлар миграция соҳасида олиб борилаётган ишларнинг қамрови ва натижадорлигини яққол кўрсатиб берди.

2025 йилнинг январь–сентябрь ойларида Миграция агентлиги томонидан 156 минг нафар фуқарога ҳуқуқий, моддий ва ижтимоий ёрдам кўрсатилган, хориждаги иш берувчилар томонидан 1,8 миллион АҚШ доллари миқдоридаги қарздорликлар ундирилиб, фуқароларга етказилган, 352 нафар ватандошнинг шахсни тасдиқловчи ҳужжатлари қайтариб олинган, 46,8 минг нафар фуқаро ижтимоий ёрдамлар билан таъминланган ҳамда 3,7 минг нафар фуқаро моддий ёрдам олган.

Бу натижалар меҳнат миграциясининг тартибга солинган, қонуний ва энг муҳими, хавфсиз бўлиши йўлида амалга оширилаётган изчил ишларнинг амалий тасдиғидир.

Семинарда таъкидлангандек, меҳнат миграциясини тўғри йўлга қўйиш — бу нафақат давлат органларининг вазифаси, балки “Маҳалла еттиликлари”дан тортиб, ҳар бир масъул ташкилотнинг ҳамкорликдаги саъй-ҳаракатларини талаб этади.

Амударёда ўтказилган мазкур учрашув ҳам халқ ва давлат ўртасидаги ўзаро мулоқотнинг янада кучайишига, фуқароларнинг хориждаги меҳнат фаолиятини қонуний асосда ташкил этишига хизмат қилади. Семинарда билдирилган фикр ва таклифлар эса меҳнат миграциясининг янада хавфсиз, тартибли ва тизимли бўлишига мустаҳкам замин яратади.

Чарос Арслонова, туман ҳокимлигининг Ахборот хизмати раҳбари.