Amudaryo tumanida mehnat migratsiyasi boʻyicha seminar boʻlib oʻtdi

Amudaryo tuman hokimligida “Xavfsiz, tartibli va qonuniy mehnat migratsiyasi tizimi” mavzusida seminar boʻlib oʻtdi. Tadbirda Oʻzbekiston Respublikasi Vazirlar Mahkamasi huzuridagi Migratsiya agentligi boshqarma boshligʻi Shohruz Xakimov, agentlikning Qoraqalpogʻiston Respublikasi filiali rahbari Azamat Achilov, tuman hokimi oʻrinbosari Nodirbek Kamolov hamda tumandagi 49 ta “Mahalla yettiliklari” va tegishli tashkilotlar vakillari ishtirok etdi.

Tuman aholisi uchun dolzarb boʻlgan mehnat migratsiyasi masalalarini oʻrganish, xavfsiz mexanizmlarni yanada mustahkamlash va fuqarolarning xorijdagi huquqiy himoyasini kuchaytirish maqsadida tashkil etilgan mazkur seminar jamoatchilik tomonidan ham katta qiziqish bilan kuzatildi.

Seminarda Migratsiya agentligining asosiy yoʻnalishlari batafsil tushuntirildi. Xususan, mehnat migratsiyasi jarayonlarini samarali boshqarish, xorijda ishlayotgan fuqarolarni hisobga olish va ularning holatini monitoring qilish, chet elning nufuzli tashkilotlari bilan vaqtinchalik mehnat faoliyati boʻyicha hamkorlikni rivojlantirish, Oʻzbekistonning diplomatik vakolatxonalari bilan oʻzaro hamkorlikni kengaytirish, xorijdagi oʻzbek diasporalari bilan aloqalarni mustahkamlash, fuqarolarning mehnat huquqlarini himoya qilish boʻyicha yangi mexanizmlarni joriy etish kabi tamoyillar agentlik faoliyatining asosiy poydevorini tashkil qilishi alohida taʼkidlandi.

Bugungi shiddatli davrda migratsiya jarayonlarini qonuniylashtirish, har bir fuqaroning mehnat faoliyatini xavfsiz tashkil etish muhim ahamiyat kasb etayotgani, bu borada davlat tomonidan keng koʻlamli tizimli islohotlar amalga oshirilayotgani qayd etildi.

Seminar davomida Migratsiya agentligi tomonidan amalga oshirilayotgan bandlikni qoʻllab-quvvatlash boʻyicha kompleks jarayonlar haqida ham batafsil maʼlumot berildi. Unga koʻra xorijiy mamlakatlarda ish beruvchilar bilan shartnomalar tuzish, tashqi mehnat migratsiyasiga chiqmoqchi boʻlgan fuqarolarni aniqlash va roʻyxatga olish, ularni kasbga va chet tillariga oʻqitish, ish jarayonida monitoring olib borish, fuqarolarga ijtimoiy va huquqiy yordam koʻrsatish kabi yoʻnalishlar mehnat bozori talablaridan kelib chiqib amalga oshirilmoqda.

Bu borada “Mahalla yettiliklari”ning faol ishtiroki, xonadonlarga kirib borilayotgani, aholi bilan yuzma-yuz muloqotlar orqali mavjud muammolarni aniqlash ishlari ham yangi tizimning samaradorligini oshirmoqda.

Seminarda taqdim etilgan raqamlar migratsiya sohasida olib borilayotgan ishlarning qamrovi va natijadorligini yaqqol koʻrsatib berdi.

2025-yilning yanvar–sentyabr oylarida Migratsiya agentligi tomonidan 156 ming nafar fuqaroga huquqiy, moddiy va ijtimoiy yordam koʻrsatilgan, xorijdagi ish beruvchilar tomonidan 1,8 million AQSh dollari miqdoridagi qarzdorliklar undirilib, fuqarolarga yetkazilgan, 352 nafar vatandoshning shaxsni tasdiqlovchi hujjatlari qaytarib olingan, 46,8 ming nafar fuqaro ijtimoiy yordamlar bilan taʼminlangan hamda 3,7 ming nafar fuqaro moddiy yordam olgan.

Bu natijalar mehnat migratsiyasining tartibga solingan, qonuniy va eng muhimi, xavfsiz boʻlishi yoʻlida amalga oshirilayotgan izchil ishlarning amaliy tasdigʻidir.

Seminarda taʼkidlangandek, mehnat migratsiyasini toʻgʻri yoʻlga qoʻyish — bu nafaqat davlat organlarining vazifasi, balki “Mahalla yettiliklari”dan tortib, har bir masʼul tashkilotning hamkorlikdagi saʼy-harakatlarini talab etadi.

Amudaryoda oʻtkazilgan mazkur uchrashuv ham xalq va davlat oʻrtasidagi oʻzaro muloqotning yanada kuchayishiga, fuqarolarning xorijdagi mehnat faoliyatini qonuniy asosda tashkil etishiga xizmat qiladi. Seminarda bildirilgan fikr va takliflar esa mehnat migratsiyasining yanada xavfsiz, tartibli va tizimli boʻlishiga mustahkam zamin yaratadi.

Charos Arslonova, tuman hokimligining Axborot xizmati rahbari.