Халқ депутатлари Амударё туман Кенгашининг 15-сессияси тўғрисида ахборот

Жорий йилнинг 25 ноябрь куни Амударё тумани ҳокимлигининг мажлислар залида Еттинчи чақириқ Халқ депутатлари Амударё туман Кенгашининг навбатдаги 15-сессияси бўлиб ўтди.

Сессия мажлисида депутатлар, туман ҳоким ўринбосарлари, ҳокимлик масъул ходимлари, бўлимлар, ташкилотлар раҳбарлари ҳамда оммавий ахборот воситалари вакиллари иштирок этди. Сессияни Халқ депутатлари туман Кенгаши Раисининг ўринбосари – 3-Дўстлик сайлов округидан депутат Мадамин Казаков олиб борди. Сессия котиблигига “18-Заҳириддин Муҳаммад Бобур” сайлов округидан депутат Гулбаҳор Раимова сайланди.

Сессия мажлиси кун тартибидаги “Маҳаллий бюджетнинг ижроси тўғрисидаги ҳисоботни кўриб чиқиш ҳамда тасдиқлаш тўғрисида”ги, “Амударё туманининг 2026 йилги маҳаллий бюджетини тасдиқлаш тўғрисида”ги, “Туман ҳокимининг биринчи ўринбосарининг маблағ ажратиш таклифи тўғрисида”ги ҳамда “Инфратузилма ва ижтимоий барқарорлик” жамғармасидан маблағ ажратиш тўғрисида”ги масалалар юзасидан туман Иқтисодиёт ва молия бўлими бошлиғининг биринчи ўринбосари Жаҳонгир Йўлдашов ҳисоботларни ўқиб эшиттирди.

Ҳисоботларда келтирилишича, 2025 йил 9 ойи давомида Амударё тумани маҳаллий бюджетнинг даромадлар режаси жами 92 млрд 381,3 млн сўм қилиб белгиланган бўлиб, ушбу режа жами 96 млрд 637,8 млн сўмга яъни 4 млрд 256,3 млн сўмга, ёки 104,6 фоизга ортиғи билан бажарилган. Туман маҳаллий бюджетидан ҳисобот даври давомида жами 131 млрд 971,2 млн сўмлик маблағлар сарфланган.

Шунингдек, 2026 йил учун Амударё тумани маҳаллий бюджетнинг даромадлари 151 млрд 502,7 млн сўм, маҳаллий бюджети харажатлари эса 151 млрд 502,7 млн сўм миқдорида прогноз қилинмоқда.

Шу билан бирга ҳисоботларда “Инфратузилма ва ижтимоий барқарорлик” жамғармасидан “Гурлан” шоҳкўчасини ижтимоий кўчага айлантириш мақсадида, яъни пиёдалар йўлакчасини таъмирлаш учун 1 млрд сўм ва ижтимоий ходимлар фаолияти учун зарур бўлган инвентарлар харид қилиш учун 490 млн сўм маблағ ажратиш таклифи илгари сурилди.

Шундан кейин Ўзбекистон Маҳаллалари уюшмаси Амударё туман бўлинмаси раҳбарининг Маҳалланинг ижтимоий-иқтисодий муаммоларини ҳал этиш жамғармаси даромадлари ва харажатлари ижроси юзасидан ҳисоботи тингланди.

Маҳаллалар уюшмаси туман бўлими раҳбари Алишер Юлдашев ўз ҳисоботида келтирилишича, жорий йилнинг март ойида Ўзбекистон Маҳаллалари уюшмаси туман бўлими ва фуқаролар йиғинлари билан ҳамкорлигида "Яшил макон" умуммиллий ҳаракати доирасида жами 120 мингдан ортиқ кўчат экилган. Уюшма томонидан "Қипчоқ ўрмон хўжалиги"дан шартнома асосида 86 млн сўм маблағ эвазига 15 минг кўчат сотиб олинган.

Фуқаролар йиғини моддий-техник базасини мустаҳкамлаш учун 119 млн сўмлик 24 та компьютер техникаси, 63 млн сўмлик 21 та принтер, 240 млн сўмлик 38 та кондиционер берилган. Барча маҳаллалар биноларининг кадастр ҳужжатлари ишланиб, бунинг учун 93 млн сўм сарфланган. Шунингдек, жорий йилнинг 9 ойи давомида маҳаллалардаги ижтимоий ҳимояга муҳтож 298 нафар фуқаролар учун жами 481 млн сўмлик моддий ёрдам кўрсатилган. Фуқаролар йиғинларига мебель жиҳозлари харид қилиш учун 111 млн сўм сарфланган.

Шунингдек, “Қангли” овул фуқаролар йиғини биносини 21 млн сўм маблағ эвазига жорий таъмирлаш ишлари олиб борилган. 2025 йилда туманимиз маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича ҳар бир маҳаллани, ҳар бир кўчани "хавфсиз ҳудуд"га айлантириш мақсадида 14 маҳаллага 29 та кузатув камералари қўйилган. Мазкур тадбирга 334 млн сўм маблағ сарфланган.

Сессия мажлиси кун тартибидаги Ўзбекистон Республикасининг “Давлат ҳокимияти бошқаруви органларининг очиқлиги тўғрисида”ги Қонунининг тумандаги ижроси ҳақида туман ҳокимлиги Ахборот хизмати раҳбари, туман ҳокимининг матбуот котиби Чарос Арслонова ахборот берди.

Амударё тумани ҳокимлиги Ахборот хизмати 2019 йилда ташкил этилган бўлиб, ҳозирга қадар туманда очиқлик сиёсатини амалда таъминлаш, жамоатчиликни ўз вақтида, ишончли ва ҳаққоний ахборот билан таъминлаш йўналишида тизимли ишлар амалга оширилган.

Ахборот хизмати томонидан фото, матнли ва видео контентларнинг доимий      равишда тайёрланиши натижасида туман ҳокимлигининг расмий ахборот манбаларига қизиқиш ортиб бормоқда. Расмий платформаларга кунлик, ҳафталик ва ойлик янгиликлар, ижтимоий, иқтисодий, инфратузилма ва ислоҳотларга оид видеороликлар, фоторепортажлар, аналитик маълумотлар мунтазам жойлаб борилади. Жорий йилнинг шу даврига қадар тасдиқланган медиа режа асосида 67 та медиа тадбирлар ўтказилган. Маҳаллий ва республика миқёсидаги оммавий ахборот воситалари билан мунтазам ҳамкорлик йўлга қўйилган бўлиб, республика оммавий ахборот воситаларида, сайтларда 60 мартадан ортиқ чиқишлар таъминланган. 150 тадан ортиқ видеороликлар тайёрланиб, ижтимоий тармоқлардаги расмий саҳифаларга жойланган. Улар орасида қурилиш-ободонлаштириш жараёнлари, сайёр қабуллар, учрашувлар, жамоатчилик фикри, маҳаллалардаги ислоҳотлар, тадбирлар ёритилган. Президентнинг тегишли фармонлари талаблари асосида веб-сайтнинг очиқлик бўлимлари ҳар чоракда янгиланиб борилмоқда.

Сессия кун тартибига киритилган барча масалалар ҳисобот ва ахборотлар атрофлича муҳокама қилиниб, фикр-мулоҳазалар билдирилди ва тегишли қарорлар қабул қилинди. Шу билан Халқ депутатлари туман кенгашининг 15-сессияси ўз ишини якунлади.

Чарос Арслонова, туман ҳокимлигининг Ахборот хизмати раҳбари.