Кичик саноат зонасидаги истиқболли лойиҳалар: Амударё саноатининг янги драйверлари

Мамлакатимизда тадбиркорлик муҳитини яхшилаш, кичик саноат зоналари фаолиятини жадаллаштириш ва шу орқали ҳудудларнинг иқтисодий салоҳиятини юксалтириш давлат сиёсатининг устувор йўналишларидан бири ҳисобланади. Бугунги кунда Амударё туманида ҳам маҳаллий хомашёни чуқур қайта ишлашга асосланган, экспортбоп ва импорт ўрнини босувчи маҳсулотлар ишлаб чиқарувчи корхоналар сони ортиб бормоқда. Амударё тумани прокурори Баҳрам Машарипов ҳамда туман ҳокими ўринбосари, инвестиция ва ташқи савдо бўлими бошлиғи Ҳамза Ҳайтимбетовлар туманнинг Навоий маҳалласи ҳудудида жойлашган кичик саноат зонасида бўлиб, у ерда амалга оширилаётган йирик лойиҳалар, тадбиркорларнинг муаммо ва таклифлари билан яқиндан танишдилар.

Ўрганишлар давомида дастлабки манзил “OYBEK MEBEL” масъулияти чекланган жамияти бўлди. Мазкур корхона фаолияти кичик бизнеснинг қандай қилиб босқичма-босқич ривожланиб, йирик ишлаб чиқарувчига айланиши мумкинлигига ёрқин мисолдир. Корхона дастлаб 2021 йилда умумий қиймати 400 миллион сўм бўлган лойиҳа доирасида, банк кредитларисиз, тўлиқ ўз маблағлари ҳисобига эшик ва юмшоқ мебеллар ишлаб чиқаришни йўлга қўйган эди. Ўша вақтда 6 та иш ўрни яратилган бўлса, бугунги кунга келиб корхона ўз ишлаб чиқариш салоҳиятини сезиларли даражада кенгайтиришга эришди. Ҳозирда корхона нафақат стандарт маҳсулотлар, балки аҳоли ва ташкилотларнинг буюртмаси асосида барча турдаги замонавий мебель жиҳозларини юқори сифатда тайёрлаб келмоқда. Ишлаб чиқариш ҳажмининг ортиши натижасида иш ўринлари сони 10 тадан оширилиб, маҳаллий ёшларнинг бандлигини таъминлашга муносиб ҳисса қўшилмоқда.

Саноат зонасидаги яна бир эътиборга молик лойиҳа — “AMU METAL KOVKA ART” масъулияти чекланган жамияти фаолиятидир. Бу корхона тарихи ҳақиқий устоз-шогирд анъаналарига ва оилавий тадбиркорлик қадриятларига асосланади. Амударёлик тадбиркор Жасур Бобожонов ўз меҳнат фаолиятини отасининг ёнида, кичик устахонада оддий ишчи сифатида бошлаган эди. Тинимсиз изланиш ва тажриба орттириш натижасида бугун у йирик корхона раҳбарига айланди. Айни пайтда корхонада бутун ҳудудга машҳур бўлган “Аму тепло” бренди остида иситиш қозонлари ишлаб чиқарилмоқда. Ушбу қозонларнинг афзаллиги — энергия тежамкорлиги ва юқори самарадорлигидадир. Масалан, биргина хонадон ёки иссиқхонани қишнинг совуқ кунларида бир кеча-кундуз давомида иситиш учун атиги 30–50 килограмм кўмир сарфланиши аҳоли учун жуда катта иқтисодий фойда демакдир.

Бундан ташқари, корхонада темир эшик ва дарвозалар, шунингдек, миллий ва замонавий услубдаги металл декоратив буюмлар ҳам тайёрланмоқда. Бу жараёнларга 10 нафар доимий ишчи жалб қилинган бўлиб, мавсумий ишлар пайтида қўшимча ходимлар ва ҳунар ўрганиш иштиёқидаги ёш шогирдлар билан бандлик қамрови янада кенгаяди.

Жасур Бобожонов ўз бизнесини кенгайтириш мақсадида Кичик саноат зонасида ажратиб берилган бино-иншоотларни гаров таъминоти сифатида қўйиб, имтиёзли кредит маблағларини жалб қилди ва ишлаб чиқаришни модернизация қилди.

Саноат зонасининг экспорт салоҳиятини оширишда эса “AL-KAFIL BIZNES PLAST” масъулияти чекланган жамиятининг ўрни алоҳида. Тадбиркор Аллаберган Эрназаров раҳбарлик қилаётган ушбу корхона маҳсулотлари географияси бугунги кунда нафақат Амударё тумани ёки Қорақалпоғистон Республикаси, балки Хоразм, Навоий, Бухоро, Самарқанд ва Тошкент вилоятларини ҳам қамраб олган. Корхонада бугунги кунда 15 нафарга яқин ишсиз фуқаро доимий даромад манбаига эга. Ўз фаолиятини 2019 йилда Халқ банки томонидан ажратилган 37 минг АҚШ доллари миқдоридаги имтиёзли кредит ҳисобига Хитой Халқ Республикасидан замонавий дастгоҳлар олиб келиш билан бошлаган тадбиркор қисқа вақт ичида катта натижаларга эришди.

Айни пайтда жамиятга қарашли цехда аҳолининг кундалик эҳтиёжи учун зарур бўлган 10 дан ортиқ турдаги, ҳар хил ҳажм ва шаклдаги сифатли хўжалик пластмасса буюмлари ишлаб чиқарилмоқда. Ишлаб чиқаришни тўхтовсиз ривожлантириш мақсадида тадбиркор 2025 йилда Хитой давлатидан қўшимча 100 минг АҚШ долларлик юқори технологик асбоб-ускуналарни олиб келиб ўрнатди. Бу эса маҳсулот таннархини арзонлаштириш ва сифатини ошириш имконини берди. Корхонанинг келажак режалари ҳам улкан бўлиб, 2026 йилда яна қўшимча 60 минг АҚШ долларлик янги линияларни ишга тушириш кўзда тутилган.

Хулоса ўрнида айтиш мумкинки, Амударё туманининг Навоий маҳалласи ҳудудидаги кичик саноат зонасида фаолият юритаётган бу каби корхоналар туман иқтисодиётининг локомотивига айланиб, аҳоли фаровонлигини ошириш ҳамда импорт ўрнини босувчи маҳсулотлар ишлаб чиқаришда муҳим роль ўйнамоқда.