3 декабрь – Халқаро ногиронлар куни Амударёда кенг нишонланди
Ҳар йили 3 декабрь куни бутун дунё бўйлаб инсониятнинг меҳр-оқибатга бўлган юксак эътиборини ифодаловчи саналардан бири – Халқаро ногиронлар куни нишонланади. Бу сана Бирлашган Миллатлар Ташкилоти Бош Ассамблеясининг 1992 йил 14 октябрдаги резолюциясига мувофиқ жорий этилган бўлиб, жамиятда ногиронлиги бўлган шахсларнинг ҳуқуқлари, имкониятлари ва ижтимоий фаоллигини қўллаб-қувватлашга қаратилгани билан алоҳида аҳамият касб этади.
Бугун ногиронлиги бўлган инсонларга кўмак бериш, уларни жамиятнинг тўлақонли аъзоси сифатида қўллаб-қувватлаш нафақат давлат сиёсати, балки ҳар биримизнинг инсоний бурчимизга айланган.
Амударё туманида ҳам мазкур сана муносабати билан катта байрамона тадбир ташкил қилинди. Туман ҳокимлиги ташаббуси билан “Шер” тўйхонасида ўтказилган ушбу самимий учрашув ногиронлиги бўлган ҳамюртларимиз учун чинакам қувонч, эътибор ва ҳурмат байрамига айланди.
Меҳмонлар ташрифнинг илк дақиқалардан бошлаб меҳр-мурувват, илиқ муҳит ва байрамона кайфиятнинг гувоҳи бўлдилар. Тадбирнинг ҳар бир лаҳзаси инсон қадри, жамиятда инклюзивлик тамойилларини мустаҳкамлашга қаратилди.
Тадбирда туман ҳокими Собир Хўжаметов, туман прокурори Баҳрам Машарипов, туман Ички ишлар бўлими бошлиғи Тимур Дошумбаев иштирок этиб, байрам муносабати билан ногиронлиги бўлган юртдошларимизга меҳрли тилакларини йўлладилар.
Раҳбарлар ўз чиқишларида инсон қадри ва унинг манфаатлари давлат сиёсатининг устувор йўналишларидан бири эканини таъкидлашди. Ногиронлиги бўлган шахсларни қўллаб-қувватлаш, уларга қулай шароит яратиш, ижтимоий ҳимоя тизимини мустаҳкамлаш борасида амалга оширилаётган кенг кўламли ислоҳотларга эътибор қаратилди.
Тадбир иштирокчиларига махсус тайёрланган байрам совғалари топширилди. Ушбу совғалар нафақат эътибор рамзи, балки кўнгилларга илиқлик, қувонч ва қадр топганлик туйғусини олиб кирди. Ногиронлиги бўлган ҳамюртларимизнинг кўзларидаги мамнунлик, табассумлар ва миннатдорчилик барча иштирокчиларнинг кўнглига кўчди.
Туман Маданият бўлими хонандалари томонидан ижро этилган шўх ва шодон куй-қўшиқлар тадбирга ўзгача байрамона руҳ бағишлади. Мусиқа садолари остида иштирокчиларнинг кўтаринки кайфияти, бир-бирига илиқ тилаклар йўллаши ушбу кунни янада унутилмас қилди.
Халқаро ногиронлар куни – бу жамиятнинг меҳр-мурувватга бўлган эҳтиёжи, бир-биримизни қўллаб-қувватлаш маданияти ва юксак инсоний қадриятларнинг ифодасидир.
Туманимизда ўтказилган мазкур тадбир эса яна бир бор шуни кўрсатдики, ҳамюртларимизнинг ҳар бири эътибор, иззат-икром ва қўллаб-қувватлашга муносибдир.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
