Конституция байрами арафасида Амударёда янги бинолар фойдаланишга топширилди

Ўзбекистон Республикаси Конституцияси қабул қилинганининг 33 йиллиги Амударё тумани ҳаётида нафақат байрам, балки тараққиёт ва янгиланиш руҳи билан ёдда қолди. Байрам арафасида туманда бир қатор муҳим ижтимоий объектларнинг фойдаланишга топширилгани халқимиз фаровонлиги йўлида олиб борилаётган изчил ислоҳотларнинг амалий натижасини яққол намоён этди.

Хусусан, Дўстлик маҳалласида замонавий талаблар асосида янгидан қурилган 58-сонли мактабгача таълим ташкилоти фойдаланишга топширилди. Маросимда туман ҳокими ўринбосари Нодирбек Камолов, туман прокурори Баҳрам Машарипов, туман Мактабгача ва мактаб таълими бўлими бошлиғи Ялғаш Шомуратовлар сўзга чиқиб, бу бунёдкорлик ишлари мамлакатимизда таълим-тарбия соҳасига берилаётган юксак эътиборнинг ёрқин исботи эканини таъкидладилар.

Дарҳақиқат, муҳтарам Президентимизнинг тегишли қарори асосида жорий йилда Амударё туманида 4 та мактабгача таълим муассасасини қуриш ва реконструкция қилиш учун 24 миллиард 902 миллион сўм маблағ ажратилди. Ана шу эзгу дастур доирасида “Хива Қурилиш Комплекс” МЧЖ томонидан қиймати 8 миллиард 600 миллион сўм бўлган, 240 ўринли иккита қаватли бино бунёд этилиб, байрам арафасида фойдаланишга топширилди.

Бу нафақат янги боғча — балки келажагимиз эгалари учун билим, тарбия ва меҳр масканидир. Замонавий ўқув хоналари, ўйин майдончалари, спорт ва ривожлантирувчи машғулотлар учун мўлжалланган хоналар — барчаси болаларнинг ҳар томонлама камол топиши учун хизмат қилади.

Байрам арафасида яна бир муҳим объект — Оқ олтин овулида янгидан қурилган Маданият маркази биноси ҳам фойдаланишга топширилди. Мазкур маскан овул аҳлининг маънавий ҳаётида янги саҳифа очади.

Марказнинг очилиш маросимида туман ҳокими ўринбосари Баҳодир Эрназаров, туман прокурори Баҳрам Машарипов, туман Маданият бўлими бошлиғи Мурод Ибрагимов, шунингдек, қурилиш ташкилоти масъуллари сўзга чиқиб, ушбу бунёдкорликнинг туманнинг маънавий юксалишига қўшадиган ҳиссаси ҳақида сўз юритдилар.

Президентимизнинг 2024 йил 24 декабрь кунги “2025-2027 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги қарори асосида барпо этилган мазкур маскан “МАНҒИТ ИНВEСТ МАКСИМУМ” МЧЖ томонидан қурилиб, 2 миллиард 700 миллион сўм маблағ сарфланди.

Маданият марказлари – халқнинг ўзлигини англаш, маънавиятни бойитиш ва ёшларни тўғри йўлга бошлаш мактабидир. Айниқса, ёшлар учун тўгараклар, ижодий студиялар, кутубхона ва саҳна заллари ушбу масканни ҳудуднинг маданий марказига айлантириши шубҳасиз.

Туманимизда амалга оширилаётган бу каби йирик лойиҳалар Ўзбекистон Республикасининг Бош Қомуси — Конституциямизда белгиланган энг муҳим тамойиллар: инсон қадри, фаровон ҳаёт, билимли авлод ва кучли ижтимоий инфратузилма каби мақсадларнинг реал ифодаси, Конституциямизда белгиланган ижтимоий давлат концепциясининг амалий ижросидир. Болалар боғчалари, маданият марказлари, таълим ва соғлиқни сақлаш тизимидаги ислоҳотлар — буларнинг барчаси фуқароларимизнинг муносиб турмушига қаратилган узоқ муддатли стратегиянинг барқарор амалий давомидир.

Маросимларда сўзга чиққанлар барча қурувчилар, муҳандислар, лойиҳа мутахассислари, ҳомийлар ҳамда ташаббускор фуқароларнинг меҳнати юқори баҳоланишини алоҳида таъкидладилар. Зеро, бундай улкан лойиҳалар фақат ҳамжиҳатлик ва мақсад сари биргаликда интилиш орқали рўёбга чиқади.

Чарос Арслонова, туман ҳокимлигининг Ахборот хизмати раҳбари.