Фуқаролик ишлари бўйича Амударё туман суди томонидан “Очиқ эшиклар куни” ўтказилди

Мамлакатимизда инсон ҳуқуқларини кафолатли ҳимоя қилиш борасида мустаҳкам қонуний асослар яратилган. Ўзбекистон Республикасининг янги таҳрирдаги Конституциясида инсон, унинг ҳаёти, эркинлиги, шаъни, қадр-қиммати ва бошқа ажралмас ҳуқуқлари олий қадрият сифатида белгилаб қўйилган. Шу боис, мамлакатимизда фуқароларнинг ҳаётига дахлдор ҳуқуқий масалаларни шаффофлик асосида ҳал қилишда одил судловни таъминлаш, уларнинг конституциявий ҳуқуқларидан тўлақонли фойдаланишларига шароит яратиш мақсадида судлар томонидан халқ билан юзма-юз мулоқот, ҳуқуқий-маслаҳат учрашувлари, “Очиқ эшиклар куни” тарзидаги ташвиқот тадбирлари ва сайёр суд йиғилишлари ташкил этилмоқда.

Фуқаролик ишлари бўйича Амударё туман суди биносида ўтказилган навбатдаги шу каби тадбирда ҳам судьялар, тадбиркорлар, адвокатлар ва фуқаролар иштирок этди. “Очиқ эшиклар куни” тадбири аввалида иштирокчилар Фуқаролик ишлари бўйича Амударё туман суди биносида ташкил этилган адвокатлар ва прокурор хоналари, фуқароларни қабул қилиш жараёни, суд мажлислари зали, шунингдек, судга ташриф буюрувчилар учун яратилган шароит ва имкониятлар билан яқиндан танишдилар. Бундан ташқари, Фуқаролик ишлари бўйича туман суди ходимлари тадбир иштирокчиларига суд архиви, девонхонаси фаолияти юзасидан батафсил маълумот ва тушунчалар бердилар.

“Очиқ эшиклар куни” тарғибот-ташвиқот тадбирида иштирокчиларга судлар фаолиятига кенг жорий этилаётган интерактив хизматлар ҳақида тушунчалар берилиб, бу борадаги ҳуқуқий саводхонлигини оширишга эътибор қаратилди. Йиғилишда Президентимиз томонидан қабул қилинган судлар фаолиятига доир Фармон ва қарорлар мазмун-моҳияти юзасидан тушунча ва маълумотлар ҳам тақдим этилди.

Тадбир давомида судьялар ва тадбиркорлар иштирокида давра суҳбати ташкил этилди. Давра суҳбати жараёнида малакали ҳуқуқшунослар томонидан маъмурий судларда кўриладиган ишлар тоифаси, маъмурий суднинг ваколатлари, ишларни кўришнинг процессуал тартиблари хусусида кенг тушунчалар берилди. Бундан ташқари, давра суҳбатида жорий 2025 йил давомида Фуқаролик ишлари бўйича Амударё туман судида кўрилган ишлар таҳлилига ҳам эътибор қаратилиб, иштирокчиларга қимматли маслаҳат ва тавсиялар берилди.

Очиқлик ва шаффофлик асосида ўтказилган тадбирда судьялар томонидан мамлакатимиз суд тизимида амалга оширилаётган ислоҳотлар, “Ўзбекистон — 2030” стратегияси ва унга мувофиқ соҳага жорий этилаётган янгиликлар, хусусан, Президентимиз томонидан 2025 йил 21 августда қабул қилинган “Судлар фаолиятига сунъий интеллект технологияларини жорий этиш орқали одил судловга эришиш даражасини ошириш ҳамда суд тизимининг моддий-техник таъминотини яхшилашга доир қўшимча чора-тадбирлар тўғрисида”ги Фармони ва ундан келиб чиқадиган вазифалар мазмун-моҳияти юзасидан атрофлича маълумотлар тақдим этилиб, тушунтириш ишлари олиб борилди.

Унга кўра, фуқаролар ва тадбиркорлик субъектларига зарур қулайликлар яратиш ҳамда суд ишларини кўришни соддалаштириш мақсадида “Рақамли суд” концепциясини амалга ошириш доирасида сунъий интеллект ёрдамида суд муҳокамасининг тахминий натижалари, сарфланадиган харажатларни шакллантириш, мурожаатларни судга электрон шаклда юбориш, ишда иштирок этувчи шахсларнинг суд муҳокамаларида масофадан туриб иштирок этишларини таъминлашга қаратилган ўзгариш ва янгиликлар хусусида маълумотлар берилди.

“Очиқ эшиклар куни” тадбири очиқ ва шаффоф тарзда, юзма-юз мулоқотлар, қизиқарли савол-жавоблар асосида ўтказилди ҳамда мунозараларга бой бўлди.

Робия Йўлдошева