“ХАВФСИЗ ХОНАДОН” ОЙЛИГИ ДОИРАСИДА ПРОФИЛАКТИК ТАДБИРЛАР ДАВОМ ЭТМОҚДА

Халқимизда “Олов — тилсиз ёв”, деган нақл бор. Бир лаҳзалик эътиборсизлик ёки оддий хавфсизлик қоидаларига риоя қилмаслик оқибатида юзага келадиган ёнғин инсон ҳаёти, саломатлиги ва мол-мулкига жиддий зиён етказиши мумкин. Айниқса, куз-қиш мавсумида иситиш мосламаларидан фойдаланишга бўлган эҳтиёжнинг ортиши бу борада ҳушёрликни икки карра оширишни талаб этади.

Шу сабабли ҳам мамлакатимиз бўйлаб жорий йилнинг 1-31 январь кунлари оралиғида “Хавфсиз хонадон” ойлиги ўтказилмоқда. Ойлик доирасида аҳоли хонадонлари, кўп қаватли уйлар, талабалар ётоқхоналари, ижтимоий соҳа объектлари, қурилиш майдонларида ёнғин хавфсизлиги қоида ва талабларига амал қилиниши, келиб чиқиши мумкин бўлган ёнғинлар ва бошқа фавқулодда ҳолатларнинг олдини олишга қаратилган профилактик-тарғибот тадбирлари ўтказилиши белгиланган. Амударё тумани Фавқулодда вазиятлар бўлими томонидан ҳам мазкур ойлик доирасида кенг кўламли профилактик тадбирлар юқори савияда ташкил этилмоқда.

Ойлик доирасида бўлим ходимлари жойларда бўлиб, аҳолига тушунтириш ишларини олиб бормоқда. Бу борада навбатдаги манзил туманнинг “Бўстон” маҳалласи бўлди. Маҳалла марказида ташкил этилган учрашувда туман Фавқулодда вазиятлар бўлими масъул ходимлари, маҳалла фаоллари ва кенг жамоатчилик вакиллари иштирок этишди.

Мулоқот давомида асосий эътибор “ис гази”дан заҳарланишнинг олдини олишга қаратилди. Мутахассислар таъкидлаганидек, ис гази ҳидсиз ва рангсиз бўлгани учун уни сезиш қийин, шу боис ҳар бир хонадондаги дудбурон ва вентиляция тизимларининг созлиги доимий назоратда бўлиши шарт. Хоналарни мунтазам шамоллатиб туриш, қўлбола ва носоз иситиш печларидан фойдаланмаслик ҳаётий зарурат эканлиги тушунтирилди.

Профилактика ишлари фақат йиғилиш ўтказиш билан чекланиб қолмади. Туман Фавқулодда вазиятлар бўлими ходимлари “хонадонбай” усулида аҳоли яшаш уйларига ташриф буюриб, у ердаги газ ва электр жиҳозларининг техник ҳолатини кўздан кечирдилар. Фуқароларга иситиш қурилмаларини назоратсиз қолдирмаслик бўйича зарур тавсиялар берилиб, огоҳликка чорловчи махсус эслатмалар ва буклетлар тарқатилди. Бундай жонли мулоқотлар аҳолининг ёнғин хавфсизлиги маданиятини оширишда муҳим омил бўлмоқда.

Тадбирлар Амударё муҳандислик технологиялар техникумида ҳам давом этди. Талабалар турар-жойлари, яъни ётоқхоналар — ёнғин хавфсизлиги нуқтаи назаридан энг кўп эътибор қаратиладиган объектлардан саналади. Мутахассислар талабалар ётоқхонасидаги шароитларни, хусусан, ошхонадаги газ плиталаридан фойдаланиш тартибини ўргандилар. Ёшларга газ жиҳозларидан тўғри ва эҳтиёткорлик билан фойдаланиш, электр тармоғига ортиқча юклама бермаслик қоидалари тушунтирилди.

Шунингдек, бинодаги бирламчи ёнғин ўчириш воситалари — ўт ўчиргичларнинг мавжудлиги ва яроқлилик муддати текширувдан ўтказилди. Уларнинг фавқулодда вазиятларда зудлик билан фойдаланишга шай ҳолатда бўлиши ҳаётий муҳим аҳамиятга эга эканлиги таъкидланди.

Профилактик тадбирлар доирасида туман ҳудудидаги ёнғин хавфсизлиги инфратузилмасининг муҳим элементи бўлган ер ости сув олгич гидрантларининг техник ҳолати ҳам назоратдан четда қолмади. Қутқарувчилар гидрантларнинг созлиги, сув босими ва уларга махсус техникаларнинг тўсиқсиз яқинлашиш имкониятларини кўздан кечирдилар. Аниқланган техник камчиликларни бартараф этиш юзасидан мутасаддиларга тегишли кўрсатмалар берилиб, ижроси назоратга олинди.

Хулоса ўрнида айтганда, Амударё туманида ўтказилаётган “Хавфсиз хонадон ойлиги” тадбирлари шунчаки мавсумий кампания эмас, балки юртдошларимизнинг қиш мавсумидан беталафот чиқишларини таъминлашга қаратилган тизимли ҳаракатдир. Зеро, ўз уйининг хавфсизлигига бефарқ бўлмаган инсон, нафақат ўзининг, балки ён-атрофидагиларнинг ҳам осойишталигини асраган бўлади.