Энергия ресурсларидан қонуний фойдаланиш — мавсумни беталафот ўтказишнинг гарови

Мамлакатимизда куз-қиш мавсумини беталафот ўтказиш, аҳоли хонадонлари ва ижтимоий соҳа объектларини энергия ресурслари билан узлуксиз таъминлаш — бугунги куннинг энг долзарб вазифаларидан биридир. Бу жараёнда қонун устуворлигини таъминлаш ва исрофгарчиликка йўл қўймаслик муҳим аҳамият касб этади. 10 январь куни Амударё тумани прокурори Баҳром Машарипов бошчилигида ўтказилган тезкор йиғилиш ва амалий ўрганишлар айнан шу масалаларга қаратилди.

Эрта тонгдан туман прокуратурасида газ ва электр таъминоти корхоналари ходимлари иштирокида махсус йиғилиш бўлиб ўтди. Унда кун тартибидаги энг оғриқли масала — энергия ресурсларидан ноқонуний фойдаланиш ҳолатларига қарши курашиш ва таъминотда узиишларнинг олдини олиш масалалари муҳокама қилинди.

Туман прокурори соҳа ходимлари олдига аниқ ва қатъий вазифаларни қўйди. Хусусан, жойларда аҳоли хонадонлари ва тадбиркорлик субъектларида электр энергияси ҳамда табиий газдан ноқонуний фойдаланиш, тармоққа ўзбошимчалик билан уланиш, ўғирлик ва талон-торож қилиш ҳолатларини аниқлаш бўйича рейд тадбирларини кучайтириш топширилди. Таъкидландики, ҳар бир ўғирланган киловатт электр энергия ёки бир куб метр газ — бу кимнингдир хонадонида иссиқлик етишмаслигига, қайсидир мактаб ёки боғчанинг совуқ қолишига сабаб бўлади.

Шунингдек, йиғилишда Ўзбекистон Республикаси Президентининг 2025 йил 1 апрелдаги қарори ижроси доирасида тузилган махсус штаб фаолияти танқидий таҳлил қилинди. Штаб аъзолари томонидан тумандаги ижтимоий соҳа объектларида, яъни мактаблар, боғчалар, шифохоналар ва бошқа муассасалар биноларида қиш мавсумини талофатсиз ўтказиш бўйича амалга оширилган ўрганиш натижалари муҳокама қилинди. Прокурор аниқланган камчиликларни бартараф этиш, мавсум давомида иссиқлик тизимларининг узлуксиз ишлашини таъминлаш юзасидан масъулларга аниқ муддатли кўрсатмалар берди.

Назорат тадбирлари фақат хизмат хонасида эмас, бевосита жойларда ҳам давом эттирилди. Туман прокурори Баҳром Машарипов мутахассислар ҳамроҳлигида табиий газ тармоқларини модернизация қилиш жараёнлари билан танишди.

Асосий эътибор туманнинг Бўстон маҳалласи ҳудудида амалга оширилаётган йирик лойиҳага қаратилди. Маълумки, ушбу ҳудуддаги аҳоли хонадонларини газ билан таъминловчи диаметри 159 миллиметр бўлган қувурлар йиллар давомида эскириб, яроқсиз ҳолга келиб қолган эди. Бу эса газ босимининг пасайишига ва техник йўқотишларга сабаб бўлаётганди. Айни пайтда ушбу тармоқ диаметри 219 миллиметр бўлган янги газ қувурларига алмаштирилмоқда.

Прокурор қурилиш-монтаж ишлари жараёнида белгиланган техник меъёр ва хавфсизлик талабларига қатъий риоя этилишини ҳам кўздан кечирди. Асосий мақсад — аҳолига "зангори олов"ни нафақат барқарор, балки хавфсиз, сифатли ва йўқотишларсиз, энг муҳими, узлуксиз етказиб беришдир. Мазкур жараёнда белгиланган техник меъёр ва хавфсизлик талабларига амал қилиниши ишчи-ходимлар ҳаёти ва соғлиғини муҳофаза қилиш, авария ва нохуш ҳодисаларнинг олдини олиш, шунингдек, газ таъминоти тизимининг барқарор ва узлуксиз ишлашини кафолатлайди. Шу боисдан, ишлар лойиҳа ҳужжатларига мувофиқ, малакали мутахассислар томонидан, белгиланган тартиб ва стандартлар асосида амалга оширилиши лозим. Техник назорат ва масъул ташкилотлар томонидан доимий текширувларнинг олиб борилиши эса хавфсизлик даражасини янада оширишга хизмат қилади.

Хулоса ўрнида айтиш мумкинки, бу каби назорат тадбирлари мавсумни беталафот ўтказиш ва аҳоли розилигини таъминлашнинг муҳим кафолатидир.