Мўйноқ экология музейида Ватан ҳимоячилари кунига бағишлаб тадбир ташкил қилинди
Ўзбекистон Республикаси Қуролли Кучлари ташкил этилганининг 34 йиллиги ҳамда 14 январь – Ватан ҳимоячилари куни Оролбўйининг энг чекка ҳудудларида ҳам ўзгача кўтаринкилик, фахр ва ифтихор руҳида нишонланмоқда. Ана шундай маънавий юксак руҳдаги тадбирлардан бири байрам арафасида Қорақалпоғистон Республикаси тарихи ва маданияти давлат музейи филиали — Мўйноқ экология музейида ташкил этилди. Ушбу маънавий-маърифий учрашув ёш авлод билан ҳарбий хизматчилар ўртасида жонли мулоқот майдонига айланиб, ватанпарварлик ғояларини тарғиб этишда муҳим аҳамият касб этди.
“Чўққиларда ҳилпирасин Ватан байроғи” мавзусида ўтказилган тадбир нафақат байрам тантанаси, балки ёшлар учун ўзига хос ватанпарварлик дарси вазифасини ўтади. Унда Мўйноқ туманидаги 3-сонли умумтаълим мактабининг “Жасорат” махсус синф ўқувчилари ҳамда ҳудудда жойлашган стратегик аҳамиятга эга Махсус муҳандислик қурилиш бошқармаси ва ихтисослаштирилган табиатни тиклаш батальони ҳарбий хизматчилари иштирок этдилар. Бу эса тадбир мазмунига янада салмоқ ва амалий руҳ бағишлади.
Тадбир Ўзбекистон Республикаси ҳамда Қорақалпоғистон Республикасининг давлат мадҳиялари садолари остида бошланди. Давлат мадҳияси — мустақиллик, эркинлик ва миллий ғурур рамзи сифатида ёш авлод қалбида Ватанга бўлган муҳаббат ва садоқат туйғуларини мустаҳкамлайди. Мадҳия янграган онларда иштирокчиларнинг юзларида фахр, кўзларида эса келажакка ишонч акс этди. Зеро, мадҳия ҳар бир фуқарони Ватан тақдирига дахлдор эканини ҳис эттирувчи муқаддас қўшиқдир.
Тадбирнинг айнан Мўйноқ экология музейида ўтказилиши эса чуқур рамзий маънога эга. Бу maskan бир томондан Орол денгизининг оғриқли тарихи ва инсон фаолиятининг табиатга таъсирини ёдга солса, иккинчи томондан, тадбирда иштирок этган “Табиатни тиклаш батальони” ҳарбий хизматчилари бугунги кунда Оролнинг қуриган тубида “яшил қоплама”лар барпо этиб, экологик фалокат оқибатларига қарши мардонавор кураш олиб бораётганликларини намоён этди. Бу эса “Ватан ҳимояси” тушунчаси фақат қурол билан эмас, балки меҳнат, масъулият ва фидойилик билан ҳам амалга оширилишини яққол кўрсатди.
Байрам дастури давомида мактабнинг “Жасорат” синфи ўқувчилари ўз истеъдодларини намоён этдилар. Улар ижро этган Ватанни мадҳ этувчи жанговар руҳдаги қўшиқлар, миллий рақслар ва саҳна чиқишлари йиғилганларга кўтаринки кайфият бағишлади. Ўқувчиларнинг ҳарбийча интизоми, ўзларига бўлган ишончи ва чиқишлардаги жипслиги уларнинг келажакда ҳарбий соҳани танлашга бўлган қизиқиши юқори эканлигидан далолат берди.
Учрашувнинг энг қизиқарли қисми ҳарбийлар ва ўқувчилар ўртасида ташкил этилган викторина бўлди. Ўзбекистон тарихи, буюк саркардаларимиз ҳаёти ва ҳарбий хизматга оид саволлар ёшларнинг билим савиясини синовдан ўтказди. Қизиқарли баҳс-мунозараларга бой бўлган савол-жавоблар жараёнида фаол иштирок этган ўқувчилар ва ҳарбийлар музей маъмурияти томонидан рағбатлантирилди.
Ушбу маънавий-маърифий тадбир ёшларда Миллий Армиямизга бўлган фахр туйғусини янада ошириш, уларни она юртга садоқат руҳида тарбиялаш ҳамда ҳарбий хизматнинг шарафли ва масъулиятли бурч эканлигини чуқур ҳис этишларига хизмат қилди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
