АМУДАРЁЛИК ЁШЛАР ҲАРБИЙЛАР ҲАЁТИ БИЛАН ЯҚИНДАН ТАНИШДИЛАР

Мамлакатимизда ҳар йили катта ҳурмат ва фахр билан нишонланадиган 14 январь – Ватан ҳимоячилари куни байрами арафасида юртимиз бўйлаб ёш авлодни ҳарбий-ватанпарварлик руҳида тарбиялашга қаратилган кенг кўламли маънавий-маърифий тадбирлар ўтказилади. Айниқса, Ўзбекистон Республикаси Қуролли Кучлари ташкил этилганининг 34 йиллиги муносабати билан жойларда уюштирилаётган учрашувлар, маърузалар ва “Очиқ эшиклар куни” тадбирлари ёшларда Миллий Армиямизга бўлган ишонч ва ҳурматни янада оширишга хизмат қилмоқда.

Бугунги кунда мамлакатимиз мудофаа салоҳиятини мустаҳкамлаш, ҳарбий хизматни замонавий талаблар асосида ташкил этиш, ёшларни Ватанга садоқат руҳида тарбиялаш давлат сиёсати даражасига кўтарилган. Шу маънода, Ўзбекистон Республикаси Президентининг 2025 йил 1 декабрдаги Фармойиши ҳамда Қорақалпоғистон Республикаси Мудофаа ишлари бошқармаси бошлиғининг 2025 йил 12 декабрдаги буйруғи ижросини таъминлаш мақсадида Амударё туманида ҳам қатор амалий ишлар олиб борилмоқда.

Хусусан, “Ватанпарварлик ойлиги” доирасида “Миллий Армия – Она юрт қалқони, тинчлигимиз посбони” шиори остида 12 январь куни Амударё тумани ҳудудида жойлашган Давлат хавфсизлик хизмати Чегара қўшинларига қарашли ҳарбий қисмда ташкил этилган “Очиқ эшиклар куни” тадбири ёшлар ҳаётида унутилмас воқеалардан бирига айланди.

Ушбу тадбирда тумандаги 1-, 31-, 36-, 38-, 55-, 56-, ва 87-сонли умумтаълим мактабларининг 9–11-синф ўқувчилари, чақириққача ёшларни тайёрлаш фани раҳбарлари ҳамда мактабларда фаолият юритаётган “Ватан таянчи” отрядларининг фаол аъзолари иштирок этдилар. Бу эса тадбирнинг қамрови ва аҳамиятини янада оширди.

Учрашув аввалида Амударё тумани Мудофаа ишлари бўлими бошлиғи, подполковник Шуҳрат Маматов ҳамда Давлат хавфсизлик хизмати Чегара қўшинларининг масъул ходимлари сўзга чиқиб, иштирокчиларни Ватан ҳимоячилари куни байрами ҳамда Қуролли Кучлар ташкил этилганининг 34 йиллиги билан самимий табрикладилар. Улар ўз чиқишларида сўнгги йилларда Миллий Армиямизда амалга оширилаётган кенг кўламли ислоҳотлар, ҳарбий хизмат шароитларини яхшилаш, замонавий техника ва қурол-аслаҳалар билан таъминлаш борасида қилинган ишлар ҳақида атрофлича тўхталиб ўтдилар.

Шунингдек, мамлакатимиз чегараларининг дахлсизлигини таъминлаш, тинчлик ва осойишталикни сақлашда чегара қўшинларининг ўрни беқиёс экани, ҳарбий хизматнинг нафақат шарафли бурч, балки юксак масъулият экани таъкидланди. Ёшларга Ватан ҳимоячиси бўлиш учун жисмоний тайёргарлик билан бирга, юксак маънавий-ахлоқий фазилатлар, қатъият, садоқат ва интизом ҳам муҳим экани уқтирилди.

Тадбир доирасида ўқувчилар учун ҳарбий қисм бўйлаб махсус саёҳат ташкил этилди. Ташриф давомида ёшлар ҳарбий хизматчиларнинг кундалик ҳаёти, яратилган шарт-шароитлар, ётоқхона ва ўқув хоналари, спорт майдончалари билан яқиндан танишдилар. Ҳарбий техника ва қурол-аслаҳалар кўргазмаси эса иштирокчиларда катта қизиқиш уйғотди. Замонавий жиҳозлар, махсус техника воситалари ёшларда ҳарбий соҳага нисбатан янада кучли қизиқиш пайдо бўлишига туртки берди.

Айниқса, “Ватан таянчи” отряди аъзолари ҳарбий хизматчиларга ўзларини қизиқтирган саволлар билан мурожаат қилиб, чегарачи касбининг ўзига хос жиҳатлари, хизмат шартлари, қабул талаблари ҳамда ҳарбий таълим муассасалари ҳақида батафсил маълумот олдилар. Офицер ва сержантлар ёшларнинг барча саволларига атрофлича жавоб бериб, уларни келажакда Ватанга сидқидилдан хизмат қилишга чорладилар.

Бундай “Очиқ эшиклар куни” тадбирлари ёш авлод қалбида Ватанга муҳаббат, Миллий Армиямизга ҳурмат ва ифтихор туйғуларини мустаҳкамлашда муҳим аҳамият касб этади. Ушбу учрашувлар орқали ёшлар ҳарбий хизматнинг мазмун-моҳиятини янада чуқур англаб, келажакда она юрт равнақи ва тинчлиги йўлида фидоий бўлишга илҳом оладилар.